ໃນຕອນເຊົ້າວັນທີ 29 ມິຖຸນາ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສເວທີພາກພື້ນອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສເວທີພາກພື້ນອາຊຽນ (ASEAN Regional Forum Senior Officials’ Meeting ຫຼື ARF SOM) ຈັດຂຶ້ນໃນຮູບແບບທາງໄກ, ພາຍໃຕ້ການເປັນປະທານຂອງ ບຣູໄນ ດາຣູຊາລາມ ໃນຖານະປະທານອາຊຽນ ສໍາລັບປີ 2021. ເຂົ້າຮ່ວມໃນກອງປະຊຸມຄັ້ງນີ້ ມີບັນດາເຈົ້າໜ້າທີ່ອາວຸໂສ ຈາກ 27 ປະເທດຜູ້ເຂົ້າຮ່ວມເວທີພາກພື້ນອາຊຽນ, ຮອງເລຂາທິການໃຫ່ຍອາຊຽນ ແລະ ວິຊາການທີ່ກ່ຽວຂ້ອງຈໍານວນໜຶ່ງ.
ກອງປະຊຸມ ໄດ້ຕີລາຄາສູງຕໍ່ຜົນສຳເລັດຂອງການຈັດຕັ້ງປະຕິບັດບັນດາກິດຈະກໍາຮ່ວມມືເວທີພາກພື້ນອາຊຽນ ສຳລັບໄລຍະສົກປີ2020-2021 ພາຍໃຕ້ແຜນວຽກການຮ່ວມມືກາງສະໄໝ,ພ້ອມທັງໄດ້ຮັບຊາບຜົນການຈັດຕັ້ງປະຕິບັດແຜນປະຕິບັດງານຮ່າໂນ້ຍ ສະບັບທີ 2 (2020-2025) ທີ່ຮັບຮອງໃນປີ 2020, ມາຮອດປັດຈຸບັນ ສາມາດຈັດຕັ້ງປະຕິບັດໄດ້ 12 ກິດຈະກໍາ, ຍັງຄົງຄ້າງ 95 ກິດຈະກໍາ, ເຊິ່ງເຫັນວ່າຍັງມີຄວາມຄືບໜ້າໜ້ອຍ ຍ້ອນການແຜ່ລະບາດຂອງພະຍາດໂຄວິດ-19 ທີ່ໄດ້ສົ່ງຜົນກະທົບອັນໃຫຍ່ຫຼວງຕໍ່ພາກພື້ນ, ຕໍ່ກັບບັນຫານີ້ບັນດາເຈົ້າໜ້າທີ່ອາວຸໂສເວທີພາກພື້ນອາຊຽນ ໄດ້ສະເໜີໃຫ້ມີການປັບກິດຈະກໍາໃຫ້ແທດເໝາະກັບສະພາບການ ແລະ ສິ່ງທ້າທ້າຍໃນປັດຈຸບັນ ເພື່ອຮັກສາໄດ້ທ່ວງທ່າທີ່ດີໃນການຈັດຕັ້ງປະຕິບັດກິດຈະກໍາການຮ່ວມມືດັ່ງກ່າວ.
ກອງປະຊຸມ ໄດ້ພິຈາລະນາຮັບຮອງເອົາແຜນວຽກເວທີພາກພື້ນອາຊຽນ ກ່ຽວກັບການບັນເທົາທຸກໄພພິບັດ ສະບັບປັບປຸງໃໝ່ ໄລຍະສົກປີ 2021-2023 ໂດຍແມ່ນ ສປປ ລາວ, ສປ ຈີນ ແລະ ການາດາ ເປັນຜູ້ນໍາພາໃນນາມປະເທດປະທານຮ່ວມກິດຈະກໍານີ້ ໄລຍະສົກປີ 2018-2022.ນອກນັ້ນ, ກອງປະຊຸມ ຍັງໄດ້ເຫັນດີຮັບຮອງບັນຊີກິດຈະກໍາ ສໍາລັບສົກປີ 2021-2022, ເຊິ່ງມີທັງໝົດ 42 ກິດຈະກໍາ.
ກອງປະຊຸມ ໄດ້ປຶກສາຫາລືການກະກຽມດ້ານເນື້ອໃນ ແລະ ພິທີການໃຫ້ແກ່ກອງປະຊຸມລັດຖະມົນຕີເວທີພາກພື້ນອາຊຽນ ຄັ້ງທີ 28, ຊຶ່ງຈະຈັດຂຶ້ນໃນຕົ້ນເດືອນ ສິງຫາ 2021 ທີ່ຈະມາເຖິງນີ້, ພ້ອມທັງໄດ້ແລກປ່ຽນຄວາມຄິດເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ໂດຍສະເພາະບັນຫາອາດຊະຍາກຳຂ້າມຊາດ, ການກໍ່ການຮ້າຍ, ການຄ້າມະນຸດ ລວມທັງສະພາບການໃນມຽນມາ, ແຫຼມເກົາຫຼີ, ທະເລຈີນໃຕ້ ແລະ ບັນຫາອື່ນໆ.