ໃນຕອນແລງ ວັນທີ 24 ມິຖຸນາ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດໄດ້ນຳພາຄະນະຜູ້​ແທນ​ລາວເຂົ້າຮ່ວມກອງ​ປະ​ຊຸມ​ເຈົ້າ​ໜ້າ​ທີ່ອາ​ວຸ​ໂສຂອງ ກອງປະຊຸມສຸດຍອດອາຊີຕາເວັນອອກ (EASSOM) ແບບທາງໄກ ພາຍໃຕ້ການເປັນປະທານຂອງບຣູໄນ ດາຣຸຊາລາມ. ເຂົ້າຮ່ວມໃນກອງປະຊຸມຄັ້ງນີ້ມີບັນດາເຈົ້າໜ້າທີ່ອາວຸໂສຈາກ 18 ປະເທດຜູ້ເຂົ້າຮ່ວມກອງປະຊຸມສຸດຍອດອາຊີຕາເວັນອອກ, ຮອງເລຂາທິການໃຫ່ຍອາຊຽນແລະວິຊາການທີ່ກ່ຽວຂ້ອງຈໍານວນໜຶ່ງ.

ກອງປະຊຸມໄດ້ຕີລາຄາສູງແລະຮັບຊາບສະພາບການຮ່ວມມືຂອງ ກອງປະຊຸມສຸດຍອດອາຊີຕາເວັນອອກ ໃນໄລຍະຜ່ານມາໂດຍສະເພາະຄວາມຄືບໜ້າຂອງ​ການ​ຈັດຕັ້ງປະຕິບັດແຜນປະຕິບັດງານມະນິລາເພື່ອຜັນຂະຫຍາຍ ຖະແຫຼງການພະນົມເປັນ ວ່າດ້ວຍຂໍ້ລິເລີ່ມການຮ່ວມມືໃນຂອບກອງປະຊຸມສຸດຍອດອາຊີຕາເວັນອອກ (2018-2022) ກໍ່ຄືການຜັນຂະຫຍາຍຜົນຂອງກອງປະຊຸມສຸດຍອດ ອາຊີຕາເວັນອອກ ຄັ້ງທີ 15. ພ້ອມນີ້, ກອງປະຊຸມຍັງໄດ້ປຶກສາຫາລືທິດທາງແຜນການຮ່ວມມືໃນຕໍ່ໜ້າເປັນຕົ້ນຢ້ຳຄືນຄຳໝາຍໝັ້ນຈະສືບຕໍ່ຮ່ວມມືກັນໃນການສະກັດກັ້ນ, ເຝົ້າລະວັງ, ຄວບຄຸມແລະແກ້ໄຂບັນຫາການແຜ່ລະບາດຂອງພະຍາດໂຄວິດ-19 ກໍ່ຄືການຟື້ນຟູລະບົບເສດຖະກິດພາຍຫຼັງທີ່ສາມາດຄວບຄຸມການແຜ່ລະບາດຂອງເຊື້ອພະຍາດດັ່ງກ່າວ.

ພ້ອມດຽວກັນນີ້, ກອງປະຊຸມໄດ້ຮັບຊາບ ບັນດາຮ່າງຖະແຫຼ່ງການສຳລັບຜູ້ນຳໃນທ້າຍປີຄື:1. EAS Leaders’ Statement on Mental Health Cooperation; 2. EAS Leaders’ Statement on Economic Growth through Tourism Recovery; ແລະ 3. EAS Leaders’ Statement on Green Recovery: Advancing Towards a Sustainable and Resilient Future.

          ໃນໂອກາດນີ້, ກອງປະຊຸມຍັງໄດ້ປືກສາຫາລື ແລະ ແລກປ່ຽນຄວາມຄິດເຫັນຕໍ່ບັນຫາພາກພື້ນແລະສາກົນທີ່ຕ່າງຝ່າຍມີຄວາມສົນໃຈຮ່ວມກັນ ແລະ ໄດ້ປືກສາຫາລືການກະກຽມ ດ້ານເນື້ອໃນ ແລະ ພິທີການ ສຳລັບກອງປະຊຸມລັດຖະມົນຕີຕ່າງປະເທດຜູ້ນໍາອາຊີຕາເວັນອອກ ແບບທາງໄກ ໃນເດືອນສິງຫາແລະ ກອງປະຊຸມສຸດຍອດຜູ້ນໍາອາຊີຕາເວັນອອກ ໃນເດືອນ ຕຸລາ 2021 ທີ່ຈະມາເຖິງນີ້.