ເນື່ອງໃນໂອກາດສະເຫຼີມສະຫຼອງວັນສ້າງຕັ້ງຍຸດທະສາດການຮ່ວມມືດ້ານເສດຖະກິດ ແມ່ນໍ້າອີຣະວິດີ-ແມ່ນໍ້າເຈົ້າພະຍາ-ແມ່ນໍ້າຂອງ ຫລື ແອັກແມັກ (ACMECS) ຄົບຮອບ 20 ປີ (ເລີ່ມແຕ່ປີ 2003 -2023), ກອງເລຂາແອັກແມັກຊົ່ວຄາວ ຈຶ່ງໄດ້ຈັດກິດຈະກໍາແຂ່ງຂັນອອກແບບໂລໂກແອັກແມັກ ໂດຍຈະລະດົມເອົາຜູ້ທີ່ມີທັກສະ ແລະ ມີຄວາມສົນໃຈໃນການອອກແບບຈາກ 5 ປະເທດສະມາຊິກແອັກແມັກຄື: ກໍາປູເຈຍ, ສປປ ລາວ, ມຽນມາ, ຫວຽດນາມ ແລະ ໄທ ເຂົ້າຮ່ວມ. ຈຸດປະສົງຂອງການຈັດກິດຈະກໍາແຂ່ງຂັນໃນຄັ້ງນີ້ ແມ່ນເພື່ອເຜີຍແຜ່ຄວາມຮັບຮູ້ ແລະ ເຂົ້າໃຈ ກ່ຽວກັບ ຂອບການຮ່ວມມືດັ່ງກ່າວ ແລະ ຄັດເລືອກເອົາໂລໂກມານໍາໃຊ້ເປັນສັນຍາລັກທາງການຂອງຂອບການຮ່ວມມືແອັກແມັກ. ໂລໂກ ທີ່ໄດ້ຮັບການຄັດເລືອກຈະຖືກນໍາໃຊ້ໃນບັນດາກອງປະຊຸມສໍາຄັນຕ່າງໆ ເປັນຕົ້ນແມ່ນ ກອງປະຊຸມສຸດຍອດແອັກແມັກ ຄັ້ງທີ 10 ທີ່ ສປປ ລາວ ເປັນເຈົ້າພາບ, ກອງປະຊຸມລະດັບເຈົ້າໜ້າທີ່ອາວຸໂສ ແລະ ບັນດາກິດຈະກໍາປິ່ນອ້ອມອື່ນໆທີ່ຈັດຂຶ້ນພາຍໃຕ້ຂອບການຮ່ວມມືແອັກແມັກ ເຊິ່ງລາຍລະອຽດຂອງການແຂ່ງຂັນມີດັ່ງນີ້:
ເປົ້າໝາຍຜູ້ເຂົ້າແຂ່ງຂັນ
ຜູ້ທີ່ມີອາຍຸ 15 ປີຂຶ້ນໄປ ຈາກ 5 ປະເທດສະມາຊິກແອັກແມັກຄື: ກໍາປູເຈຍ, ສປປ ລາວ, ມຽນມາ, ຫວຽດນາມ ແລະ ໄທ.
ຫົວຂໍ້ສໍາລັບການອອກແບບ
ການອອກແບບໂລໂກແມ່ນໃຫ້ສອດຄ່ອງຫົວຂໍ້ດັ່ງນີ້: ແອັກແມັກ ແມ່ນຂອບການຮ່ວມມືລະດັບອະນຸພາກພື້ນທີ່ມີວິໄສທັດ ແລະ ປັບຕົວໄປຕາມຄວາມຮຽກຮ້ອງຕ້ອງການໃນການພັດທະນາຂອງແຕ່ລະປະເທດສະມາຊິກຕາມແຕ່ລະໄລຍະ, ພ້ອມທັງເປັນແກນກາງໃນການເຊື່ອມຈອດກັບຂອບການຮ່ວມມືອື່ນໆ ເພື່ອເປົ້າໝາຍໃນການພັດທະນາອະນຸພາກພື້ນແມ່ນໍ້າຂອງໃຫ້ມີຄວາມຍືນຍົງ ແລະ ຈະເລີນຮຸ່ງເຮືອງ.
ໄລຍະເວລາການແຂ່ງຂັນ
ເປີດຮັບສະໝັກຜູ້ເຂົ້າແຂ່ງຂັນ ເລີ່ມແຕ່ວັນທີ 1 ກຸມພາ 2024 ເຖິງ ວັນທີ 30 ມີນາ 2024.
ລາງວັນສໍາລັບຜູ້ຊະນະການປະກວດ
ອັນດັບ 1 ຈະໄດ້ຮັບເງິນລາງວັນຈໍານວນ 1000 USD
ອັນດັບ 2 ຈະໄດ້ຮັບເງິນລາງວັນຈໍານວນ 500 USD
ອັນດັບ 3 ຈະໄດ້ຮັບເງິນລາງວັນຈໍານວນ 300 USD
ຊ່ອງທາງການສົ່ງຜົນງານເຂົ້າປະກວດ
ຜູ້ເຂົ້າແຂ່ງຂັນ ຕ້ອງສົ່ງຜົນງານອອກແບບຂອງຕົນຜ່ານອີເມວຂອງກອງເລຂາແອັກແແມັກຊົ່ວຄາວ: This email address is being protected from spambots. You need JavaScript enabled to view it.