ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງການຕ່າງປະເທດ ໄດ້ຈັດກອງປະຊຸມສຳມະນາຂຶ້ນໃນຕອນເຊົ້າຂອງວັນທີ 13 ມີນາ 2018, ທີ່ ຫ້ອງປະຊຸມ ກະຊວງການຕ່າງປະເທດ ພາຍໃຕ້ຫົວຂໍ້ ການຮັກສາສຸຂະພາບໄວຈະເລີນພັນ, ໂດຍພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ, ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງການຕ່າງປະເທດ, ມີຄະນະກົມ, ຄະນະພະແນກ ແລະ ພະນັກງານວິຊາການທັງຍິງ ແລະ ຊາຍ ຈາກບັນດາກົມພາຍໃນກະຊວງເຂົ້າຮ່ວມ 300 ກວ່າທ່ານ.
ໃນໂອກາດກ່າວເປີດກອງປະຊຸມ ທ່ານ ທອງຜ່ານ ສະຫວັນເພັດ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງການຮັກສາສຸຂະພາບຮ່າງກາຍ ໂດຍສະເພາະແມ່ຍິງທີ່ກຽມພ້ອມຈະຖືພາ ແລະ ແມ່ຍິງທີ່ກຳລັງຖືພາເອງ ກໍຫຍິ່ງຈຳເປັນຕ້ອງໃຫ້ການເອົາໃຈໃສ່ເບິ່ງແຍງສຸຂະພາບໃຫ້ແຂງແຮງ. ຄຽງຄູ່ກັບການເບິ່ງແຍງຕົນເອງ ເພດຊາຍໂດຍສະເພາະຜູ້ທີ່ເປັນພໍ່ ເປັນເພື່ອຮ່ວມງານກໍຈຳເປັນຕ້ອງເອົາໃຈໃສ່ ປະຕິບັດຕໍ່ແມ່ຍິງໃຫ້ຖືກຕ້ອງ ເພື່ອຮັບປະກັນທາງດ້ານສຸຂະພາບຂອງພວກເຂົາ ແລະ ຫຼຸດຜ່ອນຄວາມສ່ຽງທີ່ເປັນອັນຕະລາຍ ຫຼື ຜົນກະທົບຕໍ່ສຸຂະພາບຂອງແມ່ ແລະ ເດັກ ທີ່ອາດເກີດຂຶ້ນ. ສະພາບປະຈຸບັນເຫັນໄດ້ວ່າ ບັນຫາສັງຄົມທີ່ເກີດຂຶ້ນຫຼາຍກວ່າໝູ່, ໜຶ່ງໃນນັ້ນ ແມ່ນສາເຫດມາຈາກຄວາມບໍ່ພ້ອມໃນການເປັນພໍ່-ແມ່ ເຊິ່ງເປັນສາເຫດພື້ນຖານໃນການສ້າງບັນຫາສັງຄົມໃນຕົວ.
ກອງປະຊຸມໃນຄັ້ງນີ້ ຜູ້ເຂົ້າຮ່ວມໄດ້ຮັບຟັງການບັນຍາຍເອກະສານກ່ຽວກັບ ວຽກງານບົດບາດຍິງ-ຊາຍ ແລະ ການວາງແຜນຄອບຄົວ, ການຮັກສາສຸຂະພາບຂອງແມ່ຍິງໃນໄລຍະຖືພາແຕ່ 01-09 ເດືອນ ແລະ ການດູແລສຸຂະພາບເດັກລຸ່ມ 01 ປີ ບັນຍາຍໂດຍວິທະຍາກອນຈາກ ສູນສຸຂະພາບແມ່ ແລະ ເດັກ, ກະຊວງສາທາລະນະສຸກ. ນອກຈາກນີ້, ຜູ້ເຂົ້າຮ່ວມຍັງໄດ້ສົນທະນາ ແລະ ແລກປ່ຽນຄຳຄິດຄຳເຫັນ ກ່ຽວກັບປະສົບການໃນການດູແລຕົນເອງ ແລະ ສະມາຊິກໃນຄອບຄົວ ຮ່ວມກັນຢ່າງມີບັນຍາກາດຟົດຟື້້ນ.