ອາຊຽນ (ASEAN) ຈະຈັດການແຂ່ງຂັນຊີງລາງວັນ (ASEAN Prize 2019) ປະຈຳປີ 2019, ເພື່ອມອບເປັນກຽດໃຫ້ແກ່ບຸກຄົນ ຫລື ອົງການຈັດຕັ້ງ ທີ່ມີຜົນງານໂດດເດັ່ນໃນການປະກອບສ່ວນສົ່ງເສີມການຮ່ວມມື ແລະ ການສ້າງປະຊາຄົມອາຊຽນ ກໍຄື ການສົ່ງເສີມເອກະລັກຂອງອາຊຽນ (ASEAN Identity), ສົ່ງເສີມນໍ້າໃຈຄອບຄົວອາຊຽນ (ASEAN Spirit), ແລະ ສະໜັບສະໜູນວິຖີທາງຂອງອາຊຽນ (ASEAN Way).

ເງື່ອນໄຂໃນການຄັດເລືອກ

1. ຕ້ອງເປັນພົນລະເມືອງລາວ ຫຼື ເປັນອົງການຈັດຕັ້ງ ທີ່ຂື້ນທະບຽນຖືກຕ້ອງຕາມກົດໝາຍຂອງ ສປປ ລາວ ລວມມີ ຫົວໜ່ວຍຕ່າງໆຂອງພາກລັດ, ພາກເອກະຊົນ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ຄອບຄົວຕົວແບບ, ສະຫະກອນ ແລະ ກຸ່ມການຜະລິດ-ບໍລິການ.
2. ຕ້ອງມີຜົນງານດີເດັ່ນ ແລະ ເປັນທີ່ຍອມຮັບຈາກສັງຄົມໂດຍທົ່ວໄປໂດຍສະເພາະແມ່ນ ດີເດັ່ນໃນດ້ານການປະສານງານຮ່ວມມື ລະຫວ່າງ ປະເທດສະມາຊິກອາຊຽນ; ການຮ່ວມມືລະຫວ່າງອາຊຽນ ກັບ ສາກົນ; ຮັດແໜ້ນການພົວພັນຮ່ວມມື ລະຫວ່າງ ປະຊາຊົນ ໃນປະເທດສະມາຊິກອາຊຽນ; ມີການເຊື່ອມໂຍງດ້ານເສດຖະກິດ ແລະ ການສົ່ງເສີມມາດຕະຖານ ລະຫວ່າງ ປະເທດສະມາຊິກອາຊຽນ; ແລະ ດີເດັ່ນໃນການປະກອບສ່ວນສ້າງປະຊາຄົມອາຊຽນ.
3. ປະຕິບັດຕາມແນວທາງຂອງພັກ, ລະບຽບກົດໝາຍ ແລະ ນະໂຍບາຍຂອງລັດ, ເຄົາລົບນັບຖືຮີດຄອງປະເພນີອັນດີງາມຂອງຊາດ ແລະ ຂອງບັນດາເຜົ່າ.

ການສະເໜີບຸກຄົນ ຫຼື ອົງການຈັດຕັ້ງທີ່ຖືກຄັດເລືອກ

• ບຸກຄົນ ຫຼື ອົງການຈັດຕັ້ງ ທີ່ສົນໃຈສະໝັກຈະຕ້ອງຂຽນບົດປະເມີນຜົນງານຂອງຕົນ 2-3 ໜ້າ, (ນັບແຕ່ເດືອນມັງກອນ 2018 ຫາ ເດືອນ ມັງກອນ 2019) ທັງພາສາລາວ ແລະ ພາສາອັງກິດ, ໂດຍອີງໃສ່ເງື່ອນໄຂໃນການຄັດເລືອກ ທີ່ລະບຸໄວ້ໃນ ຂໍ້ 2.
• ການປະກາດ ແລະ ພິທີມອບລາງວັນ ຈະຈັດຂື້ນໃນລະຫວ່າງ ກອງປະຊຸມສຸດຍອດອາຊຽນ ຄັ້ງທີ 34 ໃນເດືອນ ມິຖຸນາ 2019, ທີ່ ບາງກອກ. ຜູ້ຊະນະເລີດ ຈະໄດ້ຮັບເງິນລາງວັນ ຈຳນວນ 20,000 ໂດລາສະຫະລັດ.

• ກະລຸນາສົ່ງບົດປະເມີນຂອງທ່ານ ມາຍັງຈຸດປະສານງານແຫ່ງຊາດ (ກົມອາຊຽນ, ກະຊວງການຕ່າງປະເທດ) ໂດຍກົງ ຫຼື ອີເມວ This email address is being protected from spambots. You need JavaScript enabled to view it. ຊ້າສຸດພາຍໃນວັນທີ 15 ມີນາ 2019. ລາຍລະອຽດເພີ່ມເຕີມສາມາດເຂົ້າເບີ່ງໄດ້ທີ່ https://asean.org/call-nominations-asean-prize-2019/ຫຼື ຕິດຕໍ່ ເບີໂທລະສັບ 021 454115 / 020 2814 0260.