ພະນະທ່ານ ທອງລຸນ ສີສຸລິດ

ປະທານປະເທດ ແຫ່ງ ສາທາລະນະລັດ ປະ​ຊາ​ທິ​ປ​ະ​ໄຕ ປະ​ຊາ​ຊົນລາວ

ທີ່ ນະຄອນຫຼວງວຽງຈັນ

ພະ​ນະ​ທ່ານ ປະທານປະເທດ,

ຂ້າ​ພະ​ເຈົ້າ ຂໍສະແດງຄວາມຊົມເຊີຍຢ່າງສຸດອົກສຸດໃຈ ໃນໂອກາດທີ່​ພະ​ນະ​ທ່ານ ໄດ້ຖືກເລືອກຕັ້ງໃຫ້ດຳລົງຕຳແໜ່ງເປັນ ປະທານປະເທດ ແຫ່ງ ສາທາລະນະລັດ ປະ​ຊາ​ທິ​ປ​ະ​ໄຕ ປະ​ຊາ​ຊົນລາວ ໃນວັນທີ 22 ມີນາ 2021.

ສປປ ລາວ ແລະ ເຢຍລະມັນ ໄດ້ມີສາຍພົວພັນມິດຕະພາບ ແລະ ຮ່ວມມືທີ່ສະໜິດແໜ້ນ ມາເປັນເວລາຫຼາຍກວ່າ 60 ປີ. ຂ້າພະເຈົ້າ ເຊື່ອໝັ້ນວ່າ ໃນໄລຍະທີ່ພະນະທ່ານດຳລົງຕຳແໜ່ງເປັນປະທານປະເທດ ພວກເຮົາຈະປະສົບຜົນສໍາເລັດໃນການສືບຕໍ່ເປີດກວ້າງສາຍພົວພັນອັນດີດັ່ງກ່າວ. ຍິ່ງໄປກວ່ານັ້ນ, ຂ້າພະເຈົ້າ ຂໍຢືນຢັ້ນວ່າ ເຢຍລະມັນ ຈະສືບຕໍ່ສະໜັບສະໜູນປະເທດຂອງພະນະທ່ານ ໃນຖານະເພື່ອນມິດ ແລະ ຄູ່ຮ່ວມມື ໂດຍສະເພາະຢ່າງຍິ່ງ ໃນໄລຍະການແຜ່ລະບາດຂອງໂຄວິດ-19 ໃນປັດຈຸບັນ, ເຊິ່ງພວກເຮົາສາມາດຜ່ານພົ້ນໄປໄດ້ ດ້ວຍການຮ່ວມມືກັນໃນລະດັບສາກົນ.

ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົ່ງມີຄວາມເຂັ້ມແຂງ, ມີຄວາມປີຊາສາມາດ ແລະ ປະສົບຜົນສໍາເລັດໃນພາລະກິດອັນໃໝ່ຂອງພະນະທ່ານ ແລະ ໃນໜ້າທີ່ອັນໃຫຍ່ຫຼວງໃນຕໍ່ໜ້າ.

ຟຣັງ-ວານ​ເຕີ້ ສະ​ຕາຍ​ມາຍ​ເອີ

ປະທານາທິບໍດີ ແຫ່ງ ສາທາລະນະລັດ ສະຫະພັນ ເຢຍລະມັນ

------------------------------------------------------------------------------------------------------

ພະນະທ່ານ ພັນຄໍາ ວິພາວັນ

ນາຍົກລັດຖະມົນຕີ ແຫ່ງ ສາທາລະນະລັດ ປະ​ຊາ​ທິ​ປ​ະ​ໄຕ ປະ​ຊາ​ຊົນລາວ
ທີ່ ນະຄອນຫຼວງວຽງຈັນ

ພະ​ນະ​ທ່ານ ນາຍົກລັດຖະມົນຕີ,

ຂ້າ​ພະ​ເຈົ້າ ຂໍສະແດງຄວາມຊົມເຊີຍຢ່າງຈິງໃຈ ໃນໂອກາດທີ່​ພະ​ນະ​ທ່ານ ໄດ້ຖືກ​ແຕ່ງຕັ້ງໃຫ້ດຳລົງຕຳແໜ່ງເປັນ ນາຍົກລັດຖະມົນ​ຕີ ແຫ່ງ ສາທາລະນະລັດ ປະ​ຊາ​ທິ​ປ​ະ​ໄຕ ປະ​ຊາ​ຊົນລາວ.

ພະນະທ່ານ ມາດໍາລົງຕໍາແໜ່ງໃນໄລຍະເວລາທີ່ທົ່ວໂລກ ກໍາລັງສຸມໃສ່ຕໍ່ການຄວບຄຸມການລະບາດຂອງພະຍາດໂຄວິດ-19 ແລະ ການຫຼຸດຜ່ອນຜົນກະທົບທາງດ້ານເສດຖະກິດ, ຊຶ່ງການສັກວັກແຊັງຕ່າງໆ ແມ່ນມີບົດບາດສໍາຄັນໃນການແກ້ໄຂບັນຫາດັ່ງກ່າວ ແລະ ເຢຍລະມັນ ຈະສືບຕໍ່ສະໜັບສະໜູນ ສປປ ລາວ ໂດຍຜ່ານການຊ່ວຍເຫຼືອວັກແຊັງ ພາຍໃຕ້ໂຄງການ COVAX Facility.

ເຢຍລະມັນ ແລະ ສປປ ລາວ ມີສາຍພົວພັນມິດຕະພາບທີ່ດີນໍາກັນມາແຕ່ດົນນານ. ດ້ວຍການຮ່ວມແຮງຮ່ວມໃຈກັນ, ພວກເຮົາຈະສາມາດສືບຕໍ່ເຮັດໃຫ້ການຮ່ວມມືສອງຝ່າຍຂອງພວກເຮົາ ປະສົບຜົນສຳເລັດ ໃນຂະນະທີ່ປະເທດຂອງພະນະທ່ານ ກໍາລັງຈັດຕັ້ງປະຕິບັດແຜນງານຕ່າງໆ ເພື່ອບັນລຸເປົ້າໝາຍການພັດທະນາຂອງຕົນ, ເສີມສ້າງການປົກຄອງດ້ວຍກົດໝາຍ ແລະ ສົ່ງເສີມສັງຄົມພົນລະເຮືອນ ເພື່ອຜົນປະໂຫຍດຂອງປະຊາຊົນລາວ.

ຂ້າພະເຈົ້າ ຂໍອວຍພອນໃຫ້ ພະນະທ່ານ ມີຄວາມສາມາດອັນເຕັມປ່ຽມ ໃນການປະຕິບັດໜ້າທີ່ອັນສູງສົ່ງຂອງຕົນ.

ດ້ວຍ​ຄວາມ​ນັບ​ຖື​ຢ່າງ​ສູງ,

ດຣ.ອັງເກລາ ​ແມ​ກ​ເກລ

ນາຍົກລັດຖະມົນຕີ ແຫ່ງ ສາທາລະນະລັດ ສະຫະພັນ ເຢຍລະມັນ