ວັນທີ 4 ເມ​ສາ 2024, ສະ​ຫາຍ ນາງ ຄຳເພົາ ເອີນທະວັນ, ເອ​ກອັກຄະ​ລັດ​ຖະ​ທູດ​ວິ​ສາ​ມັນ​ຜູ້​ມີ​ອຳ​ນາດ​ເຕັມ ແຫ່ງ ສ​ປ​ປ ລາວ ປະ​ຈຳ ສ​ສ ຫວຽດ​ນາມ ພ້ອມ​ຄະ​ນະ  ໄດ້ເຂົ້າຢ້ຽມ​ຂ່ຳ​ນັບ ​​ສະ​ຫາຍ ດິງ ຕຽນ ຢຸງ, ກຳມະການກົມການເມືອງ, ເລຂາຄະນະພັກນະຄອນຫຼວງຮ່າໂນ້ຍ ໃນ​ໂອ​ກາດ​ທີ່​​​ສະ​ຫາຍໄດ້​​​ດໍາລົງຕໍາແໜ່ງເປັນເອກອັກຄະລັດຖະທູດລາວ​ຄົນ​ໃໝ່ ປະຈໍາ ຫວຽດນາມ.

ໃນ​ໂອ​ກາດນີ້, ສະ​ຫາຍ ນາງ ຄຳເພົາ ເອີນທະວັນ ​ໄດ້​ນຳ​ເອົາ​ຄຳຢື້​ຢາມ​ຖາມຂ່າວ ແລະ ຄຳ​ອວຍ​ພອນໄຊ​​​ອັນ​ປະ​ເສີດ ຈາກ​ສະ​ຫາຍເລ​ຂາ​ພັກ​ນະ​ຄອນຫຼວງວຽງ​ຈັນ ກໍ​ຄື​ການ​ນຳ​ທຸກ​ຂັ້ນ​ຂອງ ສ​ປ​ປ ລາວ ມາ​ຍັງ​ສະ​ຫາຍ ດິງ ຕຽນ ຢຸງ ພ້ອມ​ດ້ວຍ​ການ​ນຳ​ຂັ້ນ​ສູງ​ຂອງ​ຫວຽດ​ນາມ. ພ້ອມ​ທັງ​ໄດ້ສະ​ແດງ​ຄວາມ​ຂອບ​ໃຈ​ຕໍ່ການ​ຕ້ອນ​ຮັບ​ອັນ​​ອົບ​ອຸ່ນ, ​ສະ​ໜິດ​ສະ​ໜົມ​ຂອງ​ສະ​ຫາຍເລຂາຄະນະພັກນະຄອນຫຼວງຮ່າໂນ້ຍ ແລະ ສະ​ແດງ​ຄວາມ​ຮູ້​ສຶກ​ປິ​ຕິ​ຍິນ​ດີ​ເປັນ​ຢ່າງ​ຍິ່ງ​ຕໍ່​ຜົນ​ສຳ​ເລັດ​​ໃນກາ​ນ​ຈັດ​ຕັ້ງ​ປະ​ຕິ​ບັດ​ມະ​ຕິກອງ​ປະ​ຊຸມ​ໃຫຍ່ ຄັ້ງ​ທີ XIII ຂອງ​ພັກ​ກອມ​ມູ​ນິດ​ຫວຽດ​ນາມ​ໃນ​ໄລ​ຍະ​ຜ່ານ​ມາ ຊຶ່ງ​ສາ​ມາດ​ນຳ​ພາ​ປະ​ເທດ​ຊາດຫວຽດ​ນາ​ມ ເວົ້າ​ລວມ, ເວົ້າ​ສະ​ເພາະ​ແມ່ນ​ນະ​ຄອນຫຼວງ​ຮ່າ​ໂນ້ຍ ໄດ້​ຮັບ​ການ​​ພັດ​ທະ​ນາຢ່າງວ່ອງ​ໄວ ແລະ ກ້າວ​ກະ​ໂດດ, ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​​ນັບ​ມື້ດີ​ຂຶ້ນ​ເຫັນ​ໄດ້​ຢ່າງ​ຈະ​ແຈ້ງ. ສະ​ຫາຍ​ທູດ​ຕີ​ລາ​ຄາ​ສູງ​ຕໍ່ຜົນ​ສຳ​ເລັດ​ການ​ເຄື່ອ​ນ​ໄຫວ​ວຽກ​ງານ​ຕ່າງ​ປະ​ເທດ​ຂອງ​ຫວຽດ​ນາມ ໂດຍ​ສະ​ເພາະ​ແມ່ນ​ນະ​ຄອນຫຼວ​ງ​ຮ່າ​ໂນ້ຍ ໄດ້​ມີ​ການ​ເຄື່ອນ​ໄຫວ​ຢ່າງຫຼວງຫຼາຍ​ຂອງ​ບັນ​ດາ​ການ​ນຳ​ຫວຽດ​ນາມ ໄດ້​ເຄື່ອນ​ໄຫວ​ເຂົ້າ​ຮ່ວມກອງ​ປະ​ຊຸມ​ສາ​ກົນ​ໃນ​ລະ​ດັບ​ສອງ​ຝ່າຍ ແລະ ຫຼາຍ​ຝ່າຍ​ໃນ​ໄລ​ຍະ​ຜ່ານ​ມາ. ພ້ອມທັງ​ໄດ້ຕ້ອນຮັບການ​ມາຢ້ຽມຢາມ​ຫວຽດ​ນາມ​ຢ່າງ​ເປັນທາງ​ການ, ການ​ເຂົ້າ​ຮ່ວມກອງ​ປະ​ຊຸມຫຼາຍ​ຝ່າຍ​ຂອງການ​ນຳ​ສູງ​ສຸດ​ຕ່າງ​ປະ​ເທດຫຼາຍ​ຄະ​ນະ ຊຶ່ງ​ໄດ້​ເຮັດ​ໃຫ້ຖານະ ແລ​ະ ບົດບາດຂອງ ສ​ສ ຫວຽດນາມ ພົ້ນເດັ່ນຂຶ້ນໃນພາກພື້ນ ແລະ ສາກົນຢ່າງ​ຈະ​ແຈ້ງ. ສະ​ຫາຍ​​ເຊື່ອ​ໝັ້ນ​ວ່າ, ສ​ສ ຫວຽດ​ນາມ ເວົ້າ​ລວມ, ເວົ້າ​ສະ​ເພາະ​ແມ່ນ ນະ​ຄອນຫຼວງ​ຮ່າ​ໂນ້ຍ ຈະ​ປະ​ສົ​ບ​ຜົນ​ສຳ​ເລັດ​ໃນ​ວິ​ໄສ​ທັດ ແລະ ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມຂອງ​ຕົນ​ຕາມ​ແຜນ​ການ​ທີ່​ໄດ້​ວາງ​ເອົາ​ໄວ້. ໃນ​ໂອ​ກາດ​ດຽວ​ກັນ​ນີ້, ສະ​ຫາຍ​ທູດ​ຍັງ​ໄດ້ຕາງໜ້​າໃຫ້ ພັກ, ລັດ ແລະ ປະຊາຊົນລາວບ​ັນ​ດາ​ເຜົ່າ ສະແດງຄວາມຄວາມຮູ້ບຸນຄຸນ ແລະ ຂອບໃຈຢ່າງຈິງໃຈຜູ້​ນຳ ພັກ, ລັດ ແລະ ປະຊາຊົນຫວຽດນາມເວົ້າ​ລວມ, ເວົ້າ​ສະ​ເພາະ​ແມ່ນ​ນະ​ຄອນຫຼວງ​ຮ່າ​ໂນ້ຍ ທີ່ໄດ້​ໃຫ້ການ​ຊ່ວຍ​ເຫຼືອ, ສະ​ໜັບ​ສະ​ໜູນ ສ​ປ​ປ ລາວ ໃນ​ໄລ​ຍະ​ຜ່ານ​ມາ ຊຶ່ງ​ເປັນ​ການ​ປະ​ກອບ​ສ່ວນ​ອັນ​ສຳ​ຄັນ​ເຂົ້າ​ໃນການເສີມ​ຂະ​ຫຍາຍ​ສາຍ​ພົວ​ພັນ ມິດຕະພາບອັນຍິ່ງໃຫຍ່ ຄວາມສາມັກຄີພິເສດ  ແລະ ການຮ່ວມມືຮອບດ້ານ ​ລະ​ຫວ່າງ ​ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ ​ລາ​ວ-ຫວຽດ​ນາມ ແລະ ​​ຈ​ະສືບ​ຕໍ່​ເປັນ​ຂົວ​ຕໍ່, ຮ່ວມ​ມື​ກັບ​ທຸກ​ພາກ​ສ່ວນ​ຂອງທັງ​ສອງ​ຝ່າຍ​ປະ​ຕິ​ບັດ​ໜ້າ​ທີ່​ດັ່ງ​ກ່າວນີ້​ໃຫ້​ນັບ​ມື້​ມີ​ໝາກ​ຜົນ​ຍິ່ງໆ​ຂຶ້ນ.

ໃນ​ພິ​ທີ​ຕ້ອນ​ຮັບ, ສະ​ຫາຍ ດິງ ຕຽນ ຢຸງ ໄດ້ສະແດງ​ຄວາມ​ຊົມເຊີຍທີ່ສະ​ຫາຍ ນາງ ຄຳ​ເພົາ ເອີນ​ທະ​ວັນ ​​ໄດ້ມາ​ດຳ​ລົງ​ຕຳ​ແໜ່ງ ເປັນເອກອັກຄະລັດຖະທູດ​ລາວປະຈໍາ ສ​ສ ຫວຽດນາມ. ດ້ວຍ​ຄວາມ​ໄວ້​ເນື້ອ​ເຊື່ອ​ໃຈ​ຂອງການນ​ຳ​ ຂັ້ນ​ສູງພັກ​, ລັດ​ລາວ ສະຫາຍເອກອັກຄະລັດຖະທູດລາວຄົນ​ໃໝ່ ຈະສືບ​ຕໍ່​ເປັນ​ຂົວ​ຕໍ່ ແລະ ປະ​ຕິ​ບັດ​​ໜ້າ​ທີ່ການ​ເມືອງ ​ຂອງ​ຕົນທີ່​ໄດ້​ຮັບ​ມອບ​ໝາຍໃຫ້​ສຳ​ເລັດ​​​ຜົນໃຫຍ່ຫຼວງກວ່າ​ເກົ່າ. ​​ສຳ​ລັບ​ນະ​ຄອນຫຼວງ​ຮ່າ​ໂນ້ຍ ແມ່ນ​ພ້ອມ​ແລ້ວ​ທີ່​ຈະ​ໃຫ້​ການສະ​ໜັບ​ສະ​ໜູນ, ​ຊຸກ​ຍູ້ການຮ່ວມມືກັບນະຄອນຫຼວງວຽງຈັນ ໃນການພັດທະນາແຫຼ່ງຊັບພະຍາກອນມະນຸດ, ບຳລຸງສ້າງພະນັກງານການນຳຂອງນະຄອນຫຼວງວຽງຈັນ.

ຂ່າວ-ພາບ: ສະຖານທູດລາວທີ່ຮ່າໂນ້ຍ.