ໃນວັນທີ 13 ມິຖຸນາ 2018, ທີ່ ສຳນັກງານນາຍົກລັດຖະມົນຕີ, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານຊັງ ອາແຊນບອນ (Jean ASSELBORN), ລັດຖະມົນຕີກະຊວງການຕ່າງປະເທດ ແລະ ວຽກງານເອີຣົບ ແຫ່ງ ຣາຊະອານາຈັກ ລຸກຊຳບວກ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 12-13 ມິຖຸນາ 2018.
ໃນໂອກາດນີ້, ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຕໍ່ການເດີນທາງມາຢ້ຽມຢາມ ສປປ ລາວ ຢ່າງເປັນທາງການ ຂອງຄະນະຜູ້ແທນ ລຸກຊຳບວກ ໃນຄັ້ງນີ້, ພ້ອມທັງຕີລາຄາສູງຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ລຸກຊຳບວກ ທີ່ມີລັກສະນະຕັ້ງໜ້າ, ມີຈຸດສຸມ ແລະ ມີລະດັບເປົ້າໝາຍໃນການຈັດຕັ້ງປະຕິບັດຢ່າງເປັນລະບົບ ແລະ ໄດ້ຮັບການເສີມຂະຫຍາຍຂຶ້ນໄປເລື້ອຍໆ ນັບຕັ້ງແຕ່ໄດ້ສ້າງຕັ້ງສາຍພົວພັນການທູດນຳກັນໃນວັນທີ 25 ກັນຍາ 1997 ເປັນຕົ້ນມາ. ໃນໂອກາດດັ່ງກ່າວນີ້, ພະນະທ່ານ ນາຍົກລັດຖະມົນຕີ ກໍ່ໄດ້ສະແດງຄວາມຂອບໃຈຕໍ່ການຊ່ວຍເຫຼືອອັນລ້ຳຄ່າຂອງລັດຖະບານ ແລະ ປະຊາຊົນລຸກຊໍາບວກ ໃຫ້ແກ່ ສປປ ລາວ ໃນໄລຍະຜ່ານມາ ທັງໃນຂອບສອງຝ່າຍ ແລະ ຫຼາຍຝ່າຍ, ຊຶ່ງໃນປີ 2017 ລັດຖະບານ ລຸກຊຳບວກ ໄດ້ລົງນາມເພີ່ມການຊ່ວຍເຫຼືອໃຫ້ແກ່ ສປປ ລາວ ຈາກ 60 ລ້ານເອີໂຣ ມາເປັນ 75 ລ້ານ ເອີໂຣ ເພື່ອຊ່ວຍເຫຼືອໃນຂະແໜງ ສາທາລະນະສຸກ, ການພັດທະນາທ້ອງຖິ່ນຊົນນະບົດ, ການພັດທະນາພື້ນຖານໂຄງລ່າງ, ການທ່ອງທ່ຽວ ແລະ ການໂຮງແຮມ, ອະຊີວະສຶກສາ, ການປົກຄອງ ແລະ ໂຄງການຮ່ວມມືອື່ນໆທີ່ລາວ ແລະ ລຸກຊໍາບວກພວມຈັດຕັ້ງປະຕິບັດໃຫ້ປະກົດຜົນເປັນຈິງ. ການຊ່ວຍເຫຼືອດັ່ງກ່າວໄດ້ປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມ 5 ປີ ຄັ້ງທີ 8 (2016-2020) ຂອງ ສປປ ລາວ ກໍ່ຄືການລຶບລ້າງຄວາມທຸກຍາກຢູ່ ສປປ ລາວ. ພ້ອມດຽວກັນນີ້, ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ຍັງສະເໜີໃຫ້ພາກສ່ວນກ່ຽວຂ້ອງຂອງທັງສອງຝ່າຍ ສືບຕໍ່ປຶກສາຫາລືກັນ ເພື່ອຊຸກຍູ້ ແລະ ຊອກຫາທ່າແຮງໃນການຮ່ວມມືດ້ານການຄ້າ-ການລົງທຶນ ລະຫວ່າງ ສອງປະເທດ, ພ້ອມທັງ ສະໜັບສະໜູນຄູ່ຮ່ວມມືດ້ານທຸລະກິດ ແລະ ການຮ່ວມມື ລະຫວ່າງ ພາກລັດ ແລະ ເອກະຊົນ. ໃນຕອນທ້າຍ ພະນະທ່ານ ທອງລຸນ ສີສຸລິດ ກໍ່ໄດ້ອວຍພອນໃຫ້ ທ່ານລັດຖະມົນຕີ ພ້ອມດ້ວຍຄະນະ ຈົ່ງປະສົບຜົນສຳເລັດໃນການເດີນທາງມາຢ້ຽມຢາມທາງການ ແລະ ເຮັດວຽກຢູ່ ສປປ ລາວ ໃນຄັ້ງນີ້.
ໃນໂອກາດດຽວກັນ, ທ່ານລັດຖະມົນຕີ ຊັງ ອາແຊນບອນ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຂອບໃຈລັດຖະບານ ສປປ ລາວ ຕໍ່ການສະໜັບສະໜູນ ລຸກຊຳບວກ ໃນການສະໝັກເຂົ້າເປັນສະມາຊິກຂອງອົງການຈັດຕັ້ງສາກົນ ໃນໄລຍະຜ່ານມາ.