ໃນຕອນເຊົ້າ ວັນທີ 22 ​ມິຖຸນາ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງສປປລາວໄດ້ນຳພາຄະນະເຂົ້າຮ່ວມກອງ​ປະ​ຊຸມ​ເຈົ້າ​ໜ້າ​ທີ່ອາ​ວຸ​ໂສ ອາ​ຊຽນບວກ​ສາມ (ຈີນ, ສ. ເກົາຫຼີ, ຍີ່ປຸ່ນ) ແບບທາງໄກ ພາຍໃຕ້ການເປັນປະທານຂອງບຣູໄນ. ເຂົ້າຮ່ວມໃນກອງປະຊຸມຄັ້ງນີ້ມີບັນດາເຈົ້າໜ້າທີ່ອາວຸໂສອາຊຽນບວກສາມ,ຮອງເລຂາທິການໃຫ່ຍອາຊຽນ ແລະ ວິຊາການທີ່ກ່ຽວຂ້ອງຈໍານວນໜຶ່ງ

.

          ຈຸດປະສົງລະດັບຄາດໝາຍຂອງກອງປະຊຸມຄັ້ງນີ້ ແມ່ນເພື່ອກະກຽມທັງທາງດ້ານເນື້ອໃນ ແລະ ພະລາທິການ ໃຫ້ແກ່ກອງປະຊຸມ ລັດຖະມົນຕີອາຊຽນບວກສາມ ຄັ້ງທີ 22 ແລະ ກອງປະຊຸມສຸດຍອດອາຊຽນບວກສາມ ທີ່ຈະມີຂຶ້ນໃນຕົ້ນເດືອນສິງຫາ 2021 ແລະ ທ້າຍເດືອນຕຸລາ 2021 ຕາມລຳດັບ. ຄຽງຄູ່ກັບການກະກຽມໃຫ້ແກ່ທັງສອງກອງປະຊຸມດັ່ງກ່າວ, ກອງປະຊຸມລະດັບເຈົ້າໜ້າທີ່ອາວຸໂສຄັ້ງນີ້ຍັງໄດ້ຕີລາຄາສູງ ຕໍ່ຄວາມຄືບໜ້າໃນການຈັດຕັ້ງປະຕິບັດ ການຮ່ວມມືອາຊຽນບວກສາມໄລຍະຜ່ານມາໂດຍສະເພາະ ການຜັນຂະຫຍາຍຜົນກອງປະຊຸມສຸດຍອດອາຊຽນບວກສາມ ວ່າດ້ວຍການຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ລວມທັງການຟື້ນຟູເສດຖະກິດຫຼັງໂຄວິດ-19 ໃນເດືອນເມສາ 2020 ຜ່ານມາ; ການຈັດຕັ້ງປະຕິບັດແຜນປະຕິບັດງານອາຊຽນບວກສາມ ສຳລັບໄລຍະ 2018-2022; ແລະ ການ​ຈັດ​ຕັ້ງ​ປະ​ຕິ​ບັດ ບັນ​ດາ​ຂໍ້​ສະ​ເໜີ​ແນະ​ຂອງ​ໜ່ວຍ​ງານ​ວິ​ໄສ​ທັດ​ອາ​ຊີ​ຕາ​ເວັນ​ອອກ II (EAVG II).

          ສຳລັບທິດທາງການຮ່ວມມືໃນຕໍ່ໜ້າ, ກອງປະຊຸມ ໄດ້ເຫັນດີ ສືບຕໍ່ຮ່ວມມື ໃນຂະແໜງການສາທາລະນະສຸກ ໂດຍສະເພາະ ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ລວມທັງ ການຄົ້ນຄວ້າພັດທະນາ ຢາປົວພະຍາດ ກໍ່ຄື ຢາວັກແຊັງຕ້ານໂຄວິດ19 ແລະ ການຮັບປະກັນ ໃນການເຂົ້າເຖິງ ຢາວັກແຊັງຕ້ານໂຄວິດ-19 ຢ່າງເທົ່າທຽມ ຜ່ານໂຄງການໂຄແວັກ (COVAX); ຮ່ວມມືກັນເພື່ອຟື້ນຟູ ເສດຖະກິດຮອບດ້ານ; ການປຶກສາຫາລື ໃນການເປີດຊ່ອງທາງພິເສດການເດີນທາງນຳກັນ ທ່າມກາງການແຜ່ລະບາດພະຍາດໂຄວິດ-19; ການສືບຕໍ່ຈັດຕັ້ງປະຕິບັດ ແຜນແມ່ບົດ ການເຊື່ອມຈອດອາຊຽນ ຮອດປີ 2025 (MPAC 2025); ການຈັດຕັ້ງປະຕິບັດ ແຜນປະຕິບັດງານ ການເຊື່ອມໂຍງອາຊຽນ ຫຼື ໄອເອໄອ ສະບັບທີ 4 (20212025); ການຫັນເປັນເສດຖະກິດດີຈີຕອນ ໂດຍສຸມໃສ່ສົ່ງເສີມ ຈຸລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງ (MSMEs) ເພື່ອໃຫ້ສາມາດເຮັດທຸລະກິດທາງເອເລັກໂຕຼນິກຮ່ວມກັນໄດ້; ການພັດທະນາແບບຍືນຍົງ ລວມທັງການຮ່ວມມືພາຍໃຕ້ເຄືອຂ່າຍ ຕົວເມືອງອັດສະລິຍະອາຊຽນ.

          ໃນໂອກາດນີ້, ກອງປະຊຸມຍັງໄດ້ປືກສາຫາລືແລະແລກປ່ຽນຄວາມຄິດເຫັນຕໍ່ບັນຫາພາກພື້ນແລະສາກົນທີ່ຕ່າງຝ່າຍມີຄວາມສົນໃຈຮ່ວມກັນເພື່ອປະກອບສ່ວນເຂົ້າໃນການຮັກສາສັນຕິພາບແລະຄວາມໝັ້ນຄົງໃນພາກພື້ນ.