ນະຄອນຫຼວງວຽງຈັນ, ວັນທີ 01 ທັນວາ 2021
ສະຫາຍ ຫຼີ ເຄີ້ສຽງ, ນາຍົກລັດຖະມົນຕີ ແຫ່ງ ສປ ຈີນ ທີ່ຮັກແພງ,
ຂ້າພະເຈົ້າ ຕາງຫນ້າໃຫ້ ລັດຖະບານ ແລະ ປະຊາຊົນລາວບັນດາເຜົ່າ ກໍຄືໃນນາມສ່ວນຕົວ ຂໍສະແດງຄວາມປິຕິຍິນດີເປັນຢ່າງຍິ່ງ ຕໍ່ການເປີດນຳໃຊ້ທາງລົດໄຟ ລາວ-ຈີນ ຢ່າງເປັນທາງການ, ຊຶ່ງເປັນໂຄງການທີ່ມີຄວາມໝາຍສຳຄັນໃນໜ້າປະຫວັດສາດ ຂອງ ສປປ ລາວ ແລະ ເປັນຄວາມ ເອກອ້າງທະນົງໃຈ ຂອງປວງຊົນລາວທັງຊາດທີ່ບໍ່ເຄີຍມີມາກ່ອນ. ດ້ວຍຄວາມເອົາໃຈໃສ່ຂອງການ ນໍາຂັ້ນສູງຂອງສອງປະເທດ, ກໍ່ຄືຂອງທຸກພາກສ່ວນທີ່ກ່ຽວຂ້ອງ, ໂຄງການກໍ່ສ້າງທາງລົດໄຟ ລາວ-ຈີນ ໄດ້ປະສົບຜົນສຳເລັດຢ່າງຈົບງາມ ແລະ ໄດ້ເປີດນຳໃຊ້ຢ່າງເປັນທາງການໃນໂອກາດ ອັນສະຫງ່າລາສີ ທີ່ປະຊາຊົນລາວບັນດາເຜົ່າ ພວມສະເຫລີມສະຫລອງ ວັນສະຖາປານາ ສປປ ລາວ ຄົບຮອບ 46 ປີ. ພິເສດປີນີ້ ກໍ່ເປັນປີຄົບຮອບການສ້າງຕັ້ງສາຍພົວພັນການທູດລະຫວ່າງ ສປປ ລາວ ແລະ ສປ ຈີນ ຄົບຮອບ 60 ປີ, ທັງເປັນປີມິດຕະພາບລາວ-ຈີນ ນຳອີກ.
ລາວ ແລະ ຈີນ ເປັນປະເທດບ້ານໃກ້ເຮືອນຄຽງທີ່ມີສາຍພູ, ປ່າໄມ້ ແລະ ແມ່ນ້ຳລຳເຊຕິດຈອດກັນ, ປະຊາຊົນທັງສອງຊາດ ລາວ-ຈີນ ມີມູນເຊື້ອໄປມາຫາສູ່, ຮ່ວມມືຊ່ວຍເຫຼືອເຊິ່ງກັນ ແລະ ກັນ ມາແຕ່ບູຮານນະການ. ຕະຫຼອດໄລຍະ 60 ປີ ແຫ່ງການພົວພັນການທູດນໍາກັນ, ສາຍພົວພັນມິດຕະພາບ ທີ່ເປັນມູນເຊື້ອອັນດີງາມດັ່ງກ່າວ ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ທັງລວງກວ້າງ ແລະ ລວງເລິກ.
ໂຄງການລົດໄຟລາວ-ຈີນ ເປັນໂຄງການຍຸດທະສາດທີ່ເຊື່ອມໂຍງຂອງ ສປປ ລາວ ໃນການ “ຫັນປະເທດທີ່ບໍ່ມີຊາຍແດນຕິດກັບທະເລ ໄປສູ່ປະເທດເຊື່ອມໂຍງເຊື່ອມຈອດໃນພາກພື້ນ”ໂດຍສອດຄ່ອງກັບຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ປະທານ ສີ ຈິນຜິງ. ນັບແຕ່ການລົງມືກໍ່ສ້າງໃນເດືອນທັນວາ 2016 ເປັນຕົ້ນມາ, ເຖິງແມ່ນວ່າຈະປະເຊີນຫນ້າກັບຄວາມຫຍຸ້ງຍາກ ແລະ ສິ່ງທ້າທາຍຫລາຍປະການ ເປັນຕົ້ນແມ່ນສະພາບການລະບາດຂອງເຊື້ອພະຍາດໂຄວິດ-19, ແຕ່ດ້ວຍຄວາມພະຍາຍາມຮ່ວມກັນ, ຄວາມຕັດສິນໃຈສູງ ແລະ ຄວາມເອົາໃຈໃສ່ຜ່ານຜ່າຄວາມຫຍຸ້ງຍາກນາໆປະການຂອງລັດຖະບານ ແລະ ວິສາຫະກິດຂອງສອງປະເທດ, ືຈື່ງສາມາດເຮັດໃຫ້ໂຄງ ການກໍ່ສ້າງສຳເລັດຕາມກຳນົດເວລາ. ໝາກຜົນ ແລະ ຄວາມສຳເລັດເຫຼົ່ານີ້ ລ້ວນແຕ່ສະແດງເຖິງຈິດໃຈ ແລະ ມີຂຶ້ນບົນພື້ນຖານຂອງ ການເປັນຄູ່ຮ່ວມມືຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ກໍ່ຄືຄູ່ຮ່ວມຊາຕາກຳ ລາວ-ຈີນ, ຈີນ-ລາວ, ຊຶ່ງໄດ້ກາຍເປັນສັນຍາລັກອັນຍິ່ງໃຫຍ່ຂອງການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ອ້າຍນ້ອງ.
ຂ້າພະເຈົ້າ ເຊື່ອແນ່ວ່າເສັ້ນທາງລົດໄຟ ລາວ-ຈີນ ສາຍນີ້ຈະເປັນຈຸດເຊື່ອມຕໍ່ທີ່ສຳຄັນ ລະ ຫວ່າງ ສປ ຈີນ ຫາ ສປປ ລາວ ກໍ່ຄືຈຸດເລີ່ມຕົ້ນແຫ່ງການເຊື່ອມຕໍ່ທາງບົກໃສ່ບັນດາປະເທດຕ່າງໆ ໃນພາກພື້ນອາຊຽນກໍຄືພາກພື້ນອື່ນໆ, ເຊິ່ງຈະເປັນການອໍານວຍຄວາມສະດວກໃຫ້ແກ່ການຂົນສົ່ງສິນຄ້າ, ການໄປມາຫາສູ່ເຊິ່ງກັນ ແລະ ກັນ ຂອງປະຊາຊົນ ລາວ-ຈີນ ກໍ່ຄື ບັນດາປະເທດໃນຂົງເຂດອາຊີຕາເວັນອອກສຽງໃຕ້. ຂ້າພະເຈົ້າ ເຊືອໝັ້ນວ່າພາຍຫລັງສະພາບການລະບາດ ຂອງເຊື້ອພະຍາດໂຄວິດ-19 ຜ່ອນຄາຍລົງ, ເສັ້ນທາງລົດໄຟ ລາວ-ຈີນ ຈະມີຜູ້ຄົນທັງພາຍໃນ ແລະ ຕ່າງປະເທດ ເຂົ້າມາຊົມໃຊ້ຢ່າງຫລວງຫລາຍ. ພ້ອມດຽວກັນນັ້ນກໍ່ຈະຊ່ວຍ ສປປ ລາວ ໃນການເປີດກວ້າງ, ສົ່ງເສີມການຮ່ວມມື, ການລົງທຶນ ແລະ ຄ້າຂາຍ ກັບປະເທດອ້ອມຂ້າງ ແລະ ສາກົນ, ຫຼຸດຜ່ອນອຸປະສັກຂໍ້ຈຳກັດດ້ານໂຄງລ່າງພື້ນຖານຄົມມະນາຄົມທີ່ບໍ່ສະດວກ, ເຮັດໃຫ້ຕົ້ນທຶນການຂົນສົ່ງຕໍ່າລົງ. ດ້ວຍຄວາມພະຍາຍາມ ແລະ ໄດ້ຮັບການສະໜັບສະໜູນຢ່າງແຂງແຮງ ແລະ ມີປະສິດທິຜົນຂອງ ສປ ຈີນ ຈຶ່ງເຮັດໃຫ້ ສປປ ລາວ ມີທາງລົດໄຟແບບທັນສະໄໝທີ່ເຊື່ອມຕໍ່ຈາກນະຄອນຫຼວງວຽງຈັນ ເຖິງ ຊາຍແດນລາວ-ຈີນ, ເຊິ່ງຈະເປັນການກໍ່ສ້າງເງື່ອນໄຂໃໝ່ໃຫ້ແກ່ການຄ້າ, ການລົງທຶນ, ການທ່ອງທ່ຽວ, ການໄປມາຫາສູ່ ແລກປ່ຽນວັດທະນະທຳນຳກັນໄດ້ຫຼາຍຂື້ນ, ທັງໝົດນີ້ ຈະເປັນການປະກອບສ່ວນເຂົ້າໃນການຊຸກຍູ້ໃຫ້ເສດຖະກິດຂອງລາວ ແລະ ຈີນ ກໍຄືພາກພື້ນໄດ້ຂະຫຍາຍຕົວ.
ໃນໂອກາດທີ່ມີຄວາມໝາຍສຳຄັນນີ້, ຂ້າພະເຈົ້າ ຂໍຕາງໜ້າລັດຖະບານ ແລະ ປະຊາຊົນໃນຂອບເຂດທົ່ວປະເທດ ຂໍອວຍພອນໃຫ້ສາຍພົວພັນມິດຕະພາບທີ່ເປັນມູນເຊື້ອ ການຮ່ວມມືຮອບດ້ານ ໝັ້ນຄົງ ຍາວນານຕາມທິດ 4 ດີ ແລະ ການເປັນຄູ່ຮ່ວມຊາຕາກຳສັງຄົມນິຍົມລາວ-ຈີນ, ຈີນ-ລາວ ຈົ່ງໄດ້ຮັບການຜັນຂະຫຍາຍໃຫ້ແຕກດອກອອກຜົນ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດພວກເຮົາ.
ຂໍອວຍພອນໃຫ້ ສະຫາຍ ຈົ່ງມີສຸຂະພາບເຂັ້ມແຂງ, ປະສົບຜົນສໍາເລັດໃນໜ້າທີ່ອັນທີກຽດສູງສົ່ງຂອງສະຫາຍ.
ດ້ວຍຄວາມນັບຖືຢ່າງສູງ
ພັນຄຳ ວິພາວັນ
ສະຫາຍ ຫຼີ ເຄີ້ສຽງ
ນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນຈີນ
ທີ່ ນະຄອນຫຼວງປັກກິ່ງ