ສປປ ລາວ ​​ເປັນ​ເຈົ້າພາບ​ຈັດກອງປະຊຸມ ຄັ້ງທີ 38 ຂອງຄະນະກຳມາທິການລະຫວ່າງລັດຖະບານອາຊຽນ  ວ່າດ້ວຍ ສິດທິມະນຸດ (ASEAN Intergovernmental Commission on Human Rights  ຫຼື AICHR)  ໃນວັນທີ 20-23 ກຸມພາ 2024 ທີ່ ໂຮງແຮມເສດຖາປາລຣາດ, ນະຄອນຫຼວງວຽງຈັນ ໂດຍການເປັນປະທານຂອງ             ທ່ານ ທູດ ຢົ້ງ ຈັນທະລັງສີ, ຜູ້ຕາງໜ້າ ສປປ ລາວ ປະຈໍາ ຄະນະກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍ ສິດທິມະນຸດ ແລະ ທັງເປັນປະທານຂອງ ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ສຳລັບປີ 2024. ​ເຂົ້າຮ່ວມໃນກອງປະຊຸມຄັ້ງນີ້ ມີ​ຜູ້ຕາງໜ້າຂອງ​ແຕ່ລະ​ປະ​ເທດ​ສະມາຊິກ​ອາຊຽນ ປະຈຳ​ຄະນະ​ກຳມາ​ທິການ​ດັ່ງກ່າວ ແລະ ພະນັກງານຈາກກອງ​ເລຂາ​ອາຊຽນ. ນອກນັ້ນ, ກໍມີຜູ້ຕາງໜ້າຈາກປະເທດ ຕີມໍ ເລສເຕ ເຂົ້າຮ່ວມໃນຖານະປະເທດສັງເກດການ. ກອງປະຊຸມຄັ້ງນີ້ ແມ່ນກອງປະຊຸມສະໄໝສາມັນຄັ້ງທຳອິດຂອງ​ຄະນະ​ກຳມາ​ທິການລະຫວ່າງ​ລັດຖະບານ​ອາຊຽນ ວ່າ​ດ້ວຍ ສິດທິ​ມະນຸດ ສຳລັບປີ 2024 ພາຍ​ໃຕ້ການເປັນປະທານຂອງ ສປປ ລາວ.

ໃນກອງປະຊຸມ, ບັນດາປະເທດສະມາຊິກອາຊຽນ ໄດ້ລາຍງານ ກ່ຽວກັບ ຄວາມຄືບໜ້າໃນການຈັດຕັ້ງປະຕິບັດວຽກງານສົ່ງເສີມ ແລະ ປົກປ້ອງສິດທິມະນຸດໃນປະເທດຂອງຕົນ. ກອງປະຊຸມ ຍັງໄດ້ປຶກສາຫາລື ກ່ຽວກັບ ​ການຈັດຕັ້ງປະຕິບັດແຜນວຽກ 5 ປີ (2021-2025) ໂດຍສະເພາະແມ່ນ ການຈັດຕັ້ງປະຕິບັດແຜນວຽກບູລິມະສິດຕ່າງໆ ຂອງຄະນະກໍາມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ກໍຄື ບັນດາຂໍ້ລິເລີ້ມ ແລະ ກິດຈະກໍາ/ໂຄງການຕ່າງໆຂອງບັນດາປະເທດສະມາຊິກອາຊຽນ ເປັນຕົ້ນແມ່ນ ການຈັດກອງ​ປະຊຸມ​ສໍາ​ມະ​ນາໃນຂົງເຂດສິດທິມະນຸດໃນຫົວຂໍ້ຕ່າງໆເຊັ່ນ: ການສົ່ງເສີມບົດບາດຍິງ-ຊາຍຕໍ່ກັບວຽກງານສິດທິມະນຸດ ແລະ ທຸລະກິດ, ສິດທິມະນຸດ ແລະ ສິ່ງແວດລ້ອມ, ສິດທາງດ້ານການສຶກສາ, ສິດທິແມ່ຍິງ ແລະ ເດັກນ້ອຍ, ສິດທິຄົນພິການ ແລະ ຂົງເຂດອື່ນໆ, ການ​ເຮັດ​ບົດສືກສາຄົ້ນຄວ້າ ໃນຫົວຂໍ້ຕ່າງໆ ເຊັ່ນ: ສິດ​ໃນ​ການມີສັນຕິພາບ, ແລະ ສິດໃນການໄດ້ຮັບນໍ້າດື່ມທີ່ສະອາດ ແລະ ສຸຂະອະນາໄມ. ພ້ອມນີ້, ກອງປະຊຸມຍັງໄດ້ປຶກສາຫາລືແຜນວຽກບູລິມະສິດໃນປີ 2024, ລວມທັງການກະກຽມສ້າງແຜນວຽກ 5 ປີ ສະບັບໃໝ່ (2026-2030).

ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ​ໄດ້​ຖືກ​ສ້າງຕັ້ງຂື້ນຕາມ​ມາດຕາ 4 ຂອງ​ກົດ​ບັດ​ອາຊຽນ ​ເຊິ່ງ​ເອກະສານ​ພາລະ​ບົດບາດ​ຂອງ​ຄະນະ​ກໍາມາ​ທິການ ​ໄດ້​ຖືກ​ຮັບຮອງ​ເອົາ​ໃນ​ປີ 2009. ​ແຕ່ລະ​ປະ​ເທດ​ອາຊຽນ ​ແຕ່ງຕັ້ງຜູ້​ຕາງໜ້າຂອງ​ຕົນ ປະຈຳ​ຄະນະ​ກຳມາ​ທິການ​ດັ່ງກ່າວ ​ເຊິ່ງ​ມີ​ອາຍ​ຸການ 3 ປີ ​ແລະ ສາມາດ​ຕໍ່​ໄດ້  1 ສະ​ໄໝ. ຄະນະ​ກຳມາ​ທິການ​ ລະຫວ່າງ​ລັດຖະບານ​ອາຊຽນ ວ່າ​ດ້ວຍ​ ສິດທິ​ມະນຸດ ​ເປັນ​ອົງ​ກອນຫຼັກຂອງ​ອາຊຽນ​ໃນ​ການ​ສົ່ງ​ເສີມ​ການ​ຮ່ວມ​ມື​ດ້ານ​ສິດທິ​ມະນຸດ​ໃນ​ການ​ສ້າງ​ປະຊາ​ຄົມ​ອາຊຽນ ບົນ​ພື້ນຖານ​ຈຸດ​ພິ​ເສດ​ຂອງ​ພາກພື້ນ ​ແລະ ຂອງ​ແຕ່ລະ​ປະ​ເທດ.