ສະ​ຫາຍ ຫງວຽນ ຟູ ຈ້ອງ ທີ່​ນັບ​ຖື,

ຕາງ​ໜ້າ​ໃຫ້​ພັກ​, ລັດ​ຖະ​ບານ ແລະ ປະ​ຊາ​ຊົນລາວ ບັນ​ດາ​ເຜົ່າ ກໍ່​ຄື​ໃນ​ນາມ​ສ່ວນ​ຕົວ, ຂ້າ​ພະ​ເຈົ້າ​ ຂໍ​ຖື​ເປັນ​ກຽດ​ສົ່ງ​ຄວາມ​ຊົມ​ເຊີຍ​ຢ່າງ​ສຸດ​ໃຈ ແລະ ພອນ​ໄຊ​ອັນ​ປະ​ເສີດ ມາ​ຍັງ​ສະ​ຫາຍ ກໍ່​ຄື​ພັກ, ລັດ​ຖະ​ບານ ແລະ​ ປະ​ຊ​າ​ຊົນ​ຫວຽດ​ນາມ ອ້າຍ​ນ້ອງ ໃນ​ໂອ​ກາດ​ທີ່ສະ​ຫາຍ ໄດ້​ຮັບ​ການ​ເລືອກ​ຕັ້ງ​ໃຫ້​ດຳ​ລົງ​ຕຳ​ແໜ່ງ​ເປັນ ​ປະ​ທານ​ປະ​ເທດ ແຫ່ງ ​ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ຫວຽດ​ນາມ ​ໃນ​ກອງ​ປະ​ຊຸມ​ສະ​ໄໝ​ສາ​ມັນ ຄັ້ງ​ທີ VI ຂອງ​ສະ​ພາ​ແຫ່ງ​ຊາດ ຊຸດ​ທີ XIV ແຫ່ງ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ຫວຽດ​ນາມ ໃນ​ວັນ​ທີ 23 ຕຸ​ລາ 2018 ນີ້.

          ການ​ທີ່ ສະ​ຫາຍ ​ໄດ້​ຮັບ​ເລືອກ​ຕັ້ງ​ໃຫ້​ດຳ​ລົງ​ຕຳ​ແໜ່ງ​ອັນ​ສຳ​ຄັນ​ນີ້ ​ເປັນ​ການ​ສະ​ແດງ​ເຖິງ​ຄວາມ​ໄວ້​ເນື້ອ​ເຊື່ອ​ໃຈ ແລະ ຕີ​ລາ​ຄາ​ສູງ​ຂອງ​ທົ່ວ​ພັກ, ລັດ ແລະ ປະ​ຊາ​ຊົນ​ຫວຽດ​ນາມ ​ຕໍ່​ບົດ​ບາດ​ອັນ​ພົ້ນ​ເດັ່ນ ແລະ ປະ​ສົບ​ການ​ອັນ​ອຸ​ດົມ​ສົມ​ບູນ​ໃນ​ການ​ຊີ້​ນໍາ-ນຳ​ພາ​ ໃນ​ຖາ​ນະ​ເລ​ຂາ​ທິ​ການ​ໃຫຍ່​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດ​ນາມ ຂອງສະ​ຫາຍ ຕະ​ຫລອດ​ໄລ​ຍະ​ຜ່ານມ​າ.

          ຂ້າ​ພະ​ເຈົ້າ ​ເຊື່ອ​ໝັ້ນ​ຢ່າງ​ໜັກ​ແໜ້ນ​ວ່າ ພາຍ​ໃຕ້​ການ​ນຳ​ພາ​ອັນ​ສະ​ຫຼາດ​ສ່ອງ​ໃສ​ຂອງ​ພັກ​ກອມ​ມູ​ນິດ​ຫວຽດ​ນາມ​ທີ່​ມີ​ສະ​ຫາຍ​ເປັນ​ຜູ້​ນຳໜ້າ, ປະ​ຊາ​ຊົນ​ຫວຽດ​ນາມ​ ອ້າຍ​ນ້ອງ​ ຈະ​ສືບ​ຕໍ່​ຍາດ​ໃດ້​ຜົນ​ສຳ​ເລັດ​ອັນ​ໃໝ່, ​ໃຫຍ່​ຫລວງ​ກ່​ວາ​ເກົ່າ ໃນ​ການ​ຈັດ​ຕັ້ງຜັນ​ຂະ​ຫຍາຍ​ມະ​ຕິ​ກອງ​ປະ​ຊຸມ​ໃຫຍ່ ຄັ້ງ​ທີ XII ຂອງ​ພັກ​ກອມ​ມູ​ນິດ​ຫວຽດ​ນາມ ເພື່ອ​ບັນ​ລຸຈຸດໝາຍແຫ່ງການສ້າງ ສ​ສ. ຫວຽດ​ນາມ ໃຫ້​ກາຍ​ເປັນ​ປະ​ເທດ​ອຸດ​ສາ​ຫະ​ກຳ​ຕາມ​ທິດ​ທັນ​ສະ​ໄໝ, ເຮັດ​ໃຫ້​ປະ​ຊາ​ຊົນ​ຮັ່ງ​ມີ, ປະ​ເທດ​ຊາດ​ເຂັ້ມ​ແຂງ, ປະ​ຊາ​ທິ​ປະ​ໄຕ, ຍຸ​ຕິ​ທຳ ແລະ​ ສີ​ວິ​ໄລ.

ອວຍ​ພອນ​ໃຫ້​ສາຍ​ພົວ​ພັນມິດຕະພາບ​ອັນ​ຍິ່ງ​ໃຫຍ່, ຄວາມ​ສາ​ມັກ​ຄີ​ແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານ​ລະ​ຫວ່າງ​ ສອງ​ພັກ ສອງ​ລັດ ແລະ ປະ​ຊາ​ຊົນ​ສອງ​ຊາດ ​ລາວ-ຫວຽດ​ນາມ ຈົ່ງ​ສືບ​ຕໍ່​​ໄດ້​ຮັບການ​ເສີມ​ຂະ​ຫຍາຍ ແລະ ເກີດດອກ​ອອກ​ຜົນ​ຢ່າງ​ບໍ່​ຢຸດຢັ້ງ ເພື່ອ​ຜົນ​ປະ​ໂຫຍດຂອງ​ປະ​ຊາ​ຊົນ​ສອງ​ຊາດ, ເພື່ອ​ສັນ​ຕິ​ພາບ, ມິດ​ຕະ​ພາບ ການ​ຮ່ວມ​ມື ແລະ ການ​ພັດ​ທະ​ນາ ຢູ່​ໃນ​ພາກ​ພື້ນ ແລະ ສາ​ກົນ.

          ຂ້າ​ພະ​ເຈົ້າ​ ຂໍ​ອວຍ​ພອນ​ໃຫ້ ສະ​ຫາຍ ຈົ່ງ​ມີ​ສຸ​ຂະ​ພາບ​ເຂັ້ມ​ແຂງ, ມີ​ຄວາມ​ຜາ​ສຸກ ແລະ ມີຜົນ​ສຳ​ເລັດ​​ໃຫຍ່​ຫຼວງໃນການປະຕິບັດ​ໜ້າ​ທີ່​ອັນ​ສູງ​ສົ່ງ​ຂອງສະຫາຍ ໃນຖານະເລຂາທິການໃຫຍ່ ແລະ ປະທານປະເທດ.

ດ້ວຍ​ຄວາມ​ນັບ​ຖື​ຖານ​ສະ​ຫາຍ,

ນະ​ຄອນ​ຫລວງວຽງ​ຈັນ, ວັນ​ທີ 23 ຕຸ​ລາ 2018

   ບຸນ​ຍັງ ວໍ​ລະ​ຈິດ

ເລ​ຂາ​ທິ​ການ​ໃຫຍ່​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ ປະ​ຊາ​ຊົນ​ ປະ​ຕິ​ວັດ​ລາວ,   ປະ​ທານ​ປະ​ເທດ ​ແຫ່ງ​ ສາ​ທາ​ລະ​ນະ​ລັດ​ ປະ​ຊາ​ທິ​ປະ​ໄຕ ​ປະ​ຊາ​ຊົນ​ລາວ.