ພະນະທ່ານ ຣານີລ ວິກກ໌ເຮເມຊິງ

ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ປະຊາທິປະໄຕ ສີລັງກາ

ທີ່ ໂກລົມໂບ

ພະນະທ່ານ,

ຂ້າພະເຈົ້າ ໄດ້ຮັບຂ່າວເຫດການນ້ຳຖ້ວມ ແລະ ດິນເຊາະເຈື່ອນ ຊຶ່ງໄດ້ຮັບຜົນກະທົບຈາກຝົນຕົກໜັກທີ່ເກີດຂຶ້ນຢູ່ ສີລັງກາ, ໃນວັນທີ 17 ແລະ 18 ພຶດສະພາ 2016 ທີ່ຜ່ານມາ, ອັນໄດ້ເຮັດໃຫ້ມີຜູ້ເສຍຊີວິດ, ໄດ້ຮັບບາດເຈັບ ແລະ ສູນຫາຍເປັນຈຳນວນຫຼາຍ ແລະ ຊັບສິນຂອງປະຊາຊົນຖືກທຳລາຍ.

ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈ ມາຍັງ ພະນະທ່ານ, ລັດຖະບານ ແລະ ປະຊາຊົນ ແຫ່ງ ສີລັງກາ, ໂດຍສະເພາະຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍຈາກໄພທຳມະຊາດໃນຄັ້ງນີ້.

ຂ້າພະເຈົ້າເຊື່ອໝັ້ນວ່າ ພາຍໃຕ້ການນຳພາຂອງ ພະນະທ່ານ, ລັດຖະບານ ແລະ ປະຊາຊົນ ສີລັງກາ ຈະສາມາດຜ່ານຜ່າຄວາມຫຍຸ້ງຍາກ ຈາກໄພທຳມະຊາດໃນຄັ້ງນີ້ ແລະ ຟື້ນຟູຊີວິດການເປັນຢູ່ຂອງປະຊາຊົນ ໃຫ້ກັບສູ່ສະພາບປົກກະຕິໂດຍໄວ.

ດ້ວຍຄວາມນັບຖືຢ່າງສູງ,

ທອງລຸນ ສີສຸລິດ

ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ນະຄອນຫຼວງວຽງຈັນ, ວັນທີ 20 ພຶດສະພາ 2016