ໃນຕອນເຊົ້າຂອງວັນທີ 15 ພະຈິກ 2023, ທີ່ ນະຄອນຫລວງພຽງຢາງ, ສະຫາຍ ສີສະຫວາດ ຄໍາສາລີ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສປປ ເກົາຫລີ ໄດ້ເຂົ້າຢ້ຽມອໍາລາ ສະຫາຍ ກັງ ຢຸນ ຊອກ ( Kang Yun Sok), ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສາທາລະນະລັດ ປະຊາຊົນ ປະຊາທິປະໄຕເກົາຫລີ ເນື່ອງໃນໂອກາດທີ່ ສະຫາຍ ຈະຈົບວາລະການດຳລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສປປ ເກົາຫລີ.
ໃນໂອກາດນີ້, ສະຫາຍ ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສປປ ເກົາຫລີ ກໍໄດ້ສະແດງຄວາມຊົມເຊີຍຕໍ່ ຜົນສໍາເລັດທີ່ສະຫາຍ ເອກອັກຄະລັດຖະທູດຍາດມາໄດ້ໃນໄລຍະ 5 ປີ ທີ່ປະຕິບັດໜ້າທີ່ການທູດ ຢູ່ ສປປ ເກົາຫລີ ເຊິ່ງ ສະຫາຍ ເອກອັກຄະລັດຖະທູດ ໄດ້ປະກອບສ່ວນສໍາຄັນໃນການເພີ່ມຄູນສ້າງສາຍພົວພັນມິດຕະພາບແລະການຮ່ວມມື ທີ່ ເປັນມູນເຊື້ອ ລະຫວ່າງສອງປະເທດ ສປປ ລາວ-ສປປ ເກົາຫລີ.
ໃນໂອກາດນີ້, ສະຫາຍ ກັງ ຢຸນ ຊອກ, ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສປປ ເກົາຫລີ ໄດ້ປະດັບຫຼຽນໄຊມິດຕະພາບຊັ້ນ 1 ຂອງລັດຖະບານ ສປປ ເກົາຫລີ ໃຫ້ແກ່ ສະຫາຍ ສີສະຫວາດ ຄໍາສາລີ ຢ່າງສົມກຽດ.
ໃນຕອນທ້າຍ, ສະຫາຍ ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສປປ ເກົາຫລີ ໄດ້ອວຍພອນໃຫ້ ສະຫາຍ ເອກອັກຄະລັດຖະທູດ ຈົ່ງປະສົບຜົນສໍາເລັດໃນການປະຕິບັດພາລະກິດໃໝ່ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.
ສະຫາຍ ສີສະຫວາດ ຄຳສາລີ, ເອກອັກຄະລັດຖະທູດ ແຫ່ງ ສປປລາວ ປະຈຳ ສປປ ເກົາຫລີ ໄດ້ສະແດງຄວາມຂອບອົກຂອບໃຈຢ່າງຈິງໃຈ ຈຕໍ່ ສະຫາຍ ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສປປ ເກົາຫລີ ທີ່ໄດ້ສະຫລະເວລາ ອັນມີຄ່າຕ້ອນຮັບ ສະຫາຍ ສີສະຫວາດ ຄຳສາລີ ຢ່າງອົບອຸ່ນ ແລະ ສະແດງຄວາມຂອບໃຈຢ່າງເລິກຊຶ່ງ ຕໍ່ ພັກ-ລັດຖະບານ ແຫ່ງ ສປປ ເກົາຫລີ ທີ່ໄດ້ຕົກລົງປະດັບຫລຽນໄຊມິດຕະພາບຊັ້ນ 1 ແກ່ສະຫາຍ ສີສະຫວາດ ໃນຄັ້ງນີ້.
ໃນໂອກາດສະຫງ່າລາສີນີ້, ສະຫາຍ ເອກອັກຄະລັດຖະທູດ ໄດ້ນຳເອົາຄວາມຢື້ຢາມຖາມຂ່າວອັັນອົບອຸ່ນທີ່ສຸດ ຂອງ ສະຫາຍ ທອງລຸນ ສີສຸລິດ, ເລຂາທິການໃຫ່ຍຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໂດຍຜ່ານ ສະຫາຍ ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ສປປ ເກົາຫລີ ໄປຍັງ ສະຫາຍ ກິມ ເຈິງ ອຸນ, ເລຂາທິການໃຫ່ຍພັກແຮງງານເກົາຫລີ, ປະທານກິດຈະການແຫ່ງລັດ, ຜູ້ບັນຊາການສູງສຸດກຳລັງປະກອບອາວຸດ ແຫ່ງ ສປປ ເກົາຫລີ ນະໂອກາດນີ້ດ້ວຍ,
ໃນໂອກາດເຂົ້າຢ້ຽມອໍາລາດັ່ງກ່າວ, ສະຫາຍ ເອກອັກຄະລັດຖະທູດ ໄດ້ຕີລາຄາສູງຕໍ່ສາຍພົວພັນມິດຕະພາບ,ຄວາມສາມັກຄີ ແລະ ການຮ່ວມມື ທີ່ເປັນມູນເຂື້ອ ລະຫວ່າງ 2 ພັກ, 2 ລັດ ແລະ ປະຊາຊົນສອງຊາດ ລາວ- ເກົາຫລີ, ເຊິ່ງ ແມ່ນ ສະຫາຍ ປະທານ ໄກສອນ ພົມວິຫານ, ຜູ້ນໍາທີ່ແສນເຄົາລົບຮັກຂອງປະຊາຊົນລາວບັນດາເຜົ່າ ແລະ ສະຫາຍ ປະທານ ກິມ ອິນ ຊຸງ, ຜູ້ນໍາທີ່ຍິ່ງໃຫ່ຍຂອງປະຊາຊົນເກົາຫລີເປັນຜູ້ກໍ່ຕັ້ງ ແລະ ໄດ້ຮັບການສືບທອດໂດຍບັນດາຜູ້ນໍາລຸ້ນລຸ້ນຕ່າງໆຂອງສອງປະເທດ ຕະຫລອດມາ.
ສະຫາຍ ເອກອັກຄະລັດຖະທູດ, ໄດ້ອວຍພອນໃຫ້ສະຫາຍ Kang Yun Sok, ຮອງປະທານຄະນະປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສປປ ເກົາຫລີ ຈົ່ມີພະລານາໄມສົມບູນ ແລະ ອວຍພອນໃຫ້ ພັກ, ລັດຖະບານ ແລະ ປະຊາຊົນ ເກົາຫລີ ຈົ່ງຍາດໄດ້ຜົນສຳເລັດອັນຍິ່ງໃຫ່ຍກວ່າເກົ່າ ໃນພາລະກິດປົກປັກຮັກສາ ແລະສ້າງສາປະເທດຊາດ ເກົາຫລີ ສັງຄົມນິຍົມ.