ນະຄອນຫລວງວຽງຈັນ, ວັນທີ 18 ສິງຫາ 2017

ພະນະທ່ານ ຈາໂນສ ອາເດີ,

ປະທານາທິບໍດີ ແຫ່ງ ສາທາລະນະລັດ ຮົງກາຣີ

ທີ່ ບູດາແປສ໌

ພະນະທ່ານ,

ເນື່ອງໃນໂອກາດວັນຊາດ ຮົງກາຣິ, ໃນນາມສ່ວນຕົວ ຂ້າພະເຈົ້າມີຄວາມຍິນດີ ຂໍສະແດງຄວາມຊົມເຊີຍອັນອົບອຸ່ນ ແລະ ອວຍພອນໄຊອັນປະເສີດມາຍັງປະຊາຊົນ ຮົງກາຣີ ເພື່ອນມິດ ຈົ່ງປະສົບຜົນສຳເລັດ ແລະ ມີຄວາມວັດທະນະຖາວອນ.

ຂ້າພະເຈົ້າຂໍຖືໂອກາດນີ້ ສະແດງຄວາມເພິ່ງພໍໃຈ ຕໍ່ບາດກ້າວການພັດທະນາສາຍພົວພັນມິດຕະພາບ ແລະ ການຮ່ວມມືສອງຝ່າຍ ທີ່ໄດ້ຮັບຜົນປະໂຫຍດຮ່ວມກັນ ລະຫວ່າງ ສປປ ລາວ ແລະ ຮົງກາຣີ. ຂ້າພະເຈົ້າມີຄວາມປະສົງຢາກຮ່ວມເຮັດວຽກກັບພະນະທ່ານ ເພື່ອເຮັດໃຫ້ການຮ່ວມມືຂອງພວກເຮົາ ໃນທຸກຂົງເຂດທີ່ມີຜົນປະໂຫຍດ ຮ່ວມກັນ ກ້າວເຂົ້າສູ່ລວງເລິກໃນຕໍ່ໜ້າ.

          ດ້ວຍຄວາມນັບຖືຢ່າງສູງ,

      ບຸນຍັງ ວໍລະຈິດ,

                                                                             ປະທານປະເທດ

                                                          ແຫ່ງ ສາທາລະນະລັດປະຊາທິປະໄຕ ປະຊາຊົນລາວ

ພະນະທ່ານ ວິກເຕີ ອໍບານ,

ນາຍົກລັດຖະມົນຕີ ຮົງກາຣີ

ທີ່ ບູດາແປສ໌

ພະນະທ່ານ,

        ເນື່ອງໃນໂອກາດວັນຊາດ ຮົງກາຣິ, ຂ້າພະເຈົ້າ ຂໍສົ່ງຄວາມຊົມເຊີຍຢ່າງຈິງໃຈ ແລະ ອວຍພອນ​ໄຊ​ອັນ​ປະ​ເສີດ​ມາຍັງພະນະທ່ານ ຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນໜ້າທີ່ອັນສູງສົ່ງຂອງພະນະທ່ານ.

ຂ້າພະເຈົ້າ ເຊື່ອໝັ້ນຢ່າງຈິງໃຈວ່າ, ມູນເຊື້ອສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ກໍ່ຄື ສອງລັດຖະບານຂອງພວກເຮົາ ຈະໄດ້ຮັບການເສີມ ຂະຫຍາຍຢ່າງບໍ່ຢຸດຢັ້ງ ເພື່ອຜົນປະໂຫຍດຂອງປະຊາຊົນສອງຊາດ.

ດ້ວຍຄວາມນັບຖືຢ່າງສູງ,

                                                                             ທອງລຸນ ສີສຸລິດ,           

                                                                            ນາຍົກລັດຖະມົນຕີ

                                                          ແຫ່ງ ສາທາລະນະລັດປະຊາທິປະໄຕ ປະຊາຊົນລາວ

ພະນະທ່ານ ປີເຕີ ຊີຈາໂຕ,

ລັດຖະມົນຕີກະຊວງການຕ່າງປະເທດ ແລະ ການຄ້າ ຮົງກາຣີ                                                                

ທີ່ ບູດາແປສ໌

ພະນະທ່ານ,

ເນື່ອງໃນໂອກາດວັນຊາດ ຮົງກາຣິ, ຂ້າພະເຈົ້າຂໍສົ່ງຄຳຊົມເຊີຍຢ່າງຈິງໃຈ ແລະ ພອນໄຊອັນປະເສີດມາຍັງພະນະທ່ານ ຈົ່ງ​ມີ​ສຸຂະ​ພາບ​ເຂັ້ມ​ແຂງ ແລະມີ​ຄວາມ​ຜາ​ສຸກ.

ຂ້າພະເຈົ້າຮູ້ສຶກພາກພູມໃຈ ທີ່ເຫັນວ່າການພົວພັນສອງຝ່າຍ ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ, ໂດຍສະເພາະແມ່ນການພົບປະທີ່ເກີດດອກອອກຜົນ ຂອງພວກເຮົາ ທີ່ ນະຄອນຫລວງວຽງຈັນ ແລະ ບູດາແປສ໌ ໄດ້ປະກອບສ່ວນໃຫ້ແກ່ການຮ່ວມມື ລະຫວ່າງສອງປະເທດຂອງພວກເຮົາ ມີຄວາມເລິກເຊິ່ງຂຶ້ນກວ່າເກົ່າ. ຂ້າພະເຈົ້າຂໍຖືໂອກາດນີ້ ສະແດງຄວາມເຊື່ອໝັ້ນວ່າ ດ້ວຍຄວາມພະຍາຍາມຮ່ວມກັນ ສາຍພົວພັນ ແລະ ການຮ່ວມມືລະຫວ່າງສອງປະເທດ ກໍ່ຄື ສອງກະຊວງການ ຕ່າງປະເທດຂອງພວກເຮົາ ຈະໄດ້ຮັບການຮັດແໜ້ນ ແລະ ຂະຫຍາຍຕົວຍິ່ງຂື້ນໃນຊຸມປີຕໍ່ໜ້າ ເພື່ອຜົນປະໂຫຍດຮ່ວມກັນ.

​ດ້ວຍຄວາມນັບຖືຢ່າງສູງ,

                                                                           ສະເຫລີມໄຊ ກົມມະສິດ,

                                                                       ລັດຖະມົນຕີກະຊວງການຕ່າງປະເທດ

                                                              ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ