ການເຄື່ອນໄຫວວຽກງານການທູດ ໄດ້ມີບົດບາດສຳຄັນໃນການປະກອບສ່ວນ ໃນການຂົນຂວາຍການຊ່ວຍເຫຼືອ
ຈາກສາກົນ ໃນວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19
ເນື່ອງໃນໂອກາດວັນການທູດລາວ ຄົບຮອບ 76 ປີ (12 ຕຸລາ 1945-2021)
ການຜັນປ່ຽນຂອງສະພາບການຂອງໂລກໃນແຕ່ລະໄລຍະເປັນສິ່ງທີ່ມີຄວາມທ້າທາຍບໍ່ໜ້ອຍສໍາລັບການເຄື່ອນ ໄຫວວຽກຕ່າງປະເທດຂອງ ສປປ ລາວ, ແຕ່ດ້ວຍການຊີ້ນໍາ-ນຳພາ ຢ່າງໃກ້ຊິດຕິດແທດຂອງກົມການເມືອງສູນກາງພັກ, ລັດຖະບານ, ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ກໍໄດ້ເຄື່ອນໄຫວຢ່າງມີປະສິດທິຜົນ ແລະ ຢູ່ໃນທ່າບຸກ, ໂດຍຍຶດໝັ້ນແນວທາງການຕ່າງປະເທດ“ສັນຕິພາບ, ເອກະລາດ, ມິດຕະພາບ ແລະ ການຮ່ວມມື”ແລະ ປະຕິບັດຕາມຄໍາຂວັນຂອງກອງປະຊຸມວຽກງານການຕ່າງປະເທດ ຄັ້ງທີ 14ຄື:‘‘ການທູດປ້ອງກັນເຫດ ແລະ ບຸກທະລຸເພື່ອປົກປັກຮັກສາ ແລະ ພັດທະນາປະເທດຊາດ”ໂດຍລົງເລິກ ‘‘ເພີ່ມທະວີປະສິດທິພາບການຈັດຕັ້ງປະຕິບັດຜົນການເຄື່ອນໄຫວການຕ່າງປະເທດໃຫ້ເປັນຮູບປະທຳ’’,ຊຶ່ງເຮັດໃຫ້ການເຄື່ອນໄຫວຕ່າງປະເທດຂອງ ສປປ ລາວ ເຮົາໃນຊຸມປີຜ່ານມາ ສາມາດສືບຕໍ່ຍາດໄດ້ຜົນສໍາເລັດທີ່ພົ້ນເດັ່ນທັງຂອບສອງຝ່າຍ ແລະ ຫລາຍຝ່າຍໃນເວທີພາກພື້ນ ແລະ ສາກົນ, ຊຶ່ງໄດ້ເປັນການປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ.
ໃນທ່າມກາງທີ່ສະພາບການຂອງໂລກ ກຳລັງປະເຊີນກັບຄວາມຫຍຸ້ງຍາກຈາກການແຜ່ລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ຢູ່ໃນທົ່ວໂລກ, ຊຶ່ງໄດ້ສົ່ງຜົນກະທົບເປັນວົງກວ້າງ ເຮັດໃຫ້ເກີດການປ່ຽນແປງຄັ້ງໃຫຍ່ຫຼວງ, ທໍາລາຍລະບົບຕ່ອງໂສ້ເສດຖະກິດໂລກ, ເຮັດໃຫ້ທຸກປະເທດໃນໂລກ ຕ້ອງໄດ້ປັບໂຕເຂົ້າໃນການດຳລົງຊີວິດແບບໃຫມ່ (New Normal), ທັງປະເຊີນກັບເສດຖະກິດທີ່ຖົດຖອຍ ແລະ ຢຸດສະງັກ, ເຊິ່ງໄດ້ສ້າງຜົນກະທົບໂດຍກົງ ຕໍ່ການພັດທະນາເສດຖະກິດ-ສັງຄົມ ຂອງທຸກປະເທດ, ໂດຍສະເພາະແມ່ນ ປະເທດກຳລັງພັດທະນາ ແລະ ດ້ອຍພັດທະນາ ລວມທັງ ສປປ ລາວ ແມ່ນໄດ້ຮັບຜົນກະທົບຫລາຍເຊັ່ນດຽວກັນ ໃນການບັນລຸເປົ້າຫມາຍການພັດທະນາແບບຍືນຍົງ. ພັກ-ລັດຖະບານເຮົາ ໄດ້ຍົກສູງຄວາມເປັນເຈົ້າການເຂົ້າຮ່ວມການຕໍ່ສູ້ ເພື່ອສັນຕິພາບ, ຄວາມໝັ້ນຄົງ; ການຮັບມືກັບພະຍາດລະບາດ, ການປ່ຽນແປງດິນຟ້າອາກາດ ແລະ ການແກ້ໄຂບັນຫາອາດຊະຍາກຳຂ້າມຊາດ ຄຽງຄູ່ກັບການຮັບປະກັນເອກະລາດ, ອຳນາດອະທິປະໄຕ, ລະບອບການເມືອງ ຂອງປະເທດຊາດ; ຮັບປະກັນການສົມທົບ ລະຫວ່າງ ການເພີ່ມທະວີຮັດແໜ້ນມິດຕະພາບ ແລະ ການຮ່ວມມືກັບບັນດາປະເທດເພື່ອນມິດຍຸດທະສາດ ກັບການສືບຕໍ່ປະຕິບັດທິດການເຊື່ອມຈອດ ແລະ ເຊື່ອມໂຍງສາກົນ, ສ້າງເງື່ອນໄຂການຍາດແຍ່ງ ດຶງດູດກຳລັງແຮງດ້ານທຶນຮອນ, ເຕັກໂນໂລຊີ, ນະວັດຕະກຳ ເພື່ອຂຸດຄົ້ນ ແລະ ເສີມຂະຫຍາຍຄວາມອາດສາມາດບົ່ມຊ້ອນ ແລະ ກຳລັງແຮງຂອງຊາດ.
ຂະແໜງການຕ່າງປະເທດ ເປັນຂະແໜງການທີ່ຢືນຢູ່ຖັນແຖວຫນ້າຂອງການຕໍ່ສູ້ການເມືອງການທູດມາໂດຍຕະຫຼອດ, ເຄື່ອນໄຫວເຈລະຈາເສີມຂະຫຍາຍການພົວພັນຮ່ວມມື ແລະ ຍາດແຍ່ງເອົາການຊ່ວຍເຫຼືອຈາກສາກົນ ເພື່ອນຳເອົາຜົນປະໂຫຍດສູງສຸດມາສູ່ປະເທດຊາດ, ໄດ້ເອົາໃຈໃສ່ຕິດຕາມສະພາບການຜັນແປຂອງໂລກຢ່າງໃກ້ຊິດ, ທັງເປັນເສນາທິການໃຫ້ແກ່ ພັກ-ລັດຖະບານ ໃນການຄົ້ນຄວ້າ ແລະ ປະສານຮັບເອົາການສະໜັບສະໜູນຊ່ວຍເຫຼືອຈາກບັນດາປະເທດເພື່ອນມິດສາກົນ ດ້ວຍຫຼາຍຮູບການຢ່າງທັນການ, ເອົາໃຈໃສ່ຕິດຕາມສະຫຼຸບສັງລວມສະພາບການແຜ່ລະບາດ ແລະ ປະຕິບັດມາດຕະການຕ່າງໆ ເພື່ອປ້ອງກັນ ຄວບຄຸມ ການແຜ່ລະບາດຂອງພະຍາດໂຄວິດ-19 ຢູ່ ບັນດາປະເທດຕ່າງໆທົ່ວໂລກ, ຊຸກຍູ້ຊ່ວຍເຫຼືອບັນດາພົນລະເມືອງລາວ ທີ່ຕົກຄ້າງຢູ່ຕ່າງປະເທດ ໃຫ້ສາມາດກັບຄືນປະເທດໄດ້ຢ່າງປອດໄພ ລວມທັງ ອຳນວຍຄວາມສະດວກໃຫ້ແກ່ຕ່າງປະເທດ ຮັບເອົາພົນລະເມືອງຂອງຕົນທີ່ຕົກຄ້າງຢູ່ ສປປ ລາວ ກັບຄືນປະເທດ ໄດ້ຢ່າງທັນການ, ເປັນເຈົ້າການເຄື່ອນໄຫວໃນເວທີສາກົນຢ່າງຕັ້ງຫນ້າ ໃນການປະສານສົບທົບກັບ ບັນດາປະເທດເພື່ອນມິດໃນໂລກ ແລະ ບັນດາອົງການຈັດຕັ້ງສາກົນ ເພື່ອຊອກຫາທາງອອກຮ່ວມກັນໃນການແກ້ໄຂວິກິດການຂອງໂລກ ໂດຍສະເພາະ ການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ທີ່ພວມລະບາດຫນັກໃນທົ່ວໂລກ ໃນປະຈຸບັນ.
ຜ່ານການເຄື່ອນໄຫວການທູດຢ່າງຕັ້ງຫນ້າ ແລະ ຫ້າວຫັນ ໂດຍຜ່ານຊ່ອງທາງການເຈລະຈາການທູດທີ່ມີຄວາມ ນຸ້ມນວນ ແລະ ຄ່ອງແຄ້ວ ທັງຍຶດຫມັ້ນແນວທາງການຕ່າງປະເທດທີ່ສ້າງສັນ ແລະ ສະເໝີຕົ້ນສະເໝີປາຍຕະຫຼອດມາ, ເຮັດໃຫ້ ສປປ ລາວ ສືບຕໍ່ໄດ້ຮັບການພົວພັນຮ່ວມມືອັນດີ ແລະ ຍາດໄດ້ການສະໜັບສະໜູນຊ່ວຍເຫຼືອໃນດ້ານຕ່າງໆຈາກບັນດາປະເທດເພື່ອນມິດສາກົນ ໂດຍສະເພາະແມ່ນ ການຊ່ວຍເຫຼືອໃນວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ນັບແຕ່ເລີ່ມມີການແຜ່ລະບາດ ຢູ່ ສປປ ລາວ; ເປັນຕົ້ນແມ່ນ ການຊ່ວຍເຫຼືອຂອງ ສສ ຫວຽດນາມ, ສປ ຈີນ, ຍີ່ປຸ່ນ, ສ.ອາເມຣິກາ, ອົດສະຕຣາລີ, ສ.ເກົາຫຼີ, ຣາຊະອານາຈັກໄທ, ກຳປູເຈຍ, ການາດາ ແລະ ປະເທດອື່ນໆ, ບັນດາອົງການຈັດຕັ້ງສາກົນ ແລະ ພາກທຸລະກິດ-ພໍ່ແມ່ປະຊາຊົນ ທັງຢູ່ພາຍໃນ ແລະ ຕ່າງປະເທດ; ປະຈຸບັນ ສປປ ລາວ ໄດ້ຮັບການຊ່ວຍເຫຼືອດ້ານສາທາລະນະສຸກ ປະກອບມີ: ວັກແຊັງ (Sinopharm, Sputnik, AstraZeneca, Pfizer ແລະ Johnson&Johnson’s Janssen) ລວມຫຼາຍກວ່າ 3 ລ້ານໂດສ, ບັນດາອຸປະກອນທາງການແພດ, ເງິນສົດ, ການສົ່ງທີມແພດຊ່ຽວຊານມາຊ່ວຍເຫຼືອໃຫ້ຄວາມຮູ້ດ້ານວິຊາການແກ່ຝ່າຍລາວ ແລະ ການຊ່ວຍເຫຼືອອື່ນໆ. ທັງຫມົດນີ້ ໄດ້ປະກອບສ່ວນສຳຄັນເຂົ້າໃນວຽກງານສາທາລະນະສຸກຂອງລາວ ໃນການຮັບມືກັບພະຍາດໂຄວິດ-19 ທີ່ກຳລັງລະບາດເປັນວົງກວ້າງ, ຊຶ່ງພັກ-ລັດຖະບານ ເຮົາ ຕັ້ງເປົ້າຫມາຍຈະສູ້ຊົນໃຫ້ພົນລະເມືອງລາວ ໄດ້ຮັບການສັກວັກແຊັງໃຫ້ໄດ້ 50% ພາຍໃນທ້າຍປີ 2021 ນີ້, ຊຶ່ງມາຮອດປະຈຸບັນ ເຫັນວ່າ ສາມາດບັນລຸການສັກວັກແຊັງເຂັມທີ 1 ສໍາເລັດແລ້ວ 43,56% ແລະ ເຂັມທີ 2 ສໍາເລັດແລ້ວ 37,28%. ສະນັ້ນ ເພື່ອຈະໃຫ້ບັນລຸຕາມເປົ້າໝາຍທີ່ກໍານົດໄວ້ໃນກໍານົດເວລາ 3 ເດືອນ ທ້າຍປີ 2021 ນີ້, ສປປ ລາວ ຍັງເປັນປະເທດທີ່ມີຄວາມຕ້ອງການສູງ ໃນການຮັບເອົາການຊ່ວຍເຫຼືອຈາກວົງຄະນະຍາດສາກົນ, ຊຶ່ງເປັນປັດໄຈສໍາຄັນທີ່ຂາດບໍ່ໄດ້ໃນການບັນລຸເປົ້າຫມາຍທີ່ວາງອອກ ໃນຄັ້ງນີ້.
ສປປ ລາວ ຈະສືບຕໍ່ເພີ່ມທະວີຄວາມເປັນເຈົ້າການປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ, ການຮ່ວມມື ເພື່ອການພັດທະນາ ແລະ ຖືການທູດປ້ອງກັນເຫດເປັນທິດສຳຄັນ; ສືບຕໍ່ຂະຫຍາຍການພົວພັນຮ່ວມມືແບບຫລາຍທິດ, ຫລາຍຝ່າຍ, ຫລາຍຮູບແບບ, ຫລາຍລະດັບ ລະຫວ່າງ ລັດກັບລັດ, ລະຫວ່າງ ພັກເຮົາ ກັບ ພັກການເມືອງຂອງຕ່າງປະເທດ ບົນພື້ນຖານການເຄົາລົບເອກະລາດ, ອຳນາດອະທິປະໄຕ ເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ; ເພີ່ມທະວີຄວາມເປັນເຈົ້າການໃນການຈັດຕັ້ງປະຕິບັດບັນດາຂໍ້ຕົກລົງຮ່ວມມືອັນເປັນພື້ນຖານ ກັບບັນດາປະເທດເພື່ອນມິດຍຸດທະສາດ ທີ່ໄດ້ຮ່ວມກັນຍົກການຮ່ວມມືສູ່ລະດັບສູງອັນໃຫມ່ ໃຫ້ມີປະສິດທີຜົນຕົວຈິງກວ່າເກົ່າ, ໃນນັ້ນ ສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ເຂົ້າສູ່ລວງເລິກ; ເສີມຂະຫຍາຍສາຍພົວພັນທີ່ເປັນມູນເຊື້ອ ຄູ່ຮ່ວມມືຍຸດທະສາດຮອບດ້ານ, ຫມັ້ນຄົງຍາວນານກັບ ສປ ຈີນ ຕິດພັນກັບການຈັດຕັ້ງປະຕິບັດແຜນແມ່ບົດຄູ່ຮ່ວມຊະຕາກຳ ລາວ-ຈີນ ໃຫ້ເກີດດອກອອກຜົນໃນທຸກດ້ານ: ສືບຕໍ່ຮັກສາ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອອັນດີງາມກັບບັນດາປະເທດອ້າຍນ້ອງ ແລະ ສະຫະພັນ ຣັດເຊຍ. ເສີມຂະຫຍາຍສາຍພົວພັນກັບປະເທດເພື່ອນມິດອື່ນໆ; ສືບຕໍ່ຮັກສາການພົວພັນມິດຕະພາບອັນດີ ກັບ ບັນດາປະເທດເພື່ອນບ້ານໃກ້ຄຽງ ທັງສືບຕໍ່ແກ້ໄຂບັນດາຂໍ້ຂັດແຍ່ງ ດ້ວຍການເຈລະຈາ ພ້ອມທັງຮັກສາ ແລະ ເພີ່ມທະວີການຮ່ວມມືດ້ານການຄ້າ, ການລົງທຶນລະຫວ່າງກັນ; ສືບຕໍ່ເຄື່ອນໄຫວຢ່າງຕັ້ງຫນ້າໃນບັນດາອົງການຈັດຕັ້ງພາກພື້ນ ແລະ ສາກົນ ປະກອບສ່ວນສຳຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ພາກພື້ນ ແລະ ສາກົນ, ສ້າງເງື່ອນໄຂສະດວກ ແລະ ນຳຜົນປະໂຫຍດຕົວຈິງມາໃຫ້ແກ່ການພັດທະນາປະເທດຊາດ.
ເວົ້າລວມແລ້ວ ຍ້ອນມີການຊີ້ນຳ-ນຳພາ ອັນສະຫຼາດສ່ອງໃສຂອງພັກ-ລັດຖະບານເຮົາ, ຈຶ່ງເຮັດໃຫ້ຂະແໜງ ການຕ່າງປະເທດຂອງພວກເຮົາ ສາມາດຍາດໄດ້ຜົນປະໂຫຍດລວມມາສູ່ປະຊາຊົນບັນດາເຜົ່າ, ສືບຕໍ່ປະກອບສ່ວນອັນສໍາຄັນ ເຂົ້າໃນການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ; ຂະແໜງການຕ່າງປະເທດ ຈະສືບຕໍ່ເປັນໃຈກາງໃນການປະສານງານຮັບເອົາການຊ່ວຍເຫຼືອຈາກ ວົງຄະນະຍາດສາກົນ, ບັນດາປະເທດເພື່ອນມິດ ລວມທັງອົງການຈັດຕັ້ງສາກົນ ໃຫ້ປະສົບຜົນສຳເລັດຕາມຄາດໝາຍທີ່ວາງໄວ້.