ໃນຕອນຄໍ່າຂອງວັນທີ 25 ກໍລະກົດ 2024 ທີ່ ໂຮງແຮມລາວພລາຊາ ໄດ້ມີພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ການາດາ ຄົບຮອບ 50 ປີ ເຊິ່ງ ສປປ ລາວ ແລະ ການາດາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 15 ມິຖຸນາ 1974 ແລະ ວັນຊາດ ການາດາ ຄົບຮອບ 157 ປີ (01 ກໍລະກົດ 1867 - 01 ກໍລະກົດ 2024) ພ້ອມທັງ ສະເຫຼີມສະຫຼອງການເປັນປະເທດປະສານງານ ອາຊຽນ-ການາດາ ຂອງ ສປປ ລາວ ຈັດໂດຍ ທ່ານ ນາງ ປິ່ງ ກິດນິກອນ, ເອກອັກຄະລັດຖະທູດ ການາດາ ປະຈຳ ສປປ ລາວ ທີ່ມີສໍານັກງານຕັ້ງຢູ່ ບາງກອກ.

ໃນຕອນບ່າຍຂອງວັນທີ 25 ກໍລະກົດ 2024 ໄດ້ມີການຈັດກອງປະຊຸມພົບປະ 3 ຝ່າຍ ລາວ-ຈີນ-ຣັດເຊຍ ຂຶ້ນຢູ່ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ໂດຍການເຂົ້າຮ່ວມຂອງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ຫວັງ ອີ້, ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ແລະ ທ່ານ ເຊີຣເກ ລາວະຣົບ, ລັດຖະມົນຕີກະຊວງການຕ່າງປະເທດ ແຫ່ງ ສ. ຣັດເຊຍ ພ້ອມດ້ວຍຄະນະຜູ້ແທນຂອງທັງສາມຝ່າຍ.

ໃນເວລາ 16:00 ໂມງ ຂອງ​ວັນ​ທີ 25 ກໍລະກົດ 2024 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ,        ທ່ານ ສະເຫີຼມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ​ໄດ້​ພົບ​ປະ​ ກັບ ທ່ານ ເຊຣເກ ລາວະຣົບ, ລັດຖະມົນຕີກະຊວງການຕ່າງປະເທດ ແຫ່ງ ສະຫະພັນ ຣັດເຊຍ ໃນໂອກາດນໍາພາຄະນະຜູ້ແທນຣັດເຊຍ ມາເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ (AMM) ຄັ້ງທີ 57 ໃນວັນທີ 21-27 ກໍລະກົດ 2024 ທີ່ ນະຄອນຫຼວງວຽງຈັນ.