ວັນທີ 6 ເມ​ສາ 2024, ສະ​ຖານເອກ​ອັກ​ຄະ​ລັດ​ຖະ​ທູດ​ລາວ ປະ​ຈຳ ສ​ສ ຫວຽດ​ນາມ ໄດ້ຮ່ວມ​ກັນ​ຈັດ​ງານ​ບຸນເພື່ອ​ຕ້ອນ​ຮັບ ແລະ ສະ​ເຫຼີມ​ສະຫຼອງ​ປີ​ໃໝ່​ລາວ ປີ​ມະ​ໂລງ ພ​ສ 2567 ຂຶ້ນ​ຢູ່​ທີ່​ນະ​ຄອນຫຼວງ​ຮ່າ​ໂນ້ຍ ໂດຍ​ການ​ເປັນ​ປະ​ທານ​ຂອງ​ທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິ​ສາ​ມັນຜູ້ມີອຳນາດເຕັມແຫ່ງ ສປປ ລາວ ປະຈຳ ​ສ​ສ ຫວຽດນາມ. ຝ່າຍ​ຫວຽດ​ນາມໃຫ້​ກຽດ​ເຂົ້າ​ຮ່ວມ​ມີ ​ທ່ານ ນາງ ເຈືອງ ທິ ມາຍ, ກຳ​ມະ​ການ​ກົມ​ການ​ເມືອງ, ເລ​ຂາ​ທິ​ການ​ສູນ​ກາງ​ພັກ​ກອມ​ມູ​ນິດ​ຫວຽດ​ນາມ; ທ່ານ ຫງວຽນ ຊວັນ ຖັງ, ກຳ​ມະ​ການ​ກົມ​ການ​ເມືອງ, ຫົວໜ້າສະຖາບັນການເມືອງແຫ່ງຊາດ ໂຮ່ຈີມິນ; ທ່ານ ເຈິ່ນ ລືວ ກວາງ, ກຳ​ມະ​ການ​ສູນ​ກາງ​ພັກ, ຮອງ​ນາ​ຍົກ​ລັດ​ຖະ​ມົນ​ຕີ, ທ່ານ ບຸ່ຍ ແທັງ ເຊີນ, ກຳ​ມະ​ການ​ສູນ​ກາງ​ພັກ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ພ້ອມດ້ວຍການນຳບັນດາຄະນະ, ກະຊວງ, ຂະແໜງການຂັ້ນສູນກາງ ແລະ ທ້ອງຖິ່ນ, ຜູ້ຕາງໜ້າຄະນະຕິດຕໍ່ພົວພັນອະດີດທະຫານອາສາສະໝັກ ແລະ ນັກຊ່ຽວຊານການທະຫານ ຫວຽດນາມ ຢູ່ ລາວ ແລະ ພະ​ນັກ​ງານ​ສະ​ຖານ​ທູດ, ນັກ​ສ​ຶກ​ສາ​ຈຳ​ນວນ​ໜຶ່ງ​ ລວມ​ທັງ​ໝົດຫຼາຍກວ່າ 700 ຄົນ.

ໃນ​ພິ​ທີ, ທ່ານ ນາງ ຄຳ​ເພົາ ເອີນ​ທະ​ວັນ ໄດ້​ກ່າວ​ວ່າ: ບຸນປີໃໝ່ 2024 ນີ້ ເປັນປີທີ່ມີຄວາມໝາຍຄວາມສຳຄັນສຳລັບ ສປປ ລາວ, ເຊິ່ງທົ່ວພັກ, ທົ່ວລັດ ແລະ ປວງຊົນທັງຊາດ ໄດ້ຮ່ວມແຮງຮ່ວມໃຈກັນຈັດຕັ້ງການສະຫຼອງບຸນ​ປີ​ໃໝ່​ເພື່ອ​ຊົມ​ເຊີຍ ຜົນສຳເລັດການປະຕິບັດໜ້າທີ່ວຽກງານທີ່ຍາດມາໄດ້ຕະຫຼອດໜຶ່ງປີທີ່ຜ່ານມາ ແລະ ທັງເປັນການສ້າງບັນຍາກາດອັນຟົດຟື້ນໃຫ້ແກ່ການເປັນປະທານອາຊຽນຮອບວຽນ ແລະ ປີທ່ອງທ່ຽວລາວ. ຫຼາຍກິດຈະກຳຈະໄດ້ຈັດຂຶ້ນຕາມຮີດຄອງປປະເພນີອັນດີງາມຂອງຊາດລາວ ເພື່ອດຶງດູດນັກທ່ອງທ່ຽວ ທັງພາຍໃນ ແລະ ຕາ່ງປະເທດ, ຮັບປະກັນປະຕິບັດຄຳຂວັນປີທ່ອງທ່ຽວລາວ 2024 “ທ່ອງທ່ຽວລາວ ປອດໄພ ຊື່ນໃຈໃນວັດທະນະທຳ, ທຳມະຊາດ ຍີ້ມແຍ້ມແຈ່ມໃສ ຮັກແຂກແພງຄົນ ເປັນເຈົ້າພາບທີ່ດີ ດ້ວຍໄມຕີຈິດມິດຕະພາບ”.

ນອກ​ຈາກນັ້ນ, ທ່ານ​ທູດ​ຍັງ​ໄດ້​ຕາງ​ໜ້າ​ໃຫ້ຜູ້​ນຳ ພັກ, ລັດ ແລະ ປະ​ຊາ​ຊົນ​ລາວ ​ສະ​ແດງ​ຄວາມ​ຂອບ​ໃຈ ຕໍ່ການສະໜັບສະໜຸນ, ການຊ່ວຍເຫຼືອຂອງສະຫາຍຫວຽດນາມ ຕະຫຼອດໄລຍະທີ່ຜ່ານມາ ບໍ່ວ່າໃນຍຸກສະໄໝຕໍ່ສູ້ກູ້ຊາດໃນເມື່ອກ່ອນ ກໍຄືໃນພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ ໂດຍ​ສະ​ເພາະ​ແມ່ນ​ການ​ເປັນ​ປ​ະ​ທານ​ອາ​ຊຽນ​ຂອງ​ລາວ 2024 ນີ້. ສະແດງຄວາມຂອບໃຈ ແລະ ຮູ້ບຸນຄຸນອັນເລິກເຊິ່ງ ມາຍັງບັນດາສະຫາຍການນຳທຸກຂັ້ນ ນັບແຕ່ສູນກາງຮອດທ້ອງຖິ່ນ, ອົງການຈັດຕັ້ງຕ່າງໆ, ສະຖາບັນການສຶກສາ ທີ່ໄດ້ໃຫ້ການເບິ່ງແຍງດູແລ, ສິດສອນ, ອຳນວຍຄວາມສະດວກດ້ານຕ່າງໆ ໃຫ້ແກ່ພົນລະເມືອງລາວ ທີ່ໄດ້ມາດຳລົງຊີວິດ, ມາເຮັດວຽກ ແລະ ສຶກສາຮໍ່າຮຽນຢູ່ ສສ ຫວຽດນາມ, ເຊິ່ງໄດ້ສ້າງເງື່ອນໄຂອັນເອື້ອອຳນວຍທຸກດ້ານຕະຫຼອດມາ. ເນື່ອງ​ໃນ​ໂອ​ກາດ​ວັນ​ສຳ​ຄັນ​ດັ່ງ​ກ່າວນີ້, ທ່ານ​ທູດ​​​ໄດ້​​ນຳ​ເອົາ​ຄວາມ​ຮັກ​ແພງ​ອັນ​ອົບ​ອຸ່ນ, ຄຳ​ອວຍ​ພອນໄຊ​ອັນ​ປະ​ເສີດ​ຈາກ​ການ​ນຳ​ພັກ-ລັດ ແລະ ປະ​ຊາ​ຊົນ​ລາວ ມາ​ຍັງ​ການ​ນຳ ພັກ-ລັດ ແລະ​ ປະ​ຊາ​ຊົນ​ຫວຽດ​ນາມ​.

ໃນ​ງານ​ດັ່ງ​ກ່າວ​ນີ້, ທ່ານ ຫງວຽນ ຊວັນ ຖັງ, ກຳ​ມະ​ການ​ກົມ​ການ​ເມືອງ, ຫົວໜ້າສະຖາບັນການເມືອງແຫ່ງຊາດ ໂຮ່ຈີມິນ ຂອງ​ຫວຽດ​ນາມ ກໍ​ໄດ້​​​ຕາງ​ໜ້າ​ໃຫ້​ແກ່​ການ​ນຳ​ພັກ, ລັດ ແລະ ປະ​ຊາ​ຊົນ​ຫວຽດ​ນາ​ມາ​ອ້າຍ​ນ້ອງ ກ່າວອວ​ຍ​ພອນ​ໄຊ​ອັນ​ປະ​ເສີດ​ມາ​ຍັງບັນ​ດາຜູ້​ນຳ​ພັກ, ລັດ ແລະ ປະ​ຊາ​ຊົນ​ລາວທຸກ​ຖ້ວນ​ໜ້າ​ເວົ້າ​ລວມ, ໂດຍສະ​ເພາະ ທ່ານ​ທູດ ພ້ອມ​ດ້ວຍ​ພະ​ນັກ​ງານ​ສະ​ຖານ​ທູດ ແລະ ແຂກ​ເຂົ້າ​ຮ່ວມ. ພ້ອມ​​ນີ້, ທ່ານ​ຍັງ​ໄດ້​ວ່າ: ຫວຽດນາມ ແລະ ລາວ ແມ່ນສອງປະເທດອ້າຍນ້ອງ ບ້ານໃກ້ເຮືອນຄຽງ ມີສາຍພົວພັນແບບພິເສດ, ເຊິ່ງມີໜຶ່ງບໍ່ມີສອງຢູ່ໃນໂລກ. ສາຍພົວພັນດັ່ງກ່າວໄດ້ຮັບການສ້າງຕັ້ງຂຶ້ນ, ເພີ່ມພູນຄູນສ້າງ ແລະ ຜັນຂະຫຍາຍດ້ວຍຄວາມຈິງໃຈ, ນ້ຳໃຈແຫ່ງຄວາມຊື່ສັດບໍລິສຸດ, ການຊ່ວຍເຫຼືອອັນລ້ຳຄ່າໝົດຈິດໝົດໃຈ, ພ້ອມທີ່ຈະເສຍສະຫຼະເຊິ່ງກັນ ແລະ ກັນ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ. ດັ່ງຄຳເວົ້າຂອງປະທານ ໄກສອນ ພົມວິຫານ ໄດ້ເວົ້າວ່າ: ສາຍພົວພັນມິດຕະພາບຖານອ້າຍນ້ອງ ລະຫວ່າງປະຊາຊົນລາວ ແລະ ປະຊາຊົນຫວຽດນາມ ແມ່ນຍິ່ງໃຫຍ່ທີ່ສຸດ ເຖິງແມ່ນວ່າຈະເປັນບົົດລຳໃດ ບົດເພງໃດ ຫຼື ບົດກະວີໃດທີ່ມ່ວນທີ່ສຸດ ກໍ່ບໍ່ສາມາດພັນລະນາໄດ້. ຕໍ່ກັບນຳ້ໃຈຄວາມຮັກແພງອັນບໍລິສຸດຈາກໃຈຈິງ, ຄວາມພະຍາຍາມໃນທຸກໆບາດກ້າວ ຂອງປະຊາຊົນສອງຊາດພວກເຮົາໄດ້ຄຽງບ່າງຄຽງໄຫຼ່ ນຳພາສາຍພົວພັນແບບພິເສດ ຫວຽດນາມ - ລາວ  ຜ່ານຜ່າບັນດາສິ່ງທ້າທາຍຂອງປະຫວັດສາດ, ນຳເອົາສາຍພົວພັນມິດຕະພາບອັນຍິ່ງໃຫ່ຍ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດພວກເຮົາ ພັດທະນາກ້າວຂຶ້ນສູ່ໃບໜ້າອັນໃຫມ່ ທີ່ມີປະສິດທິພາບ ແລະ ປະສິດທິຜົນ.

ການ​ຈັດ​ງານ​ຕ້ອນ​ຮັບ​ປີ​ໃໝ່​ລາວ ປີ​ມະ​ໂລງ ພ​ສ 2567 ແລະ ການ​ເຂົ້າ​ຮ່ວມ​ຂອ​ງ​ບັນ​ດາ​ການ​ນຳ​ຂັ້ນ​ສູງ ພັກ, ລັດ ທັງ​ສູນ​ກາງ ແລະ ທ້ອງ​ຖິ່ນ ແມ່ນ​ສະ​ແດງ​ໃຫ້​ເຫັນ ເຖິງອາລົມຈິດມິດຕະພາບອັນສະໜິດສະໜົມ ຖານສະຫາຍອ້າຍນ້ອງ ບົນພື້ນຖານສາຍພົວພັນພິເສດ ລາວ-ຫວຽດນາມ ທີ່ມີໜຶ່ງບໍ່ມີສອງໃນໂລກ, ໄດ້ກາຍເປັນແຮງບັນດານໃຈອັນໃຫຍ່ຫຼວງໃຫ້ແກ່ບັນ​ດາ​ການ​ນຳ​, ພະ​ນັກ​ງານ​ສະ​ຖານ​ທູດ​ລາວ ແລະ ​ບັນ​ດານັກ​​ຄົ້ນ​ຄວ້າ, ນັກສຶກ​ສາ​ລາວ ທີ່ກຳລັງປະ​ຕິ​ບັດ​ໜ້າ​ທີ່ ​ແລະ ສຶກ​ສາ​ຮ່ຳ​ຮຽນ ຢູ່ຫ່າງໄກຈາກບ້ານເກີດເມືອງນອນຂອງຕົນ ໄດ້​ຕ້ອນ​ຮັບ ແລະ ສະຫຼອງປີໃໝ່ລາວຢູ່ ຫວຽດນາມ ດ້ວຍບັນຍາກາດເບີກບານມ່ວນຊື່ນ ແລະ ຖືກຕ້ອງຕາມຮີດຄອງປະເພນີທີ່ດີງາມຂອງລາວເຮົາ. ພ້ອມ​ກັນ​ນັ້ນ ຍັງ​ເປັນ​ການ​ໂຄ​ສະ​ນາ​ຮີດ​ຄອງ​ປະ​ເພ​ນີ​ອັນ​ດີ​ງາມ​ຂອງ​ລາວໃຫ້​ປະ​ຊາ​ຊົນ​ຫວຽດ​ນາມ​ອ້າຍ​ນ້ອງ​ໄດ້​ຮັບ​ຮູ້ ແລະ ເຂົ້າ​ໃຈຫຼາຍ​ຂຶ້ນກວ່າ​ເກົ່າ.

ຂ່າວ-ພາບ: ສະຖານທູດລາວທີ່ຮ່າໂນ້ຍ.