ໃນວັນທີ 9 ກັນຍາ 2021 ທີ່ຈະມາເຖິງນີ້, ທີ່ ຫ້ອງວ່າການສຳນັກງານນາຍົກລັດຖະມົນຕີ, ພະນະທ່ານພັນຄຳ ວິພາວັນ, ນາຍົກລັດຖະມົນຕີແຫ່ງ ສປປ ລາວ ຈະນຳພາຄະນະຜູ້ແທນຂອງ ສປປ ລາວ ເຂົ້າຮ່ວມກອງປະຊຸມສຸດຍອດຜູ້ນຳອະນຸພາກພື້ນແມ່ນ້ຳຂອງ ຄັ້ງທີ 7 ຜ່ານລະບົບທາງໄກພາຍໃຕ້ຫົວຂໍ້: "ການສ້າງຄວາມເຂັ້ມແຂງໃຫ້ແກ່ການຮ່ວມມືອະນຸພາກພື້ນແມ່ນໍ້າຂອງຄືນໃໝ່ ເພື່ອຮອງຮັບສິ່ງທ້າທາຍໃນທົດສະວັດໃໝ່ - GMS Renewed Strength to Face the Challenges of the New Decade" ໂດຍການເປັນປະທານຂອງ ສົມເດັດ ເຕໂຊ ຮຸນເຊັນ, ນາຍົກລັດຖະມົນຕີ ແຫ່ງຣາຊະອານາຈັກ ກໍາປູເຈຍ, ເຊິ່ງຈະມີບັນດາຜູ້ນໍາປະເທດສະມາຊິກອະນຸພາກພື້ນແມ່ນໍ້າຂອງ, ປະທານທະນາຄານພັດທະນາອາຊີ ແລະ ອົງການຈັດຕັ້ງສາກົນຕ່າງໆເຂົ້າຮ່ວມ.
ກອງປະຊຸມສຸດຍອດຜູ້ນໍາອະນຸພາກພື້ນແມ່ນໍ້າຂອງ ຄັ້ງທີ 7 ນີ້, ຈະໄດ້ທົບທວນຄືນການຮ່ວມມືໃນໄລຍະ 3 ປີຜ່ານມາ ໂດຍສະເພາະການຕີລາຄາຄືນຜົນການຈັດຕັ້ງປະຕິບັດແຜນງານການຮ່ວມມືທາງດ້ານເສດຖະກິດອະນຸພາກພື້ນແມ່ນໍ້າຂອງ ໃນໄລຍະ 3 ປີທີ່ຜ່ານມາ ໂດຍສະເພາະການຜັນຂະຫຍາຍໝາກຜົນຂອງກອງປະຊຸມສຸດຍອດຜູ້ນໍາອະນຸພາກພື້ນແມ່ນໍ້າຂອງ ຄັ້ງທີ 6 ຜ່ານມາ, ຂອບການລົງທຶນພາກພື້ນ (Regional Investment Framework: RIF) 2018-2022 ແລະ ສະຫຼຸບຕີລາຄາ ການຈັດຕັ້ງປະຕິບັດຍຸດທະສາດການຮ່ວມມືຶອະນຸພາກພື້ນແມ່ນໍ້າຂອງ 2012-2022 ພ້ອມທັງ ຈະກໍານົດທິດທາງຮ່ວມມືໃນຕໍ່ໜ້າ ໂດຍສະເພາະ ຈະພິຈາລະນາຮັບຮອງເອົາ 3 ເອກະສານສໍາຄັນ ຄື: 1) ຍຸດທະສາດການຮ່ວມມືທາງດ້ານເສດຖະກິດອະນຸພາກພື້ນແມ່ນໍ້າຂອງ 2030; 2) ແຜນດໍາເນີນງານການຟື້ນຟູ ແລະ ຕອບໂຕ້ພະຍາດ Covid-19 ສໍາລັບ ປີ 2021-2023; ແລະ 3) ຖະແຫຼງການຮ່ວມກອງປະຊຸມສຸດຍອດຜູ້ນໍາອະນຸພາກພື້ນແມ່ນໍ້າຂອງ ຄັ້ງທີ 7 (Joint Summit Declaration).
ແຜນງານການຮ່ວມມືທາງດ້ານເສດຖະກິດ ອະນຸພາກພື້ນແມ່ນໍ້າຂອງ (Greater Mekong Subregion Economic Cooperation Program: GMS) ໄດ້ສ້າງຕັ້ງຂຶ້ນໃນປີ 1992 ໂດຍມີ 6 ປະເທດສະມາຊິກ ຄື:ສປ ຈີນ (ແຂວງຢູນນານ ແລະ ກວາງຊີ), ກຳປູເຈຍ, ສປປ ລາວ, ມຽນມາ, ໄທ ແລະ ສສ ຫວຽດນາມ, ເຊິ່ງມີ ທະນາຄານພັດທະນາອາຊີ (ADB) ເປັນກອງເລຂາ ແລະ ເປັນຜູ້ປະສານງານໃນການຈັດຕັ້ງປະຕິບັດວຽກງານ, ການຊ່ວຍເຫຼືອ ແລະ ການຮ່ວມມື ລະຫວ່າງ ປະເທດສະມາຊິກ ແລະ ບັນດາຄູ່ຮ່ວມພັດທະນາ. ຈຸດປະສົງຂອງການຮ່ວມມືໃນອະນຸພາກພື້ນແມ່ນໍ້າຂອງ ແມ່ນເພື່ອສົ່ງເສີມການພັດທະນາທາງດ້ານເສດຖະກິດ ແລະ ສັງຄົມ ໃຫ້ມີການເຊື່ອມໂຍງພາຍໃນຂົງເຂດອະນຸພາກພື້ນ ແລະ ສາກົນ ໂດຍສຸມໃສ່ການຮ່ວມມືໃນ 8 ໜ່ວຍງານເປັນບູລິມະສິດ ຄື: ດ້ານການຂົນສົ່ງ, ພະລັງງານ, ການທ່ອງທ່ຽວ, ສິ່ງແວດລ້ອມ, ສາທາລະນະສຸກ, ການອຳນວຍຄວາມສະດວກທາງດ້ານການຄ້າ ແລະ ການຂົນສົ່ງ, ກະສິກຳ, ແລະ ການພັດທະນາຕົວເມືອງ. ກອງປະຊຸມສຸດຍອດອະນຸພາກພື້ນແມ່ນໍ້າຂອງ ແມ່ນຈັດຂຶ້ນທຸກໆ 3 ປີ ໂດຍການພັດປ່ຽນກັນເປັນປະທານ ລະຫວ່າງ ບັນດາປະເທດສະມາຊິກ ຄື: ສປ ຈີນ, ກໍາປູເຈຍ, ລາວ, ມຽນມາ, ໄທ ແລະ ສສ ຫວຽດນາມ ຕາມລໍາດັບ.