ກອງປະຊຸມຮັບຟັງການໂອ້ລົມ ແລະ ລະດົມຄວາມຄິດ ໃນການປັບປຸງໂຄງຮ່າງການຈັດຕັ້ງສະໂມສອນນັກການທູດລາວ ແລະ ແຜນການປະຕິບັດງານໃນຕໍ່ໜ້າ ໄດ້ຈັດຂຶ້ນໃນວັນທີ 07 ພຶດສະພາ 2024, ທີ່ ສະຖາບັນການຕ່າງປະເທດ ໂດຍໄດ້ຮັບກຽດເປັນປະທານກອງປະຊຸມຂອງ ທ່ານ ສົມສະຫວາດ ເລັ່ງສະຫວັດ, ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ອະດີດລັດຖະມົນຕີກະຊວງການຕ່າງປະເທດ, ປະທານກິຕິມະສັກສະໂມສອນນັກການທູດລາວ ແລະ ໃຫ້ກຽດເຂົ້າຮ່ວມກອງປະຊຸມ ດັ່ງກ່າວມີ ບັນດາອະດີດທ່ານທູດອາວຸໂສ, ອະດີດກົງສຸນໃຫຍ່, ພະນັກງານບໍານານ, ຄະນະສະຖາບັນ, ບັນດາຄະນະກົມ, ຄະນະພະແນກ ແລະ ຜູ້ເຂົ້າຮ່ວມທີ່ມາຈາກ ບັນດາກົມຕ່າງໆພາຍໃນກະຊວງການຕ່າງປະເທດ ແລະ ຄະນະພົວພັນຕ່າງປະເທດ ພ້ອມດ້ວຍຄະນະຈັດຕັ້ງກອງປະຊຸມ ລວມທັງໝົດ 80 ທ່ານ.
ກອງປະຊຸມດັ່ງກ່າວ, ໄດ້ດໍາເນີນໄປເປັນເວລາເຄິ່ງວັນ, ເຊິ່ງຈຸດປະສົງຂອງກອງປະຊຸມແມ່ນເພື່ອເປັນການເປີດເວທີໃຫ້ບັນດານັກການທູດອາວຸໂສບໍານານ ທີ່ມີຄວາມຮູ້ ແລະ ປະສົບການສູງເຂົ້າມາເປັນສະມາຊິກ ເພື່ອປະກອບສ່ວນເຂົ້າໃນການເຄື່ອນໄຫວ ຂອງສະໂມສອນນັກການທູດລາວໃຫ້ມີຄວາມຟົດຟື້ນກວ່າເກົ່າ. ນອກຈາກນີ້, ກອງປະຊຸມຍັງໄດ້ຮັບຟັງການສະເໜີການຕີລາຄາສະພາບພົ້ນເດັ່ນໃນໂລກ ໃນຫົວຂໍ້ “ການຈັດລະບຽບໂລກໃໝ່”, ນໍາສະເໜີໂດຍ ທ່ານ ໄຊຍະການ ສີສຸວົງ, ປະທານສະໂມສອນນັກການທູດລາວ, ອະດີດເອກອັກຄະລັດຖະທູດ. ບັນຍາກາດພາຍໃນກອງປະຊຸມແມ່ນມີການແລກປ່ຽນທັດສະນະຕໍ່ບັນຫາພາກພື້ນ ແລະ ສາກົນ ຢ່າງກົງໄປກົງມາຮ່ວມກັບບັນດາແຂກທີ່ເຊີນເຂົ້າຮ່ວມ ດ້ວຍບັນຍາການອັນດີ.
ສະຖາບັນການຕ່າງປະເທດ ໃນນາມເປັນກອງເລຂາຂອງສະໂມສອນນັກການທູດລາວ ແລະ ເປັນຜູ້ຈັດຕັ້ງປະຕິບັດການເຄື່ອນໄຫວກິດຈະກໍາຕ່າງໆຂອງສະໂມສອນ, ທ່ານ ນາງ ວິທະຍາ ໄຊຍະວົງ, ຫົວໜ້າສະຖາບັນການຕ່າງປະເທດ, ຫົວໜ້າສະໂມສອນນັກການທູດ ໄດ້ຂຶ້ນລາຍງານຫຍໍ້ກ່ຽວກັບການເຄື່ອນໄຫວຂອງສະໂມສອນນັກການທູດລາວ ນັບແຕ່ມື້ສ້າງຕັ້ງປີ 2020 ຈົນເຖິງປະຈຸບັນ ແລະ ແຜນການປະຕິບັດວຽກງານໃນຕໍ່ໜ້າ ຕໍ່ກອງປະຊຸມ, ໃນໂອກາດດັ່ງກ່າວ ປະທານກອງປະຊຸມ ໄດ້ສະແດງຄວາມຊົມເຊີຍ ຕໍ່ຜົນສໍາເລັດຂອງການເຄື່ອນໄຫວກິດຈະກໍາຕ່າງໆຂອງສະໂມສອນທີ່ຜ່ານມາ, ພ້ອມທັງໃຫ້ທິດຊີ້ນໍາໃນຕໍ່ໜ້າໃນການສ້າງໃຫ້ສະໂມສອນນັກການທູດ ມີຄວາມເຂັ້ມແຂງຍິ່ງຂຶ້້ນ ກາຍເປັນເວທີປຶກສາຫາລືແລກປ່ຽນ, ປະກອບຄໍາຄິດຄຳເຫັນ ຕໍ່ບັນຫາເຄັ່ງຮ້ອນ ຢູ່ໃນພາກພື້ນ ແລະ ສາກົນ ທີ່ມີການຜັນແປໄປຢ່າງໄວວາ ເພື່ອເປັນບ່ອນອີງໃຫ້ແກ່ ພະນັກງານກະຊວງການຕ່າງປະເທດ ນຳໄປຄົ້ນຄວ້າວິໄຈ ແລະ ຫມູນໃຊ້ໃຫ້ຖືກຕ້ອງເຂົ້າໃນການປະຕິບັດຫນ້າທີ່ຂອງຕົນ. ພ້ອມນັ້ນ, ເພື່ອສືບຕໍ່ສ້າງກິດຈະກຳຕ່າງໆ ໃນການສົ່ງເສີມຄວາມສາມັກຄີຮັກແພງ, ແລກປ່ຽນຄວາມຮູ້ ແລະ ປະສົບການ ລະຫວ່າງ ນັກການທູດອາວຸໂສບຳນານດ້ວຍກັນ ແລະ ເພື່ອກໍ່ສ້າງພະນັກງານກະຊວງການຕ່າງປະເທດ ຮຸ້ນໜຸ່ມນ້ອຍ.