ໃນວັນທີ 8 ກັນຍາ 2017, ຢູ່ທີ່ບ້ານຜາຕັ້ງ ເມືອງວັງວຽງ ແຂວງວຽງຈັນ ໄດ້ມີພິທີມອບ-ຮັບ ເຄື່ອງຊ່ວຍເຫຼືອ ລະຫວ່າງສະຫະພັນແມ່ຍິງກະຊວງການຕ່າງປະເທດ ແລະ ອຳນາດການປົກຄອງ 3 ບ້ານ. ບ້ານຜາຕັ້ງ, ບ້ານວັງໂພ ແລະ ບ້ານແກ່ວກ້ວາງ ເມືອງວັງວຽງ, ແຂວງວຽງຈັນ.
ເປັນກຽດມອບໂດຍທ່ານ ນາງ ອາລູນີ ກົມມະສິດ, ພັນລະຍາທ່ານລັດຖະມົນຕີກະຊວງການຕ່າງປະເທດ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ ແລະ ນາຍບ້ານຈາກ 3 ບ້ານ ໂດຍການເປັນສັກຂີພະຍານຂອງສະຫະພັນແມ່ຍິງກະຊວງການຕ່າງປະເທດ ແລະ ອຳນາດການປົກຄອງ-ພໍ່ແມ່ປະຊາຊົນ ຈາກ 3 ບ້ານຢ່າງພ້ອມພຽງ.
ໂອກາດນີ້, ທ່ານ ນາງ ອາລູນີ ກົມມະສິດ ໄດ້ສະແດງຄວາມຂອບໃຈຕໍ່ອຳນາດການປົກຄອງ-ພໍ່ແມ່ປະຊາຊົນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ; ພ້ອມນັ້ນ, ຍັງໄດ້ນຳເອົາຄຳຢື້ຢາມຖາມຂ່າວຈາກ ທ່ານລັດຖະມົນຕີ ແລະ ຄະນະນຳກະຊວງການຕ່າງປະເທດ ເຊິ່ງຍາມໃດກໍມີຄວາມເປັນຫ່ວງເປັນໄຍພໍ່ແມ່ພີ່ນ້ອງ ແລະ ລູກຫຼານທີ່ດຳລົງຊີວິດຢູ່ທ້ອງຖິ່ນ.
ເຄື່ອງທີ່ໄດ້ນຳມາມອບໃນຄັ້ງນີ້ ລວມມີ ເຄື່ອງນຸ່ງຫົ່ມ, ເຄື່ອງກັນໜາວ, ຜ້າຫົ່ມ, ເກີບກິລາ, ເຄື່ອງກິລາເດັກນ້ອຍ ແລະ ຖົງພາຍລວມມູນຄ່າ 30 ລ້ານກວ່າກີບ. ເຄື່ອງດັ່ງກ່າວນີ້ແມ່ນໄດ້ມາຈາກການເຄື່ອນໄຫວກິດຈະກຳຕ່າງໆ ຂອງເອື້ອຍນ້ອງສະຫະພັນແມ່ຍິງລາວ ທີ່ໄປປະຕິບັດໜ້າທີ່ການທູດຢູ່ຕ່າງປະເທດ ເປັນຕົ້ນຢູ່ ສ.ເກົາຫຼີ ແລະ ປະເທດ ຍີ່ປຸ່ນ. ສະຫະພັນແມ່ຍິງກະຊວງການຕ່າງປະເທດ ຈະສືບຕໍ່ເຄື່ອນໄຫວດຶງດູດຍາດແຍ່ງການຊ່ວຍເຫຼືອ ຕາມແນວທາງຂອງ ພັກ-ລັດ ເພື່ອນຳມາມອບໃຫ້ປະຊາຊົນ ໂດຍສະເພາະແມ່ຍິງ ແລະ ເດັກນ້ອຍ ທີ່ຢູ່ຫ່າງໄກສອກຫລີກ ໃນໂອກາດໜ້າ.