ໃນວັນທີ 9 ມີນາ 2019, ທ່ານ ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກຳມະການປະສານງານຮ່ວມ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຂອງ ສປປ ລາວ ຈະນໍາພາຄະນະຜູ້ແທນ ສປປ ລາວ ຈາກກະຊວງຂະແໜງການກ່ຽວຂ້ອງຂັ້ນສູນກາງ ແລະ ຈາກ 4 ແຂວງພາກໃຕ້ ຄື: ແຂວງສາລະວັນ, ແຂວງເຊກອງ, ແຂວງອັດຕະປື ແລະ ແຂວງຈຳປາສັກ ເດີນທາງເຂົ້າຮ່ວມກອງປະຊຸມ ລັດຖະມົນຕີ ຄະນະກຳມະການປະສານງານຮ່ວມເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 12ທີ່ ແຂວງກະແຈະ, ກຳປູເຈຍ, ຊຶ່ງຈະຈັດຂຶ້ນໃນວັນທີ 10 ມີນາ 2019.
ຈຸດປະສົງ ຂອງກອງປະຊຸມຄັ້ງນີ້ ແມ່ນເພື່ອທົບທວນຄືນ ຄວາມຄືບໜ້າການຈັດຕັ້ງປະຕິບັດ ຜົນກອງປະຊຸມ ຄະນະກຳມະການປະສານງານຮ່ວມ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (JCC) ຄັ້ງທີ 11 ໃນເດືອນທັນວາ 2017 ທີ່ ແຂວງບິງເຟືອກ, ສສ ຫວຽດນາມ ແລະ ກອງປະຊຸມສຸດຍອດ ເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດນາມ ຄັ້ງທີ 10 ໃນເດືອນມີນາ 2018 ທີ່ ຮ່າໂນ້ຍ, ສສ ຫວຽດນາມ ແລະ ພ້ອມທັງປຶກສາຫາລື ກ່ຽວກັບ ຂໍ້ຄົງຄ້າງ ແລະ ສິ່ງທ້າທາຍຕ່າງໆ ທີ່ເປັນອຸປະສັກໃນການພັດທະນາ ເສດຖະກິດ-ສັງຄົມ ຂອງ 3 ປະເທດ ກໍຄືໃນ 13 ແຂວງ ຂອງເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ແນໃສ່ກຳນົດທິດທາງການຮ່ວມ ມືໃນຕໍ່ໜ້າ ເພື່ອຮັດແໜ້ນສາຍພົວພັນມິດຕະພາບ ອັນເປັນມູນເຊື້ອທີ່ມີມາຍາວນານ ລະຫວ່າງ 3 ຊາດ ເຮັດໃຫ້ຫຼຸດພົ້ນ ອອກຈາກຄວາມທຸກຍາກເທື່ອລະກ້າວ ແລະ ນຳຄວາມຈະເລີນສີວິໄລ ມາສູ່ເຂດສາມຫຼ່ຽມພັດທະນາ.
ເພື່ອກະກຽມໃຫ້ແກ່ ກອງປະຊຸມຄະນະກຳມະການປະສານງານຮ່ວມ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ໄດ້ມີກອງປະຊຸມປິ່ນອ້ອມທີ່ສຳຄັນ ຄື: ກອງປະຊຸມເຈົ້າໜ້າທີ່ອາວຸໂສ ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (CLV DTA) ຄັ້ງທີ 12, ກອງປະຊຸມອະນຸກໍາມະການດ້ານເສດຖະກິດ ຄັ້ງທີ 11, ກອງປະຊຸມອະນຸກໍາມະການດ້ານຄວາມໝັ້ນຄົງ ແລະ ວຽກງານການຕ່າງປະເທດ ຄັ້ງທີ 11, ກອງປະຊຸມອະນຸກໍາມະການສັງຄົມ ແລະ ສິ່ງແວດລ້ອມ ຄັ້ງທີ 9 ແລະ ກອງປະຊຸມອະນຸກໍາມະການປະສານງານລະດັບແຂວງ ຄັ້ງທີ 10, ຊື່ງໄດ້ຈັດຂື້ນໃນວັນທີ 8-9 ມີນາ 2019 ທີ່ ແຂວງ ກະແຈະ. ນອກຈາກນີ້, ຍັງມີການຈັດງານວາງສະແດງການຄ້າ ແລະ ການທ່ອງທ່ຽວ ໃນວັນທີ 7-10 ມີນາ 2019, ເວທີປຶກສາຫາລືຊາວໜຸ່ມ ຄັ້ງທີ 8 ໃນວັນທີ 4-6 ມີນາ 2019 ແລະ ກອງປະຊຸມສໍາມະນາ ວ່າດ້ວຍການສົ່ງເສີມການຄ້າ, ການລົງທຶນ ແລະ ການທ່ອງທ່ຽວ ຄັ້ງທີ 12 ໃນວັນທີ 09 ມີນາ 2019 ທີ່ ແຂວງກະແຈະ, ກຳປູເຈຍ ເຊັ່ນດຽວກັນ.