ສະຫາຍ ເລ ຮວ່າຍ ຈູງ ທີ່ນັບຖື,
ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ແລະ ຂໍສະແດງຄວາມຊົມເຊີຍຢ່າງຈິງໃຈມາຍັງ ສະຫາຍໃນໂອກາດ ທີ່ສະຫາຍ ໄດ້ຮັບການແຕ່ງຕັ້ງ ເປັນຫົວຫນ້າຄະນະພົວພັນຕ່າງປະເທດ ສູນກາງພັັກກອມມູນິດ ຫວຽດນາມ, ສິ່ງດັ່ງກ່າວ ໄດ້ຢັ້ງຢືນ ແລະ ສະແດງໃຫ້ເຫັນເຖິງຄວາມເຊື່ອໝັ້ນ ຂອງກົມການເມືອງສູນກາງພັກ ກໍ່ຄື ລັດຖະບານ ແຫ່ງ ສສ ຫວຽດນາມ ຕໍ່ຄວາມສາມາດ, ບົດບາດໃນການຊີ້ນໍາ-ນໍາພາ ແລະການປະກອບສ່ວນອັນສໍາຄັນ ແລະ ມີປະສິດທິຜົນ ຂອງສະຫາຍ ຕະຫຼອດໄລຍະຜ່ານມາ ທັງໃນຂອບສອງຝ່າຍ ແລະ ຫຼາຍຝ່າຍ ໃນເວທີພາກພື້ນ ແລະ ສາກົນ ພິເສດ ແມ່ນໃນການຊຸກຍູ້ການຮ່ວມມືລະຫວ່າງ ລາວ-ຫວຽດນາມ ໂດຍສະເພາະແມ່ນ ວຽກງານຊາຍແດນ ລະຫວ່າງສອງປະເທດ.
ຂ້າພະເຈົ້າ ເຊື່ອໝັ້ນຢ່າງໜັກແໜ້ນວ່າ, ດ້ວຍຄວາມສາມາດ ແລະ ປະສົບການອັນອຸດົມສົມບູນ, ສະຫາຍ ຈະສືບຕໍ່ຍາດໄດ້ຜົນສໍາເລັດອັນໃໝ່ ແລະ ຍິ່ງໃຫຍ່ກວ່າເກົ່າໃນໜ້າທີ່ໃໝ່ອັນສໍາຄັນ ແລະ ສູງສົ່ງ ທີ່ພັກກອມມູນິດຫວຽດນາມ ໄດ້ມອບໝາຍໃຫ້ກໍ່ຄືການ ສືບຕໍ່ເອົາໃຈໃສ່ປະກອບສ່ວນເຂົ້າໃນການເພີ່ມທະວີ ແລະເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງປະເທດ ລາວ-ຫວຽດນາມ ໃຫ້ຈະເລີນງອກງາມຍິ່ງໆຂື້ນ.
ອວຍພອນໃຫ້ສະຫາຍ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສໍາເລັດໃໝ່ ໃຫຍ່ຫຼວງກວ່າເກົ່າ ໃນໜ້າທີ່ອັນມີກຽດຂອງຕົນ.
ຮຽນມາຍັງສະຫາຍດ້ວຍຄວາມນັບຖື ແລະ ຮັກແພງ.
ນະຄອນຫຼວງວຽງຈັນ, ວັນທີ 19 ມີນາ 2021
ສະເຫຼີມໄຊ ກົມມະສິດ
ລັດຖະມົນຕີກະຊວງການຕ່າງປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ສະຫາຍ ເລ ຮວ່າຍ ຈຸງ,
ກຳມະການສູນກາງພັກ,
ຫົວຫນ້າຄະນະພົວພັນຕ່າງປະເທດ ສູນກາງພັກກອມມູນິດ ຫວຽດນາມ
ທີ່ນະຄອນຫຼວງຮ່າໂນ້ຍ.
---------//---------