ພະນະທ່ານ ບຸນຍັງ ວໍລະຈິດ

ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ນະຄອນຫຼວງວຽງຈັນ

ພະນະທ່ານ ປະທານປະເທດ ນັບຖື,

ຂ້າພະເຈົ້າ ຂໍສະແດງຄວາມຊົມເຊີຍມາຍັງ ພະນະທ່ານ ເນື່ອງໃນໂອກາດ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ.

ສາຍພົວພັນມິດຕະພາບ ຣັດເຊຍ-ລາວ ແມ່ນຢູ່ບົນພື້ນຖານແຫ່ງມິດຕະພາບອັນເປັນມູນເຊື້ອທີ່ດີງາມ ແລະ ຄວາມເຄົາລົບນັບຖືເຊິ່ງກັນ ແລະ ກັນ. ຂ້າພະເຈົ້າ ເຊື່ອໝັ້ນວ່າ ດ້ວຍຄວາມພະຍາຍາມຮ່ວມກັນພວກເຮົາ ຈະສືບຕໍ່ເສີມຂະຫຍາຍການເປັນຄູ່ຮ່ວມມືຍຸດທະສາດ, ການຮ່ວມມືສອງຝ່າຍທີ່ສ້າງສັນໃນດ້ານຕ່າງໆ ລະຫວ່າງ ສອງລັດພວກເຮົາ. ອັນນີ້ແນ່ນອນແລ້ວ, ຈະຕອບສະໜອງຜົນປະໂຫຍດຂອງປະຊາຊົນ ຣັດເຊຍ ແລະ ລາວ ແລະ ສອດຄ່ອງກັບແນວທາງແຫ່ງການເສີມສ້າງຄວາມໝັ້ນຄົງ ແລະ ສະຖຽນລະພາບ ຢູ່ໃນຂົງເຂດ ອາຊີ-ປາຊີຟິກ.

ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດທຸກປະການ, ພ້ອມທັງອວຍພອນໃຫ້ປະຊາຊົນລາວ ຈົ່ງມີຄວາມຜາສຸກ ແລະ ຈະເລີນຮຸ່ງເຮືອງ.

          ດ້ວຍຄວາມນັບຖືຢ່າງສູງ,

ວະລາດີເມຽ ປູຕິນ

ກະແລັມແລັງ, ມົດສະກູ

ວັນທີ 2 ທັນວາ 2020.

-----------------------------------------------------------------------------------------------------------------------

ພະນະທ່ານ ທອງລຸນ ສີສຸລິດ

ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ນະຄອນຫຼວງວຽງຈັນ

ພະນະທ່ານ ທອງລຸນ ສີສຸລິດ ທີ່ ນັບຖື,

ຕາງໜ້າລັດຖະບານ ແຫ່ງ ສະຫະພັນ ຣັດເຊຍ ແລະ ໃນນາມສ່ວນຕົວ, ຂ້າພະເຈົ້າຂໍສະແດງຄວາມຊົມເຊີຍມາຍັງ ພະນະທ່ານ ເນື່ອງໃນໂອກາດຄົບຮອບ 45 ປີ ແຫ່ງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ.

ຣັດເຊຍ ແລະ ລາວ ໄດ້ເຊື່ອມໂຍງກັນດ້ວຍການພົວພັນບົນພື້ນຖານແຫ່ງມິດຕະພາບ ແລະ ການເປັນຄູ່ຮ່ວມມື. ຂ້າພະເຈົ້າ ເຊື່ອໝັ້ນວ່າ ການພົວພັນຮ່ວມມືທີ່ມີໝາກຜົນໃນລະດັບລັດຖະບານ, ການເສີມສ້າງການຮ່ວມມືທາງດ້ານການຄ້າ, ເສດຖະກິດ, ວິທະຍາສາດ, ເຕັກນິກ, ວັດທະນະທໍາ ແລະ ມະນຸດສະທໍາ, ການສົ່ງເສີມໂຄງການຮ່ວມມືອັນໃໝ່ນໍາກັນ ຈະຕອບສະໜອງຜົນປະໂຫຍດຂອງສອງປະເທດພວກເຮົາ.

ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ ແລະ ປະສົບຜົນສຳເລັດອັນໃໝ່ ໃນພາລະກິດອັນສູງສົ່ງຂອງຕົນ ແລະ ຂໍອວຍພອນໃຫ້ປະຊາຊົນລາວ ຈົ່ງມີຄວາມຜາສຸກ ແລະ ຈະເລີນຮຸ່ງເຮືອງ.

          ດ້ວຍຄວາມນັບຖືຢ່າງສູງ,

ມິຄາອິລ ມິດຊຸສຕິນ

ມົດສະກູ,

ວັນທີ 2 ທັນວາ 2020.
-----------------------------------------------------------------------------------------------------------------------

ພະນະທ່ານ ສະເຫຼີມໄຊ ກົມມະສິດ

ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ນະຄອນຫຼວງວຽງຈັນ

ພະນະທ່ານ ລັດຖະມົນຕີ ທີ່ ນັບຖື ແລະ ສະຫາຍ ທີ່ຮັກແພງ,

ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈມາຍັງ ພະນະທ່ານ ເນື່ອງໃນໂອກາດຄົບຮອບ 45 ປີ ແຫ່ງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ.

ພວກຂ້າພະເຈົ້າ ມີຄວາມເພິ່ງພໍໃຈທີ່ເຫັນວ່າ ສາຍພົວພັນ ຣັດເຊຍ-ລາວ ໄດ້ຮັບການພັດທະນາໃນທາງບວກຢ່າງຕໍ່ເນື່ອງ, ມີການຮ່ວມມືທີ່ໄວ້ວາງໃຈກັນໄດ້ໃນເວທີສາກົນ. ພວກຂ້າພະເຈົ້າ ມີຄວາມມຸ່ງໝັ້ນທີ່ຈະສືບຕໍ່ການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດ ລະຫວ່າງ ຣັດເຊຍ ແລະ ສປປ ລາວ ເພື່ອຜົນປະໂຫຍດແຫ່ງການຮັບປະກັນສະຖຽນລະພາບ ແລະ ຄວາມຈະເລີນຮຸ່ງເຮືອງຢູ່ໃນຂົງເຂດອາຊີຕາເວັນອອກສຽງໃຕ້ ແລະ ຂົງເຂດອາຊີ-ປາຊີຟິກ ໂດຍລວມ.

ຂ້າພະເຈົ້າ ຂໍອວຍພອນໃຫ້ ພະນະທ່ານ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດອັນໃໝ່ໃຫຍ່ຫຼວງກ່ວາເກົ່າ.

          ດ້ວຍຄວາມນັບຖືຢ່າງສູງ,

ເຊເກຣ ລາວະຣົບ

ມົດສະກູ,

ວັນທີ 2 ທັນວາ 2020.