ໃນຕອນບ່າຍຂອງ ວັນທີ 17 ມີນາ 2022, ທີ່ ໂຮງແຮມ ລາວພລາຊາ, ສະຖາບັນການຕ່າງປະເທດ ກະຊວງການຕ່າງປະເທດ ແລະ ສຳນັກງານສະຫະພາບເອີຣົບ ປະຈໍາ ສປປ ລາວ ໄດ້ເປັນເຈົ້າພາບຮ່ວມ ໃນການຈັດກອງປະຊຸມສຳມະນາ ໃນຮູບແບບເຊິ່ງໜ້າ ແລະ ທາງໄກ ພາຍໃຕ້ຫົວຂໍ້: “ຍຸດທະສາດຂອງອີຢູ ຕໍ່ການຮ່ວມມືໃນພາກພື້ນ ອິນໂດ-ປາຊີຟິກ” ຫລື “EU Strategy for Cooperation in the Indo-Pacific”. ໃຫ້ກຽດເຂົ້າຮ່ວມ ແລະ ກ່າວເປີດກອງປະຊຸມ ໂດຍ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ນາງ Ina MARCIULIONYTE, ​​ເອກ​ອັກຄະ​ລັດຖະທູດ​ ແຫ່ງ ​ສະຫະພາບ ​ເອີຣົບ ປະຈຳ ສປປ ​ລາວ.

ໃນໄລຍະ​ຜ່ານ​ມາ,  ສະ​ຫະພາບເອຣົບ​ ​​ເປັນ​ອົງການໜຶ່ງທີ່ມີ​ບົດບາດ​ສຳ​ຄັນ ໃນການສະໜອງ​ດ້ານທຶນຮອນ ເພື່ອຊ່ວຍ​ເຫຼືອ​ແກ່ ສປປ ລາວ ​ໃນການ​ປັບປຸງຄຸນນະພາບ​ ແລະ ຊີວິດການ​ເປັນ​ຢູ່ຂອງ​ປະຊາຊົນ​​, ສ້າງຄວາມອາດສາມາດ ແລະ ໃຫ້ການຊ່ວຍເຫຼືອ ສປປ ລາວ ໃນການຮັບມືກັບການແຜ່ລະບາດຂອງເຊື້ອພະຍາດ ໂຄວິດ 19. ເພື່ອສືບຕໍ່ຜັນຂະຫຍາຍຂອບການຮ່ວມມືໃນດ້ານຕ່າງໆ ລະຫວ່າງ ສປປ ລາວ ແລະ ອີຢູ ໃຫ້ມີຄວາມແໜ້ນແຟ້ນຂື້ນກວ່າເກົ່າ. ດັ່ງນັ້ນ, ສະຖາບັນການຕ່າງປະເທດ ແລະ ສຳນັກງານ ສະຫະພາບ ເອີຣົບ ປະຈໍາ ສປປ ລາວ ຈຶ່ງຕົກລົງເຫັນດີຈັດກອງປະຊຸມສຳມະນາຮ່ວມກັນ, ເຊິ່ງຈຸດປະສົງຂອງກອງປະຊຸມສຳມະນາໃນຄັ້ງນີ້ ແມ່ນເພື່ອຮັບຟັງການເຜີຍແຜ່ ແລະ ສ້າງຄວາມເຂົ້າອົກເຂົ້າໃຈ ໃຫ້ແກ່ ສປປ ລາວ ໃນການກຳນົດຍຸດທະສາດຂອງ ອີຢູ ຕໍ່ ພາກພື້ນ ອິນໂດ-ປາຊີຟິກ, ເຊິ່ງຍຸດທະສາດດັ່ງກ່າວໄດ້ເນັ້ນໜັກໃສ່ ການສົ່ງເສີມການລົງທຶນລະຫວ່າງ ອີຢູ ກັບບັນດາປະເທດໃນພາກພື້ນ ອິນໂດ-ປາຊີຟິກ, ການເຊື່ອມໂຍງເຊື່ອມຈອດ, ການຮັກສາສັນຕິພາບ ແລະ ສະຖຽນລະພາບ ແລະ ການຮ່ວມມືໃນການແກ້ໄຂບັນຫາທີ່ມີຜົນກະທົບຕໍ່ສິ່ງແວດລ້ອມ ໂດຍສະເພາະແມ່ນ ການປ່ຽນແປງຂອງສະພາບດິນຟ້າອາກາດ. ນອກຈາກນີ້, ກໍ່ເພື່ອເປີດໂອກາດໃຫ້ຝ່າຍ ລາວ ແລະ ອີຢູ ໄດ້ແລກປ່ຽນຄຳຄິດເຫັນ ໃນການຊຸກຍູ້ ແລະ ສົ່ງເສີມການຮ່ວມມື ລະຫວ່າງ ສປປ ລາວ ແລະ ອີຢູ ໃຫ້ມີຄວາມແໜ້ນແຟ້ນຂື້ນກວ່າເກົ່າ.

ກອງປະຊຸມສໍາມະນາດັ່ງກ່າວ ດໍາເນີນໄປຢ່າງມີບັນຍາກາດ ໂດຍມີຜູ້ໃຫ້ຄວາມສົນໃຈເຂົ້າຮ່ວມກອງປະຊຸມສຳມະນາດັ່ງກ່າວ ທັງແບບເຊິ່ງໜ້າ ແລະ ຜ່ານທາງອອນລາຍ ຈຳນວນຫຼາຍກວ່າ 50 ທ່ານ ແລະ  ກອງປະຊຸມສໍາມະນາໃນຄັ້ງນີ້ ມີຄວາມໝາຍຄວາມສຳຄັນ ໃນການສ້າງຄວາມເຂົ້າອົກເຂົ້າໃຈ ກ່ຽວກັບ ຍຸດທະສາດ ແລະ ບົດບາດຂອງອີຢູ ຕໍ່ ພາກພື້ນ ອິນໂດ-ປາຊີຟິກ. ນອກຈາກນີ້ ກໍ່ເພື່ອສືບຕໍ່ສົ່ງເສີມ ການຮ່ວມມືໃນດ້ານຕ່າງໆ  ລະຫວ່າງ ສປປ ລາວ ແລະ ອີຢູ ໃຫ້ປະກົດຜົນເປັນຈິງ ແລະ ນຳເອົາຜົນປະໂຫຍດສູງສຸດມາໃຫ້ແກ່ປະຊາຊົນລາວ ແລະ ອີຢູ.