ນະຄອນຫຼວງວຽງຈັນ, ວັນທີ 13ກໍລະກົດ 2018

ພະນະທ່ານເອັມມານູແອນມາຄຣົງ

ປະທານາທິບໍດີແຫ່ງສາທາລະນະລັດຝຣັ່ງ

ທີ່ປາຣີ

ພະນະທ່ານ,

ເນື່ອງໃນໂອກາດວັນຊາດແຫ່ງສາທາລະນະລັດຝຣັ່ງ, ໃນນາມປະຊາຊົນລາວແລະໃນນາມສ່ວນຕົວ,ຂ້າພະເຈົ້າຂໍສົ່ງຄຳຊົມເຊີຍອັນອົບອຸ່ນແລະພອນໄຊອັນປະເສີດມາຍັງພະນະທ່ານແລະປະຊາຊົນຝຣັ່ງ      ທຸກຖ້ວນໜ້າຈົ່ງມີແຕ່ຄວາມຜາສຸກ, ມີຜົນສຳເລັດແລະວັດທະນະຖາວອນ.

ຂ້າພະເຈົ້າມີຄວາມພາກພູມໃຈເປັນຢ່າງຍິ່ງທີ່ເຫັນວ່າສາຍພົວພັນມິດຕະພາບແລະຮ່ວມມືລະຫວ່າງ   ສອງປະເທດລາວ-ຝຣັ່ງມີຄວາມເຂັ້ມແຂງ ແລະ ຂະຫຍາຍຕົວຂຶ້ນເລື້ອຍໆແລະ ຂໍສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນແລະຊ່ວຍເຫຼືອອັນລ້ຳຄ່າ ຂອງປະເທດຝຣັ່ງ, ໂດຍສະເພາະ ພາຍໃນຂອບການຮ່ວມມືສອງຝ່າຍແລະ ອົງການບັນດາປະເທດທີ່ໃຊ້ພາສາຝຣັ່ງ(ຝຣັ່ງໂກໂຟນີ) ກໍຄືສະຫະພາບເອີຣົບ,​ ອັນເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງສປປລາວ ເພື່ອໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020.

ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າສາຍພົວພັນມິດຕະພາບແລະການຮ່ວມມືດັ່ງກ່າວຈະສືບຕໍ່ໄດ້ຮັບການຮັດແໜ້ນ ແລະ ເສີມຂະຫຍາຍໃຫ້ເລິກເຊິ່ງ ແລະ ມີປະສິດທິຜົນຍິ່ງໆຂຶ້ນ ໃນຊຸມປີຕໍ່ໜ້າ,ເພື່ອຜົນປະໂຫຍດຂອງປະຊາຊົນສອງຊາດ ກໍຄືເພື່ອສັນຕິພາບໂລກ, ສະຖຽນລະພາບ ແລະ ການພັດທະນາແບບຍືນຍົງໃນຂົງເຂດພາກພື້ນ ແລະ ໃນທົ່ວໂລກ.

           ດ້ວຍຄວາມນັບຖືຢ່າງສູງ,

                   ບຸນ​ຍັງວໍລະ​ຈິດ

                  ປະທານປະເທດ

                ແຫ່ງສາທາລະນະລັດປະຊາທິປະໄຕປະຊາຊົນລາວ

ນະຄອນຫຼວງ​ວຽງ​ຈັນ, ວັນ​ທີ 13ກໍລະກົດ 2018

ພະ​ນ​ະ​ທ່ານເອດູອາກຟີລິບ

ນາຍົກລັດ​ຖະ​ມົນ​ຕີ​ແຫ່ງສາ​ທາ​ລະ​ນະ​ລັດ​ຝ​ຣັ່ງ

ທີ່ປາ​ຣີ

ພະ​ນະ​ທ່ານ,

ເນື່ອງ​ໃນ​ໂອ​ກາດວັນ​ຊາດ​ ແຫ່ງສາ​ທາ​ລະ​ນະ​ລັດຝ​ຣັ່ງ, ໃນ​ນາມ​ລັດ​ຖະ​ບານແຫ່ງສາ​ທາລະ​ນະ​ລັດ       ປະ​ຊາ​ທິ​ປະ​ໄຕປ​ະ​ຊາ​ຊົນ​ລາວ​ ແລະໃນ​ນາມ​ສ່ວນ​ຕົວ, ຂ້າ​ພະ​ເຈົ້າມີ​ຄວາມ​ປິ​ຕິ​ຊື່ນ​ຊົມເປັນ​ຢ່າງ​ຍິ່ງ​ສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນແລະພອນ​ໄຊ​ອັນ​ປະ​ເສີດ​ ມາ​ຍັງ​ພະ​ນະ​ທ່ານແລະຄະນະ​ລັດ​ຖະ​ບານ​ຝ​ຣັ່ງ​ທຸກ​ຖ້ວນ​ໜ້າ.

ຂ້າ​ພະ​ເຈົ້າ ເຊື່ອ​ໝັ້ນ​ຢ່າງ​ໜັກ​ແໜ້ນ​ວ່າສາຍພົວ​ພັນມິດຕະພາບແລະການ​ຮ່ວມ​ມື​ອັນ​ເປັນ​ມູນ​ເຊື້ອ     ລະ​ຫວ່າງສ​ປ​ປລາວແລະສາ​ທາ​ລະ​ນະ​ລັດ ​ຝ​ຣັ່ງຈະ​ໄດ້​ຮັບ​ການ​ເສີມ​ຂະ​ຫຍາຍ​ໃຫ້​ເຂັ້​ມ​ແຂງແລະແຕກ​ດອກ ອອກ​ຜົນ​ຍິ່ງໆ​ຂຶ້ນ​ໃນ​ຊຸມປີ​ຕໍ່​ໜ້າເພື່ອ​ຜົນ​ປະ​ໂຫຍດຂອງ​ປະ​ຊາ​ຊົນ​ສອ​ງ​ຊາດ​ພ​ວກ​ເຮົາ, ກໍ​ຄື​ເພື່ອສັນ​ຕິ​ພາບ, ສະຖຽນລະພາບ ແລະການ​ຮ່ວມ​ມືເພື່ອການພັດທະນາແບບຍືນຍົງໃນພາກພຶ້ນ ແລະ ໃນໂລກ.

             ດ້ວຍ​ຄວາມ​ນັບ​ຖື​ຢ່າງ​ສູງ

                   ທອງລຸນສີ​ສຸ​ລິດ

             ນາ​ຍົກ​ລັດ​ຖະ​ມົນ​ຕີ​ແຫ່ງ

                                                                 ສາທາລະນະລັດປະຊາທິປະໄຕປະຊາຊົນລາວ

ນະຄອນຫຼວງວຽງຈັນ, ວັນທີ 13ກໍລະກົດ 2018

ພະ​ນະ​ທ່ານຊັງອີວວ໌ເລີດຣຽງ,

ລັດ​ຖະ​ມົນ​ຕີ​​ກິດຈະການເອີຣົບແລະການ​ຕ່າງ​ປະ​ເທດ

ແຫ່ງສາ​ທາ​ລະ​ນະ​ລັດ​ຝ​ຣັ່ງ

ທີ່ປາ​ຣີ

ພະ​ນະ​ທ່ານ,

ເນື່ອງ​ໃນ​ໂອ​ກາດ​ວັນ​ຊາດແຫ່ງສາ​ທາ​ລະ​ນະ​ລັດ​ຝ​ຣັ່ງ, ຂ້າ​ພະ​ເຈົ້າຂໍ​ຖື​ເປັນ​ກຽດ​ສົ່ງ​ຄຳ​ຊົມ​ເຊີຍ​ຢ່າງ​ຈິງ​ໃຈແລະອວຍພອນ​​ ໃຫ້​ພະ​ນະ​ທ່ານ​ຈົ່ງ​ມີ​ສຸ​ຂະ​ພາບ​ເຂັ້ມ​ແຂງ,ມີ​ຄວາມ​ຜາ​ສຸກແລະປະສົບຜົນ​ສຳ​ເລັດ​ທຸກ​ປະ​ການໃນ​ການ​ປະ​ຕິ​ບັດ​ໜ້າ​ທີ່​ອັນ​ສູງ​ສົ່ງ​ຂອງ​ຕົນ.

ຂ້າ​ພະ​ເຈົ້າເຊື່ອ​ໝັ້ນ​ວ່າ​ດ້ວຍຄວາມພະຍາຍາມຮ່ວມກັນເພີ່ມຂຶ້ນ ສາຍ​ພົວ​ພັນ​ມິດ​ຕະ​ພາບແລະການ​ຮ່ວມ​ມື​ອັນ​ດີ, ທັງໃນຂອບສອງຝ່າຍ ແລະ ຫຼາຍຝ່າຍ,ລະ​ຫວ່າງ​ສອງ​ປະ​ເທດ​ກໍ່​ຄື​ສອງ​ກະຊ​ວງການ​ຕ່າງ​ປະ​ເທດ​ພວກ​ເຮົາຈະສືບຕໍ່ໄດ້ຮັບການເສີມຂະຫຍາຍໃຫ້​ເຂັ້ມ​ແຂງແລະມີ​ປະ​ສິດ​ທິ​ຜົນ​ຍິ່ງໆ​ຂຶ້​ນ​ໃນ​ອະ​ນາ​ຄົດ, ເພື່ອ​ຜົນ​ປະ​ໂຫຍດ​ຂອງ​ປະ​ຊາ​ຊົນ​ສອງ​ຊາດ​ພວກ​ເຮົາ, ກໍ​ຄືເພື່ອ​ສັນ​ຕິ​ພາບ, ສະຖຽນລະພາບແລະກາ​ນ​ຮ່ວມ​ມື​ເພື່ອ​ການ​ພັດ​ທະ​ນາ​ແບບ​ຍືນ​ຍົງ​ໃນ​ພາກ​ພື້ນແລະໃນ​ໂລກ.

ດ້ວຍ​ຄວາມ​ນັບ​ຖື​ຢ່າງ​ສູງ,

ສະເຫຼີມໄຊກົມມະສິດ

ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ

                               ແຫ່ງສາທາລະນະລັດປະຊາທິປະໄຕປະຊາຊົນລາວ