ພະລາດສະວັງ ອິດສະຕານາ ເນກາຣາ
ກົວລາລຳເປີ
ວັນທີ 1 ເມສາ 2021
ພະນະທ່ານ ທອງລຸນ ສີສຸລິດ
ປະທານປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ທີ່ ນະຄອນຫຼວງວຽງຈັນ
ພະນະທ່ານ,
ເນື່ອງໃນໂອກາດອັນສະຫງ່າລາສີ ເປີດກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສະໄໝທີ 11, ພວກຂ້າພະເຈົ້າ ຂໍສະແດງຄວາມຊົມເຊີຍອັນອົບອຸ່ນມາຍັງ ພະນະທ່ານ ທີ່ໄດ້ຮັບເລືອກຕັ້ງເປັນປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ພວກຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງຕໍ່ກັບສາຍພົວພັນທີ່ດີເລີດ ແລະອົບອຸ່ນ ລະຫວ່າງ ມາເລເຊຍ ແລະສປປ ລາວ. ພວກຂ້າພະເຈົ້າ ຫວັງວ່າ ສອງປະເທດຂອງພວກເຮົາ ຈະສືບຕໍ່ຮັດແໜ້ນເພື່ອຜົນປະໂຫຍດຂອງສອງຊາດຂອງພວກເຮົາ.
ຂ້າພະເຈົ້າ ແລະສົມເດັດ ມະເຫສີ ຣາຈາ ເປີໄມຊູຣິ ຂໍອວຍພອນໄຊອັນປະເສີດ ມາຍັງ ພະນະທ່ານ ແລະ ພັນລະຍາ ທ່ານ ນາງ ນາລີ ສີສຸລິດ ຈົ່ງມີສຸຂະພາບເຂັ້ມແຂງ ແລະມີຄວາມຜາສຸກ ແລະ ສາທາລະນະລັດ ປະຊາທິປະໄຕ ປະຊາຊົນລາວ ສືບຕໍ່ມີຄວາມສະຫງົບສຸກ ແລະ ມີຄວາມວັດທະນະຖາວອນຕະຫຼອດໄປ.
[ລາຍເຊັນ]
ສົມເດັດ ອັນ-ຊຸນຕັນ ອັບດຸນລາ ຣິ ອາຢາຕູດິນ ອັນ-ມຸສຕາຟາ ບິນລາ ຊາ ອິບນີ-ອັນມາຮຸມ ຊຸນຕັນ ຮາຈີ ອາມັດຊາ ອັນມູສຕາຟາ ອິນບິນລາ
ສົມເດັດຣາຊາທິບໍດີ ແຫ່ງ ມາເລເຊຍ
ພະນະທ່ານ ພັນຄຳ ວິພາວັນ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ທີ່ ນະຄອນຫຼວງວຽງຈັນ
ພະນະທ່ານ,
ໃນນາມລັດຖະບານ ແລະປະຊາຊົນ ມາເລເຊຍ, ຂ້າພະເຈົ້າ ຂໍສະແດງຄວາມຊົມເຊີຍອັນອົບອຸ່ນ ມາຍັງ ພະນະທ່ານ ທີ່ໄດ້ຮັບການແຕ່ງຕັ້ງເປັນນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາຂອງພະນະທ່ານ, ສປປ ລາວ ຈະສືບຕໍ່ປະສົບຜົນສຳເລັດຕາມຄວາມມຸ້ງມາດປາດຖະໜາຂອງປະຊາຊົນລາວທັງຊາດ. ຂ້າພະເຂົ້າ ຫວັງຢ່າງຍິ່ງວ່າ ສອງປະເທດຂອງພວກເຮົາ ຈະສືບ ຕໍ່ໄດ້ຮັບຜົນປະໂຫຍດຈາກການຮ່ວມມືທີ່ໃກ້ຊິດ, ມິດຕະພາບ ແລະການພົວພັນຮ່ວມມືສອງຝ່າຍ. ດັ່ງທີ່ປະເທດຊາດຂອງພວກເຮົາພວມສຸມໃສ່ການຟື້ນຟູເສດຖະກິດພາຍຫຼັງການແຜ່ລະບາດຂອງພະຍາດໂຄວິດ-19, ມາເລເຊຍ ກໍ່ຍັງຈະສືບຕໍ່ເສີມຂະຫຍາຍການພົວພັນຮ່ວມມືກັບ ສປປ ລາວ. ຂ້າພະເຈົ້າ ຫວັງຢ່າງຍິ່ງວ່າ ມາເລເຊຍ ແລະສປປ ລາວ ຈະສາມາດເອົາຊະນະທຸກໆບັນຫາທີ່ກຳລັງປະເຊີນຢູ່ໄປພ້ອມໆກັນ ແລະການໄປມາຫາສູ່ກັນລະຫວ່າງປະຊາຊົນສອງຊາດຂອງພວກເຮົາ ໃນອະນາຄົດອັນໃກ້ນີ້.
ຂ້າພະເຈົ້າ ຂໍຖືໂອກາດນີ້ ຢືນຢັນຄືນຄວາມມຸ້ງມາດປາດຖະໜາຂອງມາເລເຊຍ ໃນການເຮັດວຽກຮ່ວມກັບ ສປປ ລາວ ເພື່ອບັນລຸເປົ້າໝາຍຂອງອາຊຽນ ແລະສ້າງບາດກ້າວໃໝ່, ສ້າງໃຫ້ອາຊຽນກາຍເປັນແກນກາງແຫ່ງສັນຕິພາບສະຖຽນລະພາບ ແລະຄວາມວັດທະນະຖາວອນ ໃນພາກພື້ນ.
ຂ້າພະເຈົ້າ ຂໍຖືໂອກາດນີ້ ຮຽນເຊີນພະນະທ່ານ ເດີນທາງຢ້ຽມຢາມທາງການ ທີ່ ມາເລເຊຍ ໃນເວລາທີ່ພະນະທ່ານ ມີຄວາມສະດວກ.
ດ້ວຍຄວາມນັບຖືຢ່າງສູງ.
[ລາຍເຊັນ]
ຕັນ ສຣິ ມູຢິດດິນ ຢັດຊິນ
ພະນະທ່ານ ສະເຫຼີມໄຊ ກົມມະສິດ
ລັດຖະມົນຕີຕ່າງປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ທີ່ ນະຄອນຫຼວງວຽງຈັນ
ພະນະທ່ານ,
ຂ້າພະເຈົ້າ ມີຄວາມຮູ້ສຶກປິຕິຍິນດີເປັນຢ່າງຍິ່ງ ສົ່ງຄຳຊົມເຊີຍອັນອົບອຸ່ນ ມາຍັງ ພະນະທ່ານ ທີ່ໄດ້ຮັບແຕ່ງຕັ້ງເປັນລັດຖະມົນຕີຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ອີກສະໄໝໜຶ່ງ.
ມາເລເຊຍ ແລະ ສປປ ລາວ ມີສາຍພົວພັນທີ່ຍາວນານ ແລະການຮ່ວມມືສອງຝ່າຍທີ່ດີເລີດ, ຂ້າພະເຈົ້າ ຍິນດີທີ່ຈະສືບຕໍ່ຮ່ວມເຮັດວຽກກັບ ພະນະທ່ານ ເພື່ອເສີມຂະຫຍາຍການຮ່ວມມືສອງຝ່າຍໃນຫຼາຍຂົງເຂດເພື່ອຜົນປະໂຫຍດຂອງປະເທດຊາດຂອງພວກເຮົາ. ຂ້າພະເຈົ້າ ຫວັງວ່າ ຈະໄດ້ຮ່ວມປືກສາຫາລືການຮ່ວມມືສອງຝ່າຍຢ່າງລະອຽດຮ່ວມກັບ ພະນະທ່ານ ໃນກອງປະຊຸມຄະນະກຳມາທິການຮ່ວມສອງຝ່າຍ ຄັ້ງທີ 4 ຫຼື JC ຈັດຂຶ້ນທີ່ ສປປ ລາວ ໃນອະນາ ຄົດອັນໃກ້ນີ້.
ດ້ວຍຄວາມພະຍາຍາມຮ່ວມກັນຂອງພວກເຮົາໃນເວທີອາຊຽນ ເພື່ອແກ້ໄຂບັນຫາທີ່ເກີດຂຶ້ນຢູ່ໃນພາກພື້ນຂອງພວກເຮົາ ໂດຍຢຶດຖືຄວາມເປັນແກນກາງ ເພື່ອຮັບປະກັນຄວາມໝັ້ນຄົງ, ສະຖຽນລະພາບ ແລະຄວາມຈະເລີນຮຸ່ງເຮືອງຂອງປະຊາຄົມອາຊຽນ. ຂ້າພະເຈົ້າ ເຊື່ອໝັ້ນວ່າ ມາເລເຊຍ ແລະ ສປປ ລາວ ຈະຮັດແໜ້ນການພົວພັນຮ່ວມມືຂອງພວກເຮົາທັງໃນຂອບຫຼາຍຝ່າຍ ໃນບັນຫາທີ່ສອງຝ່າຍມີຄວາມສົນໃຈຮ່ວມກັນໃນຊຸມປີຕໍ່ໜ້າ.
ດ້ວຍຄວາມນັບຖືຢ່າງສູງ,
[ລາຍເຊັນ]
ຮິຊາມມູດດິນ ຕຸນ ຮັດສ໌ເຊັນ