ໃນ​ຕອນ​ເຊົ້າ ຂອງ ວັນ​ທີ 17 ພະ​ຈິກ 2023, ສະ​ຫາຍ ພອນ​ສີ ບຸນມີ​ໄຊ ໄດ້​ເຂົ້າ​ຍື່ນ​ສັນ​ຍາ​ບັດ​ແຕ່ງ​ຕັ້ງ​ກົງ​ສຸນ​ໃຫ່​ຍ ແຫ່ງ ສ​ປ​ປ ລາວ ປະ​ຈຳ​ ນະ​ຄອນ​ໂຮ່​ຈິ​ມີນ, ສ​ສ ຫວຽດ​ນາມ ຕໍ່​ສະ​ຫາຍ ຍວານ ຮວງ ມິງ (DOAN HOANG MINH), ຫົວ​ໜ້າ​ກົມ​ກົງ​ສຸນ ກະ​ຊວງ ການ​ຕ່າງ​ປະ​ເທດ ແຫ່ງ ສ​ສ ຫວຽດ​ນາມ ເພື່ອ​ດຳ​ລົງ​ຕຳ​ແໜ່ງ​ເປັນ ກົງ​ສຸນ​ໃຫ່​ຍ ແຫ່ງ ສ​ປ​ປ ​ລາວ ປະ​ຈຳ ນະ​ຄອນ​ໂຮ່​ຈິ​ມີນ, ສ​ສ ຫວຽດ​ນາມ.

ໃນ​ໂອກາດ​ນີ້, ສະຫາຍ ຍວານ ຮວງ ມິງ ໄດ້​ສະ​ແດງ​ຄວາມ​ຍີນດີຕ້ອນ​ຮັບ ແລະ ຊົມ​ເຊີຍ​ເປັນ​ພິ​ເສດ​ຕໍ່​ການ​ມາ​ດຳ​ລົງ​ຕຳ​ແໜ່ງ ຂອງ ສະ​ຫາຍ ພອນ​ສີ ບຸນ​ມີ​ໄຊ ກົງ​ສຸນ​ໃຫ່​ຍ​ຄົນ​ໃຫ່​ມ ປະ​ຈຳ ນະ​ຄອນ​ໂຮ່​ຈິ​ມີນ ສ​ສ ຫວຽດ​ນາມ, ເນື່ອງ​ຈາກ​ ສະ​ຫາຍ ກົງ​ສຸນ​ໃຫ່​ຍ ແມ່ນ​ຜູ້​ທີ່​ມາ​ຈາກ​ພາກ​ສ່ວນ​ໂດຍ​ກົງ​ກໍ່​ຄື​ເປັນ ຮອງ​​ຫົວ​ໜ້າກົມ​ກົງ​ສຸນ ແລະ ເປັນ​ອີກ​ຜູ້​ໜຶ່​ງ​ທີ່​ເຄີຍ​ຮ່ວມ​ງານ​ມາ​ກ່ອນ​ໜ້າ​ແລ້ວ. ພ້ອມ​ທັງ​ຕີ​ລາ​ຄາ​ສູງ​ການ​ພົວ​ພັນ​ຮ່ວມ​ມື ລະ​ຫວ່າງ ສອງ​ປະ​ເທດ ລາວ ແລະ ຫວຽດ​ນາມ ໄດ້​ຮັບ​ການ​ເສີມ​ຂະ​ຫຍາຍ​ແບບ​ໃກ້​ສິດ ແລະ ເພື່ອນ​ຮ່ວມ​ອຸ​ດົມ​ການ​ດຽວ​ກັນ, ມີ​ມູນ​ເຊື້ອ​ຊ່ວຍ​ເຫລືອ​ເຊິ່ງ​ກັນ​ ແລະ ກັນ ດ້ວຍ​ຄວາມ​ຈິງ​ໃຈ​ຕະ​ຫລອດ​ມາ, ພ​ອ້ມ​ທັງ​ໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ ສະ​ຫາຍ ກົງ​ສຸນ​ໃຫ່​ຍ ຈະ​ສືບ​ຕໍ່​ຮັດ​ແໜ້ນ​ສົ່ງ​ເສີມ​ສາຍ​ພົວ​ພັນ​ມິດ​ຕະ​ພາບອັນ​ຍິ່ງ​ໃຫ່​ຍ, ຄວາມ​ສາ​ມັກ​ຄີ​ພິ​ເສດ ແລະ ການ​ຮ່ວມ​ມື​ຮອບ​ດ້ານ​ຢູ່​ໃນ​ທຸກ​ຄົງ​ເຂດ​ພາກ​ໃຕ້ ສ​ສ ຫວຽດ​ນາມ ກັບ ສ​ປ​ປ ລາວ ໂດຍ​ສະ​ເພາະ​ວຽກ​ງານ​ກົງ​ສຸນ ແລະ ວຽກ​ງານ​ອື່ນໆ​ທີ່​ປິ່ນອ​ອ້ມ​ເຊັ່ນ: ​ວຽກ​ງານການ​ເມືອງ, ເສດ​ຖະ​ກິດ, ການ​ສືກ​ສາ​, ວັດ​ທະ​ນາ​ທຳ​ສັງ​ຄົມ, ສາ​ທາ​ລະ​ນະ​ສຸກ ແລະ ຈະ​ພະ​ຍາ​ຍາມ​ສຸດ​ຄວາມ​ສາ​ມາດ​ເພື່ອ​ໃຫ້​ວຽກ​ງານ ກໍ່​ຄື ​ກົມ​ກົງ​ສຸນ ກະ​ຊວງ ການ​ຕ່າງ​ປະ​ເທດ​ ສ​ສ ຫວຽດ​ນາມ ຈະ​ໄດ້​ຮ່ວມ​ມື​ກັບ ກົງ​ສຸນ​ໃຫ່​ຍ ແຫ່ງ ສ​ປ​ປ ລາວ ປະ​ຈຳ ນະ​ຄອນ​ໂຮ່​ຈິ​ມີນ ລວມ​ທັງ​ຂະ​ແໜ່ງ​ການ​ຕ່າງໆ​ທີ່​ຕິດ​ພັນກໍ່​ຄື ກົງ​ສຸນ​ໃຫ່​ຍ ແຫ່ງ ສ​ສ ຫວຽດ​ນາມ ປະ​ຈຳ ແຂວງ ຈຳ​ປາ​ສັກ​ ແລະ ແຂວງ ສະ​ຫວັນ​ນະ​ເຂດ ໃຫ້​ມີ​ການ​ພົວ​ພັນ ແລະ ຊ່ວຍ​ເຫລືອ​ກັນ​ເພີ່ມ​ຂື້ນ.

ໂອກາດ​ດຽວ​ກັນ, ສະ​ຫາຍ ກົງ​ສຸນ​ໃຫ່​ຍ ປະ​ຈຳ ນະ​ຄອນ​ໂຮ່​ຈິ​ມີນ ​ກໍ່​ໄດ້​ນຳ​ເອົາ​ຄວາມ​ຢ້ຽມ​ຢາມ​ຖາມ​ຂ່າວ​ອັນ​ອົບ​ອຸ່ນ ຈາກ​ຄະ​ນະ​ນຳ ກະ​ຊວງ ການ​ຕ່າງ​ປະ​ເທດ ແຫ່ງ ສ​ປ​ປ ລາວ ໂດຍ​ສະ​ເພາະ ສະ​ຫາຍ ທ່ານ ສະ​ເຫຼີມ​ໄຊ ກົມ​ມະ​ສິດ, ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ ກະ​ຊວງ ການ​ຕ່າງ​ປະ​ເທດ ສົ່ງ​ເຖິງ ຄະ​ນະ​ນຳ ກະ​ຊວງ ການ​ຕ່າງ​ປະ​ເທດ ແຫ່ງ ສ​ສ ຫວຽດ​ນາມ ໂດຍ​ສະ​ເພາະ ເຖິງ​ສະ​ຫາຍ ບຸ່ຍ ແທັງ ເຊີນ, ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ ກະ​ຊ​ວງ ການ​ຕ່າງ​ປະ​ເທດ ສ​ສ ຫວຽດ​ນາມ. ພ້ອມ​​ນີ້​ຍັງ​ຂໍ​ຝາກ​ຄວາມ​ຮ່ວມ​ໄມ້​ຮ່ວມ​ມື ຜ່ານທາງ ກະ​ຊວງ ການ​ຕ່າງ​ປະ​ເທດ ສ​ສ ຫວຽດ​ນາມ ໄປ​ຍັງ​ບັນ​ດາ ກະ​ຊວງ ແລະ ກົມ​ກອງ ຢູ່​ສູນ​ກາງ ແລະ ບັນ​ດາ​ຂະ​ແໜງ​ການ​ຕ່າງໆ ຢູ່​ບັນ​ດາ​ແຂວງ ແລະ ທ້ອງ​ຖິ່ນ, ຫວັງ​ວ່າ​ຈະ​ໄດ້​ຮັບ​ການ​ຮ່ວມ​ມື​ທີ່​ດີ ເພື່ອ​ເສີມ​ສ້າງ​ສາຍ​ພົວ​ພັນ ມິດ​ຕະ​ພາບ​ທີ່​ຍິ່ງ​ໃຫ່​ຍ, ຄວາມ​ສາ​ມັກ​ຄີ​ພິ​ເສດ ລາວ-ຫວຽດ​ນາມ ໃຫ້ເກີດດອກ​ອອກ​ຜົນ​ແລະ​ຍືນ​ຢົງຕະ​ຫລອດ​ໄປ ແລະ ຊຸກ​ຍູ້​ການ​ຮ່ວມ​ມື​ທາງ​ດ້ານ​ເສດ​ຖະ​ກິດ, ການ​ຄ້າ​ ລະ​ຫວ່າງ​ສອງ​ປະ​ເທດ​ໃຫ້​ຫລາຍ​ຂື້ນ ລະ​ດົມ​ຂົນ​ຂວາຍ​ການ​ລົງ​ທືນ​ໃຫ້​ຫລາຍກວ່າ​ເກົ່າ, ຊຸກ​ຍູ້​ວຽກ​ງານ​ທອ່ງ​ທ່ຽວ​ໃຫ້​ແຂງ​ແຮງ​​ເພາະ​ປີ 2024 ເປັນ​ປີ​ທ່ອງ​ທ່ຽວ​ຂອງ ສ​ປ​ປ ລາວ, ສົ່ງ​ເສີມ​ການ​ສືກ​ສາ​ໃຫ້​ມີ​ປະ​ສິດ​ທິ​ພາບ​ແລະ​ປະ​ສິດ​ທິ​ຜົນ, ຊຸກ​ຍູ້​ວຽກ​ການ​ຮ່ວມ​ມື​ທາງ​ດ້ານ​ສາ​ທາ​ໃຫ້​ມີ​ຮູບ​ປະ​ທຳ​ທີ່​ດີ​ຂື້ນກວ່າ​ເກົ່າ.