ແຈ້ງການຂອງກະຊວງການຕ່າງປະເທດ
ຕອບສະໜອງຕາມຄຳເຊີນຂອງ ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຟ້າມ ບິ່ງ ມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນ ກະຊວງການຕ່າງປະເທດ ຈະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 18-19 ທັນວາ 2018.
---------------------------------------------
ຊີວະປະວັດ
ສະຫາຍຟ້າມບິ່ງມີງ,
ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດແຫ່ງ ສສ ຫວຽດນາມ
-----
ຊື່ແລະນາມສະກຸນ: ຟ້າມບິ່ງມີງ
ເກີດເມື່ອປີ: 1959
ບ່ອນເກີດ: ແຂວງນາມດີ້ງ
ສະພາບຄອບຄົວ: ພັນລະນາ ນາງຫງວຽນຫງວຽດຫງ່າແລະມີລູກນຳກັນ 02 ຄົນ
ພາສາຕ່າງປະເທດ: ພາສາອັງກິດ
ລະດັບການສຶກສາ
ຮຽນຈົບມະຫາວິທະຍາໄລການທູດ (ປັດຈຸບັນແມ່ນວິທະຍາຄານການທູດ) ປີ 1981.
ປະລິນຍາໂທກົດໝາຍແລະການທູດຢູ່ມະຫາວິທະຍາໄລ Fletcher Tufts (ສະຫະລັດອາເມລິກາ).
ປະຫວັດການເຮັດວຽກ
1981:ວິຊາການກົມບຳລຸງກໍ່ສ້າງ (ປັດຈຸບັນແມ່ນກົມຈັດຕັ້ງພະນັກງານ).
1982-1985:ປະຈຳການຢູ່ສະຖານທູດຫວຽດນາມປະຈຳປະເທດອັງກິດ.
1986-1990:ວິຊາການກົມບັນຫາລວມ (ປັດຈຸບັນແມ່ນກົມອົງການຈັດຕັ້ງສາກົນ).
1991-1999:ຮອງຫົວໜ້າກົມອົງການຈັດຕັ້ງສາກົນ.
1999-01/2003:ເອກອັກຄະລັດຖະທູດ, ຮອງຫົວໜ້າຫ້ອງການຜູ້ຕາງໜ້າຫວຽດນາມປະຈຳສະຫະປະຊາຊາດຢູ່ New York; ອັກຄະລັດຖະທູດ, ຮອງທູດ, ສະຖານທູດຫວຽດນາມປະຈຳສະຫະລັດອາເມລິກາ.
3/2003-9/2006:ຮັກສາການຫົວໜ້າກົມ; ຫົວໜ້າກົມອົງການຈັດຕັ້ງສາກົນ, ຫົວໜ້າຄະນະເຈລະຈາກ່ຽວກັບສິດທິມະນຸດກັບຕ່າງປະເທດ.
9/2006-8/2011:ຜູ້ຊ່ວຍລັດຖະມົນຕີ, ຮອງລັດຖະມົນຕີກະຊວງການຕ່າງປະເທດ.
4/2006:ໄດ້ຮັບການເລືອກຕັ້ງເປັນກຳມະການສຳຮອງສູນກາງພັກສະໄໝທີ X.
01/2009:ໄດ້ຮັບການເລືອກຕັ້ງເປັນກຳມະການສູນກາງພັກສະໄໝທີ X.
7/2011:ສະມາຊິກສະພາແຫ່ງຊາດສະໄໝທີ XIII.
8/2011:ລັດຖະມົນຕີກະຊວງການຕ່າງປະເທດ, ກຳມະການສະພາປ້ອງກັນຊາດ-ປ້ອງກັນຄວາມສະຫງົບ.
11/2011:ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ.
01/2016:ກຳມະການກົມການເມືອງສູນກາງພັກສະໄໝທີ XII.
6/2016:ສະມາຊິກສະພາແຫ່ງຊາດສະໄໝທີ XIV./.
ນະຄອນຫຼວງວຽງຈັນ, ວັນທີ 17 ທັນວາ 2018
ກະຊວງການຕ່າງປະເທດ
ເພື່ອສືບຕໍ່ຈັດຕັ້ງຜັນຂະຫຍາຍຜົນຂອງກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ທີ່ໄດ້ຈັດຂຶ້ນໃນເດືອນ ມັງກອນ 2018 ທີ່ ກໍາປູເຈຍ ແລະ ຈັດຕັ້ງປະຕິບັດແຜນປະຕິບັດງານ 5 ປີ ຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ 2018-2022, ສປປ ລາວ ໃນນາມປະທານຮ່ວມຂອງຂອບການຮ່ວມມືດັ່ງກ່າວ ສໍາລັບປີ 2018-2020, ຈະໄດ້ຮັບກຽດເປັນເຈົ້າພາບຈັດ ກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4 (The 4th Mekong – Lancang Cooperation Foreign Ministers’ Meeting) ຂຶ້ນໃນລະຫວ່າງວັນທີ 15-17 ທັນວາ 2018 ທີ່ ນະຄອນ ຫລວງພະບາງ.
ແຈ້ງການຂອງກະຊວງການຕ່າງປະເທດ
ໂດຍຕອບສະໜອງຕາມຄຳເຊີນຂອງ ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຫວັງ ອີ້, ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາຊົນຈີນ ພ້ອມດ້ວຍຄະນະ ຈະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 16 ທັນວາ 2018.
ພ້ອມດຽວກັນນັ້ນ, ສະຫາຍ ຫວັງ ອີ້ ຈະໄດ້ເດີນທາງເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 4, ຊຶ່ງຈະຈັດຂຶ້ນໃນວັນທີ 17 ທັນວາ 2018, ທີ່ ແຂວງຫຼວງພະບາງ.