​    ໃນວັນ​ທີ 14 ກັນຍາ 2016, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Daniel A. Clune, ເອກອັກຄະລັດຖະທູດ ແຫ່ງ ສະຫະລັດ ອາເມລິກາ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ, ເພື່ອອໍາລາກັບຄືນປະເທດ ພາຍຫຼັງທີ່ທ່ານ ໄດ້ສຳເລັດການປະຕິບັດໜ້າທີ່ການທູດປະຈຳຢູ່ ສປປ ລາວ.

ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ກ່າວຍ້ອງຍໍຊົມເຊີຍທ່ານເອກອັກຄະລັດຖະທູດ ສະຫະລັດ ອາເມລິກາ ທີ່ໄດ້ເຄື່ອນໄຫວຢ່າງຫ້າວຫັນໃນການປະຕິບັດໜ້າທີ່ຕະຫຼອດໄລຍະເວລາ 3 ປີ ເພື່ອປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມືສອງຝ່າຍ, ພິເສດແມ່ນໃນການດຳ​ເນີນການຢ້ຽມຢາມຄັ້ງປະຫວັດສາດ ຂອງ ປະທານາທິບໍດີ ບາຣັກ ໂອບາມາ ແຫ່ງ ສະຫະລັດ ອາເມລິກາ ຢູ່ ສປປລາວ ທີ່ໄດ້ເປັນການເປີດສັງກາດໃໝ່ ທັງເປັນນິມິດໝາຍອັນດີ ໃຫ້ແກ່ການເພີ້ມທະວີ ການພົວພັນຮ່ວມມືລະຫວ່າງ ສອງປະເທດ ແລະ ປະຊາຊົນສອງຊາດ ລາວ-ອາເມລິກາ ໃນອະນາຄົດ. ໃນໂອກາດນີ້, ທ່ານ ສະເຫຼີມໄຊ ກົມມະສິດ, ລັດ​ຖະມົນ​ຕີ​ກະຊວງການຕ່າງປະເທດ ໄດ້ອວຍໄຊໃຫ້ພອນທ່ານເອກອັກຄະລັດຖະທູດ ຈົ່ງເດີນທາງກັບຄືນປະ​ເທດ​ດ້ວຍ​ຄວາມ​ສະ​ຫວັດດີພາບ ແລະ ປະສົບຜົນສຳເລັດທຸກປະການ ໃນອະນາຄົດຕໍ່ໄປ.