ນະຄອນຫຼວງວຽງຈັນ, ວັນທີ 20 ສິງຫາ 2019

ສະຫາຍ ຫລີ ເຄີສຽງ ທີ່ນັບຖື,

          ຂ້າພະເຈົ້າ ຂໍສະແດງຄວາມເສົ້າສະຫຼົດໃຈເປັນຢ່າງຍິ່ງ ຕໍ່ເຫດການອຸບັດຕິເຫດລົດໂດຍສານ ເສຍຫຼັກຕົກເຫວ ຢູ່ ແຂວງຫຼວງພະບາງ ສປປ ລາວ ໃນຕອນແລງຂອງວັນທີ 19 ສິງຫາ 2019 ນີ້, ເຊິ່ງເຮັດໃຫ້ມີຜູ້ເສຍຊີວິດ ແລະ ມີຜູ້ໄດ້ຮັບບາດເຈັບ ຊຶ່ງໃນນັ້ນມີນັກທ່ອງທ່ຽວຈາກ ສປ ຈີນ ເປັນຈໍານວນຫຼາຍ. ເຈົ້າໜ້າທີ່ກ່ຽວຂ້ອງທຸກພາກສ່ວນ ກໍາລັງຊ່ວຍກອບກູ້ ແລະ ຊ່ວຍເຫຼືອຜູ້ບາດເຈັບ ພ້ອມທັງ ດໍາເນີນການສອບສວນຫາສາເຫດ ຂອງ ອຸບັດຕິເຫດ ດ້ວຍຄວາມເອົາໃຈໃສ່.

        ໃນນາມ ລັດຖະບານ ແລະ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມ ເສົ້າສະຫຼົດໃຈຢ່າງສຸດຊຶ້ງ ຕໍ່ການສູນເສຍຄັ້ງນີ້ ໂດຍສະເພາະຕໍ່ຄອບຄົວຜູ້ປະສົບເຄາະຮ້າຍໃນເຫດການດັ່ງກ່າວ. ຂ້າພະເຈົ້າໄດ້ຊີ້ນໍາຢ່າງໃກ້ຊິດ ເພື່ອໃຫ້ພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນ ຊ່ວຍກອບກູ້ເອົາຜູ້ເສຍຊີວິດ ແລະ ຊ່ວຍເຫຼືອຜູ້ໄດ້ຮັບບາດເຈັບທັງໝົດໃຫ້ປອດໄພ ເພື່ອສາມາດກັບຄືນ ສປ ຈີນ ໃນເວລາອັນໃກ້ນີ້.

ດ້ວຍຄວາມນັບຖືຢ່າງສູງ,

ທອງລຸນ ສີສຸລິດ

ນາຍົກລັດຖະມົນຕີ ແຫ່ງ ສປປ ລາວ

ສະຫາຍ ຫລີ ເຄີສຽງ, ນາຍົກລັດຖະມົນຕີ

ແຫ່ງ ສາທາລະນະລັດ ປະຊາຊົນຈີນ

ທີ່ ນະຄອນຫຼວງປັກກິ່ງ

------------------------------------------------------------------------

ສະຫາຍ ຫວັງ ອີ້,

ທີ່ປຶກສາແຫ່ງລັດ

ລັດຖະມົນຕີກະຊວງການຕ່າງປະເທດ

ແຫ່ງ ສາທາລະນະລັດ ປະຊາຊົນຈີນ.                             

ສະຫາຍ ຫວັງ ອີ້ ທີ່ນັບຖື,

            ຂ້າພະເຈົ້າ ຂໍສະແດງຄວາມເສົ້າສະຫລົດໃຈເປັນຢ່າງຍິ່ງຕໍ່ເຫດການ ອຸບັດຕິເຫດລົດໂດຍສານຕົກເຫວ ຢູ່ ບ້ານນາເມືອງ, ເມືອງນານ, ແຂວງຫລວງພະບາງ ໃນຕອນແລງຂອງວັນທີ 19 ສິງຫາ 2019 ເຊິ່ງເຮັດໃຫ້ນັກທ່ອງທ່ຽວຈາກ ສປ ຈີນ ເສຍຊີວິດ ແລະ ໄດ້ຮັບບາດເຈັບຈໍານວນຫລາຍ.

          ຂ້າພະເຈົ້າ ໃນນາມສ່ວນຕົວ ກໍຄືການນຳ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ຂໍສະແດງຄວາມເສຍໃຈເປັນຢ່າງສຸດຊຶ້ງຕໍ່ເຫດການທີ່ເກີດຂຶ້ນ ແລະ ຂໍແບ່ງເບົາຄວາມທຸກໂສກມາຍັງລັດຖະ ບານ ແລະ ປະຊາຊົນຈີນ ໂດຍສະເພາະຕໍ່ຄອບຄົວຜູ້ເສຍຊີວິດ ແລະ ໄດ້ຮັບບາດເຈັບໃນຄັ້ງນີ້. ກະຊວງການຕ່າງປະເທດຂອງພວກຂ້າພະເຈົ້າ ໄດ້ເອົາໃຈໃສ່ປະສານສົມທົບກັບທຸກພາກສ່ວນທີ່ກ່ຽວຂ້ອງ ໃນການໃຫ້ການຊ່ວຍເຫລືອ ແລະ ກອບກູ້ຜູ້ຖືກເຄາະຮ້າຍຢ່າງເຕັມທີ່ ລວມທັງອຳນວຍຄວາມສະດວກຕ່າງໆແກ່ຄອບຄົວຂອງຜູ້ຖືກເຄາະຮ້າຍໃນຄັ້ງນີ້.

ດ້ວຍຄວາມນັບຖືຢ່າງສູງ,

ສະເຫລີມໄຊ ກົມມະສິດ

ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ

ນະຄອນຫຼວງວຽງຈັນ, ວັນທີ 22 ສິງຫາ 2019