ນະຄອນຫລວງ​ວຽງ​ຈັນ, ວັນທີ     ມິຖຸນາ 2021

ພະນະທ່ານ,

​​​​    ຂ້າພະເຈົ້າ ຂໍສະແດງຄວາມຊົມເຊີຍ ຢ່າງຈິງໃຈມາຍັງ ພະນະທ່ານ ເນື່ອງໃນ​ໂອກ​າດ ທີ່​ໄດ້​ຮັບການ​ເລືອກຕັ້ງ ໃຫ້ດຳລົງ​ຕໍາ​ແໜ່​ງ​ເປັນປະທານາທິບໍດີ ​ແຫ່ງ ມົງໂກລີ ຄົນໃໝ່.

            ຂ້າພະເຈົ້າ ມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງສອງປະເທດພວກເຮົາ ໄດ້ຮັບການເສີມຂະຫຍາຍຢ່າງຕໍ່ເນື່ອງຕະຫຼອດໄລຍະທີ່ຜ່ານມາ. ຂ້າພະເຈົ້າ ມີຄວາມຍິນດີທີ່ຈະຮ່ວມມືຢ່າງໃກ້ຊິດກັບ ພະນະທ່ານ ເພື່ອສືບຕໍ່ເສີມຂະຫຍາຍການຮ່ວມມືທີ່ມີຢູ່ເເລ້ວໃຫ້ເເຕກດອກອອກຜົນຍິ່ງໆຂຶ້ນໃນຊຸມປີຕໍ່ໜ້າ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ທັງເປັນການປະກອບສ່ວນເຂົ້າໃນພາລະກິດເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ພາກພື້ນ ແລະ ໃນໂລກ.

            ຂ້າພະເຈົ້າ ຂໍຖືໂອກາດນີ້ ອວຍພອນໄຊອັນປະເສີດ ມາຍັງພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ອວຍພອນໃຫ້ ປະຊາຊົນມົງໂກລີ ເພື່ອນມິດ ຈົ່ງມີຄວາມຈະເລີນກ້າວໜ້າຍິ່ງໆຂຶ້ນ.

     ດ້ວຍຄວາມນັບຖືຢ່າງສູງ,

                                                                      ທອງລຸນ ສີສຸລິດ

                                                                        ປະທານປະເທດ

                                                   ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ UKHNAAGIIN KHURELSUKH

ປະທານາທິບໍດີ ແຫ່ງ ມົງໂກລີ

ທີ່ ນະຄອນຫລວງ ອູລານບາຕໍ