ໃນ​ວັນ​ທີ 20 ກຸມ​ພາ 2019, ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ທັງ​ເປັນຫົວ​ໜ້າ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງ ສ​ປ​ປ ລ​າວ ໄດ້​ນໍາ​ພາ​ຄະ​ນະ​ຜູ້​ແທນ​ລາວ ເຂົ້າ​ຮ່ວມກອງ​ປະ​ຊຸມ​ເຈົ້າ​ໜ​້າ​ທີ່​ອາ​ວຸ​ໂສ ອາ​ຊຽນ-ລັດ​ເຊຍ ຄັ້ງ​ທີ 16 ທີ່ ບາ​ຫຼີ, ອິນ​ໂດ​ເນ​ເຊຍ ພາຍ​ໃຕ້​ການ​ເປັນ​ປະ​ທານ​ຮ່ວມ​ ຂອງ ທ່ານ ໂຮ​ເຊ ທາ​ວາ​ເຣັ​ສ, ຫົວ​ໜ້າເຈົ້າ​ໜ້າ​ທີ່​ອາ​ວຸ​ໂສອາ​ຊຽນ ຂອງ ອິນ​ໂດ​ເນ​ເຊຍ ແລະ ທ່ານ ອີ​ກໍ ມໍ​ກູ​ລອບ, ຮອງ​ລັດ​ຖະ​ມົນ​ຕີກ​ະ​ຊວງ​ການ​ຕ່າງ​ປະ​ເທດ ທັງ​ເປັນ​ຫົວ​ໜ້າເຈົ້າ​ໜ້າ​ທີ່​ອາ​ວຸ​ໂສອາ​ຊຽນ ຂອງ ສະ​ຫະ​ພັນ ລັດ​ເຊຍ.

ກອງ​ປະ​ຊຸມ ໄດ້​ທົບ​ທວນ​ຄືນ​ຄວາມ​ຄືບ​ໜ້າ​ຂອງ​ການ​ຮ່ວມ​ມື​ ອາ​ຊຽນ-ລັດ​ເຊຍ ໃນ​ໄລ​ຍະ​ໜຶ່ງ​ປີ​ຜ່ານ​ມາ ​ໂດຍ​ສະ​ເພາະ ການ​ຜັນ​ຂະ​ຫຍາຍ​ ຜົນກອງ​ປະ​ຊຸມ​ສຸດຍອດ ອາ​ຊຽນ-ລັດ​ເຊຍ ຄັ້ງ​ທີ 3 ໃນ​ເດືອນພະ​ຈິກປີ 2018 ທີ່ສິງ​ກະ​ໂປ ເປັນ​ຕົ້ນ​ແມ່ນການຍົກ​ລະ​ດັບການ​ພົວ​ພັນ ​ອາ​ຊຽນ-ລັດ​ເຊຍ ຂຶ້ນ​ເປັນ​ຄູ່​ຮ່ວມຍຸດ​ທະ​ສາດ​, ຖະ​ແຫຼງ​ການ​ຮ່ວມອາ​ຊຽນ-ລັດ​ເຊຍ ວ່າ​ດ້ວຍ ການ​ເປັນ​ຄູ່​ຮ່ວມ​ຍຸດ​ທະ​ສາດ, ຖະ​ແຫຼງ​ການ​ອາ​ຊຽນ-ລັດ​ເຊຍ ວ່າ​ດ້ວຍ ການ​ຮ່ວມ​ມື​ດ້ານ​ຄວາມ​ໝັ້ນ​ຄົງ ແລະ ການ​ນຳ​ໃຊ້​ເຕັກ​ໂນ​ໂລ​ຊີຂໍ້​ມູນ​ຂ່າວ​ສານ ແລະ ​ບົດ​ບັນ​ທຶກ​ຄວາມ​ເຂົ້າ​ໃຈ ລະ​ຫວ່າງ​ ອາ​ຊຽນ ແລະ ຄະ​ນະ​ກຳ​ມ​ທິ​ການ​ອົງ​ການ​ຮ່ວມ​ມື​ເສດ​ຖະ​ກິດ​ຢູ​ເຣ​ເຊຍ ເພື່ອ​ສົ່ງ​ເສີມ​ການ​ຮ່ວມ​ມື​ດ້ານ​ເສດ​ຖະ​ກິດ. ກອງ​ປະ​ຊຸມໄດ້​ສະ​ແດງ​ຄວາມ​ເພີ່ງ​ພໍ​ໃຈ​ ຕໍ່​ຄວາມ​ຄືບ​ໜ້າ​ຂອງການ​ຈັດ​ຕັ້ງ​ປະ​ຕິດ​ບັດ​ ແຜນ​ປະ​ຕິ​ບັດງານອາ​ຊຽນ-ລັດ​ເຊຍ ສຳ​ລັບ​ປີ 2016-2020 ​​ທີ່ກວມ​ເອົາ​ຂົງ​ເຂດ​ການ​ເມືອງ-ຄວາມ​ໝັ້ນ​ຄົງ, ເສດ​ຖະ​ກິດ ແລະ ວັດ​ທະ​ນະ​ທຳ-ສັງ​ຄົມ ເປັນ​ຕົ້ນ​ແມ່ນ​ ດ້ານການ​ຕ້ານ​ການ​ກໍ່​ການ​ຮ້າຍ ແລະ ອາ​ຊະ​ຍາ​ກຳ​ຂ້າມຊ​າ​ດ, ​ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ, ພະ​ລັງ​ງານ, ກະ​ສິ​ກຳ, ການ​ຄຸ້ມ​ຄອງ​ໄພ​ພິ​ບັດທຳ​ມະ​ຊາດ, ການ​ສຶກ​ສາ, ກ​ານ​ແລກ​ປ່ຽນ​ທາງວັດ​ທະ​ນາ​ທຳ ແລະ ການໄປ​ມາ​ຫາ​ສູ່ລະ​ຫວ່າງປະ​ຊາ​ຊົນ. ກອງ​ປະ​ຊ​ຸມ ໄດ້​​ເຫັນ​​ດີ​ເພີ່ມ​ທະ​ວີ​ການ​ຮ່ວມມື​ທີ່​ເປັນ​ຮູ​ບ​ປະ​ທຳໃນ​ຂົງ​ເຂດ​ຕ່າງໆທີ່​ມີ​ຄວາມ​ສົນ​ໃຈ ແລະ ທ່າ​ແຮງ​ຮ່ວມ​ກັນ ເຊັ່ນ: ການ​ພັດ​ທະ​ນາ​ຕົວ​ເມືອງ​ອັດ​ສະ​ລິ​ຍະ, ການ​ແລກ​ປ່ຽນກ່ຽວ​ກັບຄວາມ​ໝັ້ນ​ຄົງ ແລະ ການ​ນຳ​ໃຊ້ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ, ການ​ສຶກ​ສາ, ​ການ​ສົ່ງ​ເສີມ​ການ​ຮ່ວມ​ມື ລະ​ຫວ່າງ ອາ​ຊຽນ ແລະ ສະ​ຫະ​ພັນຢູ​ເຣ​ເຊຍ ເພື່ອ​ການ​ຮ່ວມ​ມື​ດ້ານ​ເສດ​ຖະ​ກິດ ແລະ ການ​ຮ່ວມ​ມື ລະ​ຫວ່າງ​ ອາ​ຊຽນ ແລະ ອົງ​ການ​ຮ່ວມ​ມື​ຊຽງ​ໄຮ ແລະ ອື່ນໆ.

​ໃນ​ໂອ​ກາດ​ນີ້, ກອງ​ປະ​ຊຸມ​​ໄດ້​ແລກ​ປ່ຽນ​ຄຳ​ຄິດ​​ເຫັນ ກ່ຽວ​ກັບ ບັນ​ຫາ​ພາກ​ພື້ນ ແລະ ສາ​ກົນທີ່​ມີ​ຄວາມ​ສົນ​ໃຈ​ຮ່ວມ​ກັນເປັນ​ຕົ້ນ​ແມ່ນ​: ​ການ​ຮ່ວມ​ມື​ຫຼາຍ​ຝ່າຍ, ​ການສ້າງ​ຄວາມ​ເຂັ້ມ​ແຂງ​ໃຫ້​ແກ່​ໂຄງ​ສ້າງ​ຄວາມ​ໝັ້ນ​ຄົງພາກ​ພື້ນ, ການ​ບໍ່​ແຜ່​ຜາຍອາ​ວຸດ​ນິວ​ເຄ​ລຍ ແລະ ສະ​ພາບ​ການ​ໃນ​ແຫຼມ​ເກົາຫຼີ. ນອກ​ນີ້, ກອງ​ປະ​ຊຸ​ມ​ຍັງ​ໄດ້​ກະ​ກຽມ​ໃຫ້​ແກ່ກອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ ​ອາ​ຊຽນ-ລັດ​ເຊຍ​ຊຶ່ງຈະ​ຈັດ​ຂຶ້ນ​ໃນ​ທ້າຍ​ເດືອນ​ກໍ​ລະ​ກົດ 2019 ທີ່ບາງກອກ, ປະ​ເທດໄທ.