1. ກອງປະຊຸມລັດຖະມົນຕີຕ່າງປະເທດອາຊຽນ-ສະຫະພາບເອີຣົບ ຫຼື ອີຢູ
ໃນຕອນບ່າຍຂອງວັນທີ 6 ສິງຫາ 2021, ທີ່ ກະຊວງການຕ່າງປະເທດ ທ່ານ ສະເຫຼີມໄຊ ກົມມະສິດ, ລັດຖະມົນຕີຕ່າງປະເທດ ແຫ່ງ ສປປ ລາວ ໄດ້ສືບຕໍ່ນຳພາຄະນະເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ພາຍໃຕ້ການເປັນປະທານຮ່ວມຂອງ ທ່ານ ດຣ. ວິວຽນ ບາລາຄຣິສນັນ, ລັດຖະມົນຕີຕ່າງປະເທດ ແຫ່ງ ສິງກະໂປ ແລະ ທ່ານ Josep Borrell, ຜູ້ຕາງໜ້າລະດັບສູງ ແລະ ຮອງປະທານສະຫະພາບເອີຣົບ.
ກອງປະຊຸມໄດ້ສະແດງຄວາມເພິ່ງພໍໃຈຕໍ່ຜົນການຈັດຕັ້ງປະຕິບັດການຮ່ວມມືໃນໄລຍະ 1 ປີ ຜ່ານມາ ໂດຍສະເພາະ ການຜັນຂະຫຍາຍຜົນກອງປະຊຸມລັດຖະມົນຕີສາທາລະນະສຸກ ອາຊຽນ-ອີຢູ ກ່ຽວກັບ ການແຜ່ລະບາດຂອງພະຍາດໂຄວິດ-19 ໃນເດືອນມີນາ 2020 ແບບທາງໄກ. ກອງປະຊຸມ ໄດ້ສະແດງຄວາມຊົມເຊີຍຕໍ່ຜົນສໍາເລັດການເຈລະຈາສັນຍາຂົນສົ່ງທາງອາກາດຮອບດ້ານ ອາຊຽນ-ອີຢູ ແລະ ອາຊຽນໄດ້ຂອບໃຈ ອີຢູ ທີ່ໄດ້ໃຫ້ການຊ່ວຍເຫຼືອໃນການຮັບມືກັບພະຍາດໂຄວິດ-19 ເປັນມູນຄ່າ 800 ລ້ານເອີໂຣ. ພ້ອມນີ້, ກອງປະຊຸມ ໄດ້ເຫັນດີສືບຕໍ່ຮັດແໜ້ນການຮ່ວມມືໃນຂະແໜງສາທາລະນະສຸກ ໂດຍສະເພາະ ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ລວມທັງ ການຮ່ວມມືກັນໃນການຄົ້ນຄວ້າ-ພັດທະນາ ແລະ ຜະລິດຢາປົວພະຍາດ ກໍ່ຄື ຢາວັກແຊັງຕ້ານໂຄວິດ-19; ຮ່ວມມືກັນເພື່ອຟື້ນຟູເສດຖະກິດຮອບດ້ານຫຼັງໂຄວິດ-19; ການສືບຕໍ່ຈັດຕັ້ງປະຕິບັດແຜນແມ່ບົດການເຊື່ອມຈອດອາຊຽນ ຮອດປີ 2025 (MPAC 2025); ການຈັດຕັ້ງປະຕິບັດແຜນປະຕິບັດງານການເຊື່ອມໂຍງອາຊຽນ ສະບັບທີ 4 (2021-2025); ການຫັນເປັນເສດຖະກິດດີຈີຕອນ ໂດຍສຸມໃສ່ສົ່ງເສີມຈຸລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງ (MSMEs) ເພື່ອໃຫ້ສາມາດເຮັດທຸລະກິດທາງເອເລັກໂຕຼນິກຮ່ວມກັນໄດ້; ການພັດທະນາແບບຍືນຍົງ; ການຄຸ້ມຄອງໄພພິບັດ; ການຄໍ້າປະກັນສະບຽງອາຫານ ແລະ ການພັດທະນາຕົວເມືອງອັດສະລິຍະ ພາຍໃຕ້ເຄືອຂ່າຍຕົວເມືອງອັດສະລິຍະອາຊຽນ.
ກອງປະຊຸມໄດ້ເຫັນດີໂດຍພື້ນຖານ ຕໍ່ຂໍ້ສະເໜີການຈັດກອງປະຊຸມສຸດຍອດສະເຫຼີມສະຫຼອງອາຊຽນ-ອີຢູ ໃນປີ 2022 ຢູ່ ບຸກແຊນ ເພື່ອເປັນການສະເຫຼີມສະຫຼອງ ຄົບຮອບ 45 ປີ ແຫ່ງການພົວພັນຮ່ວມມືອາຊຽນ-ອີຢູ.
ນອກຈາກນີ້, ກອງປະຊຸມ ໄດ້ແລກປ່ຽນຄວາມຄິດເຫັນຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ, ເປັນຕົ້ນ ຄວາມປອດໄພທາງໄຊເບີ, ການປ່ຽນແປງຂອງດິນຟ້າອາກາດ, ການກໍ່ການຮ້າຍ ແລະ ບັນຫາອື່ນໆ.
2. ກອງປະຊຸມລັດຖະມົນຕີຕ່າງປະເທດ ເວທີພາກພື້ນອາຊຽນ ຄັ້ງທີ 28
ກອງປະຊຸມທາງໄກລັດຖະມົນຕີຕ່າງປະເທດ ເວທີພາກພື້ນອາຊຽນ ຄັ້ງທີ 28 ໄດ້ຈັດຂຶ້ນໃນຕອນແລງຂອງວັນທີ 6 ສິງຫາ 2021 ພາຍໃຕ້ການເປັນປະທານຂອງ ທ່ານ ເອລິວັນ ເພຮິນ ຢູຊອບ, ລັດຖະມົນຕີຕ່າງປະເທດ ຂອງ ບຣູໄນ ດາຣູຊາລາມ. ກອງປະຊຸມ ໄດ້ທົບທວນຄືການຈັດຕັ້ງປະຕິບັດບັນດາກິດຈະກໍາການຮ່ວມມືໃນຂອບເວທີພາກພື້ນອາຊຽນ ໃນໄລຍະ 1 ປີຜ່ານມາ, ໂດຍສະເພາະບັນດາກິດຈະກຳສົ່ງເສີມຄວາມໄວ້ເນື້ອເຊື່ອໃຈ, ຄວາມເຂົ້າອົກເຂົ້າໃຈ ແລະ ຄວາມເຊື່ອໝັ້ນ ເຊິ່ງກັນ ແລະ ກັນ ລວມທັງ ການສົ່ງເສີມສັນຕິພາບ, ຄວາມໝັ້ນຄົງ ແລະ ສະຖຽນລະພາບຂອງພາກພື້ນອາຊີ-ປາຊີຟິກ, ໃນນັ້ນ ໄດ້ມີຫຼາຍກິດຈະກໍາຕ້ອງໄດ້ເລື່ອນ ຫຼື ປ່ຽນເປັນຮູບແບບທາງໄກ ເນື່ອງຈາກຜົນກະທົບຂອງພະຍາດໂຄວິດ-19 ຈຶ່ງບໍ່ສາມາດຈັດກິດຈະກໍາ ຫຼື ກອງປະຊຸມແບບເຊິ່ງໜ້າໄດ້. ກອງປະຊຸມ ຍັງໄດ້ເນັ້ນຄວາມສໍາຄັນຂອງການຮັກສາເວທີພາກພື້ນອາຊຽນ ໃຫ້ສືບຕໍ່ເປັນເວທີສໍາລັບການປຶກສາຫາລື ແລະ ແລກປ່ຽນແບບສ້າງສັນ ແລະ ດໍາເນີນໄປໃນຈັງຫວະທີ່ທຸກປະເທດມີຄວາມສະບາຍໃຈ. ພ້ອມກັນນີ້, ກອງປະຊຸມ ໄດ້ຮັບຮອງເອົາບັນດາກິດຈະກຳ ສໍາລັບສົກປີ 2021-2022, ເຊິ່ງໃນນີ້ ສປປ ລາວ ຈະໄດ້ສືບຕໍ່ເປັນປະທານຮ່ວມກັບ ສປ ຈີນ ແລະ ການາດາ ສຳລັບກອງປະຊຸມກາງສະໄໝເວທີພາກພື້ນອາຊຽນ ວ່າດ້ວຍການບັນເທົາທຸກໄພພິບັດ ຈົນເຖິງເດືອນ ສິງຫາ ປີ 2022; ເປັນປະທານຮ່ວມກັບ ສປ ຈີນ ແລະ ມາເລເຊຍ ສຳລັບກອງປະຊຸມສຳມະນາ ວ່າດ້ວຍການຊ່ວຍເຫຼືອກູ້ໄພສຸກເສີນໃນຕົວເມືອງ ຄັ້ງທີ 3; ແລະ ເປັນປະທານຮ່ວມກັບ ອິນໂດເນເຊຍ ແລະ ສະຫະພາບເອີຣົບ (ອີຢູ) ສໍາລັບກອງປະຊຸມສໍາມະນາ ກ່ຽວກັບຕ້ານການຟອກເງິນ ແລະ ສະກັດກັ້ນການສະໜອງທຶນແກ່ການກໍ່ການຮ້າຍ, ແລະ ໄດ້ຮັບຮອງເອົາ 2 ເອກະສານ ຄື: 1). ຖະແຫຼງການຮ່ວມ ເພື່ອສົ່ງເສີມວຽກງານຊາວໜຸ່ມ, ສັນຕິພາບ ແລະ ຄວາມໝັ້ນຄົງ ໃນເວທີພາກພື້ນອາຊຽນ ແລະ 2). ຖະແຫຼງການເວທີພາກພື້ນອາຊຽນ ວ່າດ້ວຍການປ້ອງກັນ ແລະ ສະກັດກັ້ນອາຊະຍາກໍາທາງຄອມພິວເຕີ (ສປປ ລາວ ເປັນຜູ້ສະໜັບສະໜູນຮ່ວມກັບ ສປ ຈີນ, ຣັດເຊຍ ແລະ ກໍາປູເຈຍ).
ນອກນັ້ນ, ກອງປະຊຸມ ຍັງໄດ້ແລກປ່ຽນຄວາມຄິດເຫັນ ກ່ຽວກັບບັນຫາພົ້ນເດັ່ນຢູ່ພາກພື້ນ ແລະ ສາກົນ ເປັນຕົ້ນ: ການຮ່ວມມືເພື່ອປ້ອງກັນ, ຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19, ການກໍ່ການຮ້າຍ ແລະ ອາຊະຍາກຳຂ້າມຊາດ, ບັນຫາຄວາມໝັ້ນຄົງທາງໄຊເບີ, ບັນຫາການປ່ຽນແປງດິນຟ້າອາກາດ, ສະພາບການຢູ່ຕະເວັນອອກກາງ, ສະພາບການໃນມຽນມາ, ແຫຼມເກົາຫລີ, ທະເລຈີນໃຕ້, ແລະ ອື່ນໆ.
ກອງປະຊຸມລັດຖະມົນຕີຕ່າງປະເທດ ເວທີພາກພື້ນອາຊຽນ ຄັ້ງຕໍ່ໄປ (ຄັ້ງທີ 29) ຈະຈັດຂຶ້ນໃນປີ 2022 ທີ່ ກໍາປູເຈຍພາຍໃຕ້ການເປັນປະທານຂອງ ກໍາປູເຈຍ. ເວທີພາກພື້ນອາຊຽນ ສ້າງຕັ້ງຂຶ້ນໃນປີ 1994 ປັດຈຸບັນ ມີປະເທດຜູ້ເຂົ້າຮ່ວມ 27 ປະເທດ.