ໃນວັນທີ 8 ກໍລະກົດ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ ທັງເປັນຫົວໜ້າ​ເຈົ້າໜ້າ​ທີ່​ອາວຸໂສ​ອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງ​ປະ​ຊຸມເຈົ້າ​ໜ້າ​ທີ່ອາ​ວຸ​ໂສ    ອາ​ຊຽນ-ອີຢູ ແບບທາງໄກ, ໂດຍການເປັນປະທານຮ່ວມຂອງ ສິງກະໂປ ແລະ ອີຢູ. ນອກຈາກນີ້, ຍັງມີ ບັນດາຫົວໜ້າ​ເຈົ້າໜ້າ​ທີ່​ອາວຸໂສອາຊຽນ, ທ່ານຮອງເລຂາທິການໃຫ່ຍອາຊຽນ ແລະ ພະນັກງານວິຊາການທີ່ກ່ຽວຂ້ອງຈໍານວນໜຶ່ງ ເຂົ້າຮ່ວມໃນກອງປະຊຸມຄັ້ງນີ້.

ກອງປະຊຸມ ໄດ້ສະແດງຄວາມເພິ່ງພໍໃຈ ຕໍ່ຄວາມຄືບໜ້າ​ໃນການ​ຈັດ​ຕັ້ງ​ປະ​ຕິ​ບັດການຮ່ວມມື ອາຊຽນ-ອີຢູ ຜ່ານມາ ໂດຍສະເພາະການຈັດຕັ້ງປະຕິບັດ​ແຜນ​ປະຕິບັດງານ ໄລ​ຍະ​ປີ (2018-2022) ລວມທັງ ໄດ້ຊົມເຊີຍຜົນສຳເລັດການເຈລະຈາສັນຍາອາຊຽນ-ອີຢູ ວ່າດ້ວຍ ການຂົນສົ່ງທາງອາກາດຮອບດ້ານ. ພ້ອມນີ້, ບັນດາປະເທດສະມາຊິກອາຊຽນ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອຂອງອີຢູ ຕໍ່ອາຊຽນ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ຈຳນວນເງິນ 800 ລ້ານເອີໂຣ ໂດຍຜ່ານໂຄງການທີມງານເອີຣົບ (Team Europe).

ກອງປະຊຸມ ໄດ້ປຶກສາຫາລື ທິດທາງແຜນການຮ່ວມມື ອາຊຽນ-ອີຢູໃນຕໍ່ໜ້າ ເຊິ່ງໄດ້ເຫັນດີເພີ່ມທະວີການຮ່ວມມືໃນດ້ານຕ່າງໆເຊັ່ນ: ການຮ່ວມມືດ້ານເສດຖະກິດ, ການຄ້າແລະ ການລົງທຶນ, ວິທະຍາສາດ, ເຕັກໂນໂລຢີ ແລະ ນະວັດຕະກຳ, ການເຊື່ອມຈອດ, ການ​ຮັດ​ແຄບ​ຄວາມ​ແຕກ​ໂຕນ, ການຮັບມືກັບສະພາບການ​ປ່ຽນ​ແປງ​ດິນ​ຟ້າ​ອາ​ກາດ, ການພັດທະນາແບບຍືນຍົງ, ແລະ ການໄປມາຫາສູ່ລະຫວ່າງ ປະຊາຊົນກັບປະຊາຊົນ. ນອກນັ້ນ, ກອງປະຊຸມ ຍັງໄດ້ປຶກສາຫາລື ກ່ຽວກັບ ການຈັດກອງປະຊຸມສຸດຍອດ ເພື່ອສະເຫຼີມສະຫຼອງການຮ່ວມມືອາຊຽນ-ອີຢູ ຄົບຮອບ 45 ປີ ໃນປີ 2022.

ກອງປະຊຸມຫົ​ວ​ໜ້າ​ເຈົ້າ​ໜ້າ​ທີ່ ອາ​ວຸ​ໂສ ອາ​ຊຽນ-ອີຢູ ຄັ້ງນີ້ ຍັງໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເພື່ອຮັກສາສັນຕິພາບ ແລະ ຄວາມໝັ້ນຄົງໃນພາກພື້ນ.

----------------//----------------