ເຖິງ:

- ສະ​ຫາຍຫງວຽນ​ ຟູ​ ຈ້ອງ, ເລ​ຂາ​ທິ​ການ​ໃຫຍ່​ ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ກອມ​ມູ​ນິດຫວຽດ​ນາມ.

- ສະ​ຫາຍເຈີນ ​ດ້າຍກວາງ, ປະ​ທານ​ປະ​ເທດ​ ແຫ່ງ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ​ ຫວຽດ​ນາມ.

                                              ທີ່ນະ​ຄອນຫຼວງ​ຮ່າ​ໂນ້ຍ.

ຂ້າພະ​ເຈົ້າ​ ພ້ອມ​ດ້ວຍ​ຄະນະຜູ້ແທນຂັ້ນສູງ ພັກ - ລັດ ລາວ ໄດ້ເດີນ​ທາງ​ກັບ​ຄືນ​ເຖິງ​ປະ​ເທດ ດ້ວຍ​ຄວາມສະຫວັດດີ​ພາບ​ທຸກ​ປະການ. ​ຕາງໜ້າ​ຄະນະຜູ້​ແທນ, ຂ້າພະ​ເຈົ້າຂໍ​ສະ​ແດງ​ຄວາມ​ຂອບອົກ​ຂອບໃຈ​ຢ່າງຈິງ​​ໃຈ​ມາ​ຍັງ​ ສະຫາຍ​ ເລຂາທິການ​ໃຫຍ່ ຫງວຽນ ​ຟູ ຈ້ອງ, ສະຫາຍ ​ປະທານ​ປະ​ເທດ ເຈີນ ​ດ້​າຍ ກວາງ, ບັນດາ​ສະ​ຫາຍ​ການ​ນຳ​ ພັກ, ລັດ ​ແລະ ປະຊາ​ຊົນຫວຽດນາມ ອ້າຍ​ນ້ອງ ທີ່ນະຄອນ ຫຼວງ​ຮ່າ​ໂນ້ຍ ​ແລະ ແຂວງເຫງະອານ ທີ່​ໄດ້​ໃຫ້ການ​ຕ້ອນຮັບ​ຢ່າງ​ອົ​ບອຸ່ນ, ສະໜິດສະ​ໜົມ, ​ສົມ​ກຽດ​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ ຖານ​ສະຫາຍ​ອ້າ​ຍນ້ອງ ​ແກ່​ຄະນະພວກ​ຂ້າພະ​ເຈົ້າ ຕະຫຼອດ​ໄລຍະ​ຂອງການ​ຢ້ຽມຢາມ ສສ ຫວຽດນາມ ຢ່າງເປັນທາງການ ​ໃນ​ຄັ້ງ​ນີ້.

ຂ້າພະ​ເຈົ້າ​ ເຊື່ອ​ໝັ້ນ​ຢ່າງ​ໜັ​ກ​ແໜ້ນ​ວ່າ ຜົນສຳ​ເລັດ​ຂອງ​ການຈັດສະເຫຼີມສະຫຼອງສອງວັນປະຫວັດສາດ ໃນກອບຂອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2017, ກໍ່ຄືການພົບປະແລກປ່ຽນຄຳຄິດເຫັນຢ່າງເລິກເຊິ່ງ, ກົງໄປກົງມາ ລະຫວ່າງ ການນຳຂັ້ນສູງສອງພັກ, ສອງລັດ ພວກເຮົາໃນຄັ້ງນີ້ ຈະເປັນການປະກອບສ່ວນສຳຄັນໃນການເພີ່ມພູນສາ​ຍພົວພັນ​ມິດຕະພາບ​ອັນອັນຍິ່ງໃຫຍ່​, ຄວາມ​ສາມັກຄີ​ພິ​ເສດ ແລະ ການ​ຮ່ວມ​ມື​ຮອບດ້ານ ລະຫວ່າງ​ ສອງ​ພັກ, ສອງ​ລັດ ​ແລະ ປະຊາຊົນສອງ​ຊາດ ລາ​ວ-ຫວຽດນາມ ໃຫ້​ນັບ​ມື້​ນັບ​ໄດ້​ຮັບ​ການເສີມຂະຫຍາຍຕົວຂຶ້ນ​ສູ່​ລະດັບ​ສູງ​ໃໝ່​, ແຕກ​ດອກ​ອອກ​ຜົນ​ຍິ່ງໆ​ຂຶ້ນ ແລະ ​ນຳ​ເອົາ​ຜົນ​ປະ​ໂຫຍ​ດຕົວ​ຈິງ​ ມາ​ສູ່ປະຊາຊົນ​ສອງ​ຊາດ​ຂອງພວກ​ເຮົາ.

ຂໍ​ອວຍພອນ​​ໃຫ້ ປະຊາຊົນ ຫວຽດນາມ ​ອ້າຍນ້ອງ​ ໂດຍ​ພາຍ​ໃຕ້​ການ​ນຳພາ​ຂອງ​ພັກ​ກອມ​ມູນິດ ຫວຽດນາມ ທີ່ມີ ສະຫາຍ ເລຂາທິການໃຫຍ່ ຫງວຽນ ຟູ ຈ້ອງ ເປັນຜູ້ນຳໜ້ານັ້ນ ຈົ່ງ​ສືບຕໍ່ຍາດໄດ້ຜົນສຳ​ເລັດ​ອັນ​ໃໝ່ໃຫຍ່​ຫຼວງ​ກວ່າເກົ່າ ໃນການ​ສ້າງສາພັດທະນາປະເທດຊາດ ຕາມແນວທາງປ່ຽນ ແປງໃໝ່, ຈັດ​ຕັ້ງ​ຜັນ​ຂະ​ຫຍາຍ​ມະ​ຕິກອງ​ປະ​ຊຸມ​ໃຫຍ່ ​ຄັ້ງ​ທີ XII ຂອງ​ພັກ​ກອມ​ມູ​ນິດ ຫວຽດ​ນາມ ເພື່ອຫັນ ສສ ຫວຽດນາມ ​ເປັນ​ປະ​ເທດ​ອຸດສາຫະກຳ ຕາມທິດ​ທັນ​ສະ​ໄໝ ແລະ ບັນລຸເປົ້າໝາຍ ເຮັດ​ໃຫ້ປະຊາ​ຊົນ​ ຮັ່ງມີ​ຜາ​ສຸກ, ປະ​ເທດ​ຊາດ ມັ່ງ​ຄັ່ງ​ເຂັ້ມ​ແຂງ, ປະຊາທິປະ​​ໄຕ, ຍຸຕິ​ທຳ ​ແລະ ສີວິ​ໄລ.

ຂໍອວຍພອນ​ໃຫ້​ສາຍ​ພົວພັນ​ມິດຕະພາບອັນ​ຍິ່ງໃຫຍ່, ​ຄວາ​ມສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ​ລະຫວ່າງ​ ສອງ​ພັກ, ສອງ​ລັດ ​ແລະ ປະຊາຊົນ ​ສອງ​ຊາດ ລາ​ວ-ຫວຽດນາມ ຈົ່ງໝັ້ນຄົງ​ຂະ​ໜົງ​ແກ່ນຊົ່ວ​ກາລະ​ນານ.

ອວຍພອນ​ໃຫ້ ສະຫາຍ​ເລຂາທິການ​ໃຫຍ່ ຫວຽນ ​ຟູ ຈ້ອງ, ສະຫາຍປະທານ​ປະ​ເທດ ເຈີນ    ດ້​າຍ ກວາງ ພ້ອມ​ດ້ວຍການນຳຂັ້ນສູງ ພັກ-ລັດ ຫວຽດນາມ​ ຈົ່ງ​ມີ​ສຸຂະ​ພະ​ລາ​ນາ​ໄມ​ສົມບູນມີ​ຄວາມ​ຜາ​ສຸກ ​ແລະ ປະສົບ​ຜົນສຳ​ເລັດ​ໃນ​ໜ້າ​ທີ່​ວຽກງານ​ອັນ​ສູງ​ສົ່ງ ​ແລະ ມີ​ກຽດ​ສະຫງ່າຂອງບັນດາ​ສະຫາຍ.

ບຸນ​ຍັງວໍ​ລະ​ຈິດ

ເລ​ຂາ​ທິ​ການ​ໃຫຍ່​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ 

ປະ​ທານ​ປະ​ເທດ​ ແຫ່ງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນລາວ

ນະ​ຄອນຫຼວງວຽງ​ຈັນ, ວັນ​ທີ 21 ທັນ​ວາ 2017