ນະຄອນຫຼວງວຽງຈັນ, ວັນທີ 01 ພະຈິກ 2022
ພະນະທ່ານ,
ຂ້າພະເຈົ້າ ໄດ້ຮັບຂ່າວດ້ວຍຄວາມເສົ້າສະຫຼົດໃຈຕໍ່ເຫດການ ອຸບັດຕິເຫດຂົວຫັກ ໃນລັດຄຸສຈາຣາດ ຢູ່ທາງຕາເວັນຕົກຂອງອິນເດຍ ໃນວັນທີ 30 ຕຸລາ 2022 ຜ່ານມາ, ອັນໄດ້ເຮັດໃຫ້ປະຊາຊົນເສຍຊີວິດ ແລະ ບາດເຈັບ ເປັນຈຳນວນຫຼາຍ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈ ແລະ ເສົ້າສະຫຼົດໃຈຢ່າງສຸດຊຶ້ງ ມາຍັງ ພະນະທ່ານ ແລະ ໂດຍຜ່ານ ພະນະທ່ານ ໄປຍັງ ລັດຖະບານ ແລະ ປະຊາຊົນ ອິນເດຍ ໂດຍສະເພາະ ຕໍ່ຄອບຄົວ ຂອງຜູ້ທີ່ໄດ້ຮັບເຄາະຮ້າຍຈາກອຸບັດຕິເຫດໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ດ້ວຍຄວາມເອົາໃຈໃສ່ຂອງ ລັດຖະບານ, ປະຊາຊົນ ອິນເດຍ ຈະສາມາດຜ່ານຜ່າຊ່ວງເວລາອັນເສົ້າສະຫຼົດໃຈນີ້ໂດຍໄວ.
ດ້ວຍຄວາມນັບຖືຢ່າງສູງ.
ພັນຄຳ ວິພາວັນ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ພະນະທ່ານ ນາເຣັນດຣາ ໂມດີ
ນາຍົກລັດຖະມົນຕີ
ແຫ່ງ ສາທາລະນະລັດ ອິນເດຍ
ທີ່ ນິວເດນລີ
--------------------------------------------------------------------------------------------------------------------------
ນະຄອນຫຼວງວຽງຈັນ, ວັນທີ 01 ພະຈິກ 2022
ພະນະທ່ານ,
ຂ້າພະເຈົ້າ ໄດ້ຮັບຂ່າວດ້ວຍຄວາມເສົ້າສະຫຼົດໃຈຕໍ່ເຫດການ ອຸບັດຕິເຫດຂົວຫັກ ໃນລັດຄຸສຈາຣາດ ຢູ່ທາງຕາເວັນຕົກຂອງອິນເດຍ ໃນວັນທີ 30 ຕຸລາ 2022 ຜ່ານມາ, ອັນໄດ້ສ້າງຄວາມສູນເສຍ ໃຫ້ແກ່ຊີວິດຂອງປະຊາຊົນ ອິນເດຍ ເປັນຈຳນວນຫຼວງຫຼາຍ.
ຂ້າພະເຈົ້າ ຂໍສະແດງຄວາມເຫັນອົກເຫັນໃຈ ແລະ ເສົ້າສະຫຼົດໃຈເປັນຢ່າງຍິ່ງ ມາຍັງ ພະນະທ່ານ, ລັດຖະບານ ແລະ ປະຊາຊົນ ອິນເດຍ ໂດຍສະເພາະສະມາຊິກຄອບຄົວຂອງຜູ້ໄດ້ຮັບເຄາະຮ້າຍ ໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ດ້ວຍຄວາມເອົາໃຈໃສ່ຂອງລັດຖະບານ, ປະຊາຊົນ ອິນເດຍ ໃນເຂດດັ່ງກ່າວຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ.
ດ້ວຍຄວາມນັບຖືຢ່າງສູງ.
ສະເຫຼີມໄຊ ກົມມະສິດ
ຮອງນາຍົກລັດຖະມົນຕີ
ລັດຖະມົນຕີກະຊວງການຕ່າງປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ພະນະທ່ານ ດຣ. ສຸບຣາມານຽມ ໃຈຊັງເກີ
ລັດຖະມົນຕີກະຊວງການຕ່າງປະເທດ
ແຫ່ງ ສາທາລະນະລັດ ອິນເດຍ
ທີ່ ນິວແດນລີ