ໃນເຊົ້າວັນທີ 6 ມິຖຸນາ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ອາຊຽນ-ສ.ເກົາຫລີ ຄັ້ງທີ 25 ແບບທາງໄກ ພາຍໃຕ້ການເປັນປະທານຮ່ວມ ຂອງ ບຣູໄນ ດາຣູຊາລາມ ແລະ ສ.ເກົາຫລີ. ເຂົ້າຮ່ວມກອງປະຊຸມຄັ້ງນີ້ຍັງມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫຍ່ອາຊຽນ ແລະ ວິຊາການກ່ຽວຂ້ອງຈຳນວນໜຶ່ງ.
ກອງປະຊຸມ ໄດ້ຕີລາຄາສູງຕໍ່ຜົນການຈັດຕັ້ງປະຕິບັດການຮ່ວມມື ອາຊຽນ-ສ.ເກົາຫລີ ໃນໄລຍະໜື່ງປີຜ່ານມາ ໂດຍສະເພາະການຜັນຂະຫຍາຍ ຜົນກອງປະຊຸມສຸດຍອດ ອາຊຽນ-ສ.ເກົາຫລີ ໃນທ້າຍປີ 2020 ແລະ ການຈັດຕັ້ງປະຕິບັດແຜນປະຕິບັດງານ ອາຊຽນ-ສ.ເກົາຫລີ ໄລຍະ 2021-2025, ເຊິ່ງມາຮອດປະຈຸບັນສາມາດຈັດຕັ້ງປະຕິບັດໄດ້ຫຼາຍກວ່າ 30% ຂອງແຜນທັງໝົດ.
ພ້ອມນີ້, ກອງປະຊຸມຍັງໄດ້ປຶກສາຫາລື ແລະ ແລກປ່ຽນຂໍ້ມູນ-ຂ່າວສານ, ມາດຕະການ ແລະ ບົດຮຽນທີ່ດີໃນການປ້ອງກັນ, ຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ລວມທັງການຈະສືບຕໍ່ຮ່ວມມືກັນໃນການຄົ້ນຄ້ວາ ແລະ ພັດທະນາ (R&D) ໃນການຜະລິດ ແລະ ເຂົ້າເຖິງຢາປົວພະຍາດ ກໍ່ຄື ຢາວັກແຊັງປ້ອງກັນພະຍາດໂຄວິດ-19 ແລະ ການຟື້ນຟູເສດຖະກິດພາຍຫຼັງສາມາດຄວບຄຸມພະຍາດດັ່ງກ່າວ. ພິເສດ, ບັນດາປະເທດສະມາຊິກອາຊຽນ ໄດ້ສະແດງຄວາມຂອບໃຈມາຍັງ ສ.ເກົາຫລີ ທີ່ໄດ້ປະກອບສ່ວນງົບປະມານ ຈໍານວນ 1 ລ້ານ ໂດລາສະຫະລັດ ເຂົ້າໃນກອງທຶນສຸກເສີນອາຊຽນຕ້ານພະຍາດໂຄວິດ-19 ແລະ ໄດ້ຊຸກຍູ້ໃຫ້ ສ.ເກົາຫລີ ພິຈາລະນາໃຫ້ການຊ່ວຍເຫຼືອຄັງແຮສຸກເສີນຢາປົວພະຍາດ ແລະ ອຸປະກອນການແພດອາຊຽນ ແລະໃຫ້ການສະໜັບສະໜູນການຈັດຕັ້ງປະຕິດບັດ ແຜນຟື້ນຟູເສດຖະກິດຮອບດ້ານອາຊຽນ ຫຼັງໂຄວິດ-19.
ສຳລັບທິດທາງໃນຕໍ່ໜ້າ ກອງປະຊຸມເຫັນດີຈະສືບຕໍ່ຮ່ວມມືກັນ ໃນບາງຂະແໜງການບູລິມະສິດເຊັ່ນ: ດ້ານສາທາລະນະສຸກ, ການຮ່ວມມືດ້ານເສດຖະກິດ, ການພັດທະນາຕົວເມືອງອັດສະລິຍະ, ການຫັນໄປເປັນດິຈິຕອນ, ຄວາມໝັ້ນຄົງທາງໄຊເບີ, ການເຊື່ອມຈອດອາຊຽນ, ການຮັດແຄບຄວາມແຕກໂຕນດ້ານການພັດທະນາ, ການສົ່ງເສີມຈຸລະວິສະຫະກິດ, ທຸລະກິດຂະໜາດນ້ອຍ ແລະ ກາງ, ການສຶກສາ, ການປ່ຽນແປງສະພາບດິນຟ້າອາກາດ, ການພັດທະນາແບບຢືນຢົງ ແລະ ການໄປມາຫາສູ່ ລະຫວ່າງ ປະຊາຊົນ ກັບ ປະຊາຊົນ, ໂດຍສະເພາະ ການທ່ອງທ່ຽວ. ພ້ອມນີ້, ສອງຝ່າຍຍັງເຫັນດີ ສຸມໃສ່ຈັດຕັ້ງປະຕິບັດແຜນປະຕິບັດງານ ອາຊຽນ-ສ.ເກົາຫລີ ສະບັບໃໝ່ ໄລຍະ 2021-2025 ເພື່ອຮັບປະກັນວ່າ ທຸກກິດຈະກໍາທີ່ນອນຢູ່ພາຍໃຕ້ແຜນດັ່ງກ່າວ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ.
ນອກຈາກນີ້, ກອງປະຊຸມຍັງໄດ້ແລກປ່ຽນຄວາມຄິດເຫັນ ຕໍ່ບາງບັນຫາເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນແມ່ນ ບັນຫາແຫຼມເກົາຫລີ ແລະ ບັນຫາໂຄງສ້າງພາກພື້ນ, ການພົວພັນຮ່ວມມືເພື່ອຜັນຂະຫຍາຍເອກະສານແນວຄວາມຄິດອິນໂດ-ປາຊີຟິກອາຊຽນ. ພິເສດ, ກອງປະຊຸມຄັ້ງນີ້, ຍັງໄດ້ກະກຽມທັງທາງດ້ານເນື້ອໃນ ແລະ ພະລາທິການໃຫ້ແກ່ກອງປະຊຸມລັດຖະມົນຕີຕ່າງປະເທດ ອາຊຽນ-ສ.ເກົາຫລີ ແລະ ກອງປະຊຸມສຸດຍອດ ອາຊຽນ-ສ.ເກົາຫລີ ຄັ້ງທີ 22 ທີ່ ຈະມີຂຶ້ນໃນຕົ້ນເດືອນສິງຫາ 2021 ແລະ ຕຸລາ 2021 ຕາມລຳດັບ.