ໃນວັນທີ 15 ມີນາ 2024, ສະຫະພັນແມ່ຍິງກະຊວງການຕ່າງປະເທດ ໄດ້ຈັດພິທີປາຖະກະຖາ ພາຍໃຕ້ຄຳຂວັນ: “ລົງທຶນເລັ່ງໃສ່ການພັດທະນາຄວາມກ້າວໜ້າຂອງແມ່ຍິງ” ແລະ ສະຫຼຸບການເຄື່ອນໄຫວວຽກງານສະຫະພັນແມ່ຍິງກະຊວງການຕ່າງປະເທດ ປີ 2023 ແລະ ທິດທາງແຜນການການເຄື່ອນໄຫວ ປີ 2024 ໃນໂອກາດສະເຫຼີມສະຫຼອງວັນແມ່ຍິງສາກົນຄົບຮອບ 114 ປີ (8 ມີນາ 1910-8 ມີນາ 2024) ທີ່ ກະຊວງການຕ່າງປະເທດ, ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ທຳມາ ເພັດວິໄຊ, ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ; ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ (ຜູ້ຊີ້ນຳອົງການຈັດຕັ້ງມະຫາຊົນ); ທ່ານ ນາງ ອາລຸນີ ກົມມະສິດ, ພັນລະຍາລັດຖະມົນຕີ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ; ຄະນະບໍລິຫານງານສະຫະພັນແມ່ຍິງກະຊວງ; ບັນດາຄະນະກົມ; ຕາງໜ້າອົງການຈັດຕັ້ງຊາວໜຸ່ມ, ສະຫະພັນກຳມະບານ, ບັນດາພັນລະຍາຄະນະນຳກະຊວງ ແລະ ສະມາຊິກສະຫະພັນແມ່ຍິງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ, ທ່ານ ນາງ ທຳມາ ເພັດວິໄຊ, ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ໃຫ້ກຽດບັນຍາຍ ຫົວຂໍ້ “ ຫວນຄືນມູນເຊື້ອປະຫວັດຄວາມເປັນມາຂອງວັນແມ່ຍິງສາກົນ (8 ມີນາ 1910-8 ມີນາ 2024)” ເພື່ອສະແດງໃຫ້ເຫັນຄວາມໝາຍຄວາມສໍາຄັນ ແລະ ປະຫວັດຄວາມເປັນມາແຫ່ງການຕໍ່ສູ້ເພື່ອທວງເອົາສິດ ແລະ ຜົນປະໂຫຍດອັນຊອບທຳຂອງແມ່ຍິງໃນທົ່ວໂລກ. ພ້ອມນັ້ນ, ຍັງຍົກໃຫ້ເຫັນບົດບາດຂອງແມ່ຍິງທີ່ໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ. ໃນໂອກາດດັ່ງກ່າວນີ້, ທ່ານ ນາງ ໄກມະນີ ອໍລະບູນ, ປະທານສະຫະພັນແມ່ຍິງກະຊວງການຕ່າງປະເທດ ໄດ້ຜ່ານບົດສະຫລຸບການເຄື່ອນໄຫວຂອງສະຫະພັນແມ່ຍິງ ປະຈຳປີ 2023 ແລະ ທິດທາງແຜນການປີ 2024 ທີ່ໄດ້ຍົກໃຫ້ເຫັນຜົນງານອັນພົ້ນເດັ່ນ ໃນໄລຍະ 1 ປີ ຜ່ານມາ, ເຊິ່ງເອື້ອຍນ້ອງແມ່ຍິງ ໄດ້ປະຕິບັດວຽກງານຂອງສະຫະພັນແມ່ຍິງ ໄປຄຽງຄູ່ກັບການປະຕິບັດວຽກງານວິຊາສະເພາະ ໄດ້ຢ່າງມີປະສິດທິພາບ ແລະ ມີຜົນສຳເລັດ.
ໃນພິທີ ຍັງໄດ້ມີການມອບໃບຍ້ອງຍໍການຈັດຕັ້ງປະຕິບັດຂໍ້ແຂ່ງຂັນ 3 ດີ ປະຈຳປີ 2023 ຂອງສະຫະພັນແມ່ຍິງກະຊວງການຕ່າງປະເທດ, ຊຶ່ງໃນນັ້ນ ມີບັນດາໜ່ວຍ ແລະ ບຸກຄົນທີ່ໄດ້ຮັບການຍ້ອງຍໍ ຄື: ດີເດັ່ນປະເພດ I ລວມມີທັງໝົດ 17 ໜ່ວຍ ແລະ ບຸກຄົນດີເດັ່ນປະເພດ I ລວມມີທັງໝົດ 235 ສະຫາຍ.
ໃນໂອກາດອັນສະຫງ່າລາສີນີ້, ທ່ານ ທອງຜ່ານ ສະຫວັນເພັດ ໄດ້ໃຫ້ກຽດມີຄຳເຫັນ ແລະ ໂອ້ລົມໃຫ້ຄຳໂອວາດບັນດາສະມາຊິກສະຫະພັນແມ່ຍິງກະຊວງ ໂດຍໄດ້ຕີລາຄາສູງບົດບາດຂອງເອື້ອຍນ້ອງແມ່ຍິງກະຊວງການຕ່າງປະເທດ ທີ່ໄດ້ປະກອບ ສ່ວນອັນສຳຄັນເຂົ້າໃນວຽກງານການຕ່າງປະເທດຕະຫຼອດໄລຍະທີ່ຜ່ານມາ. ພ້ອມນີ້, ໄດ້ສະແດງຄວາມຊົມເຊີຍຕໍ່ຜົນງານທີ່ເອື້ອຍນ້ອງແມ່ຍິງກະຊວງການຕ່າງປະເທດ ຍາດມາໄດ້ ເຊິ່ງມີຜົນສຳເລັດຫລາຍດ້ານ.
ພິທີປາຖະກະຖາ ໄດ້ດຳເນີນໄປຢ່າງມີຄວາມໝາຍສຳຄັນ, ເປັນຂະບວນຟົດຟື້ນ ແລະ ສຳເລັດລົງ ດ້ວຍຜົນສຳເລັດອັນຈົບງາມ.