ໃນວັນທີ 19 ມີນາ 2024, ໄດ້ມີການຈັດງານ​ແຂ່ງຂັນກິລາບານເຕະຍິງ-ຊາຍ ລະຫວ່າງ 2 ການຈັດຕັ້ງ ກະຊວງການຕ່າງປະເທດ ແລະ ຄະນະຈັດຕັ້ງສູນກາງພັກ ທີ່ ເດີ່ນກິລາບານເຕະເທບປັນຍາ, ໂດຍການເປັນປະທານຮ່ວມ ຂອງ ທ່ານ ຕິ່ງ ສຸກສັນ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ນ. ບຸດສະດີ ທະນະເມືອງ, ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ໃນໂອກາດ 2 ວັນທີ່ສຳຄັນຂອງພັກ-ລັດ ພວກເຮົາ ກໍຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ (22 ມີນາ 1955-22 ມີນາ 2024) ແລະ ວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 69 ປີ (25 ມີນາ 1955-25 ມີນາ 2024).

ສອງການຈັດຕັ້ງ ກະຊວງການຕ່າງປະເທດ ແລະ ຄະນະຈັດຕັ້ງສູນກາງພັກ ໄດ້ຮ່ວມກັນສ້າງແຜນການຈັດຂະບວນການງານກິລາມິດຕະພາບ ເພື່ອເປັນການຂໍ່ານັບຮັບຕ້ອນ ໃນວັນສໍາຄັນດັ່ງກ່າວ ໂດຍສະເພາະກໍ່ຄືວັນສ້າງຕັ້ງຄະນະຈັດຕັ້ງສູນກາງພັກ ຄົບຮອບ 69 ປີ, ເພື່ອເປັນການເພີ່ມທະວີຮັດແໜ້ນຄວາມສາມັກຄີລະຫວ່າງ ພະນັກງານ-ລັດຖະກອນ ຂອງ 2 ການຈັດຕັ້ງ ໃຫ້ນັບມື້ແໜ້ນແຟ້ນ ແລະ ກົມກຽວຢິ່ງຂຶ້ນ. ໃນງານແຂ່ງຂັນກິລາສາມັກຄີຄັ້ງນີ້ເປັນຄັ້ງທຳອິດທີ່ສອງການຈັດຕັ້ງໄດ້ຈັດຮ່ວມກັນ, ໂດຍເຊື່ອໝັ້ນວ່າ ງານກິລາດັ່ງກ່າວ ຈະເປັນການສ້າງຂະບວນຟົດຟື້ນ, ມ່ວນຊື່ນ ແລະ ເປັນມິນິດໝາຍທີ່ດີ ຕໍ່ 2 ການຈັດຕັ້ງ ກໍ່ຄືພະນັກງານ-ລັດຖະກອນ 2 ພາກສ່ວນ ແລະ ຫວັງຢ່າງຍິ່ງວ່າ ໃນປີຕໍ່ໆໄປສອງການຈັດຕັ້ງ ຈະສືບຕໍ່ສ້າງກິດຈະກຳ ເພື່ອເປັນການຮັດແໜ້ນຄວາມສາມັກຄີ ແລະ ການຮ່ວມມືດ້ານວິຊາການຕ່າງໆ ຂອງ 2 ພາກສ່ວນຕໍ່ໄປ.