ແຈ້ງ​ການ​ກະຊວງການຕ່າງປະເທດ

ໂດຍຕອບສະໜອງຕາມຄຳເຊື້ອເຊີນຂອງ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສົມເດັດ ມະຫາ ບໍວໍ ທິບໍດີ ຮຸນ ມາແນດ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ພ້ອມດ້ວຍຄະນະຜູ້ແທນຂັ້ນສູງ ຈະເດີນທາງຢ້ຽມຢາມ ສາ​ທາ​ລະ​ນະ​ລັດ ​ປະ​ຊາ​ທິ​ປະ​ໄຕ ​ປະ​ຊາ​ຊົນລາວ ຢ່າງເປັນທາງການ ໃນລະຫວ່າງວັນທີ 25-26 ມີນາ 2024 ເພື່ອສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອທີ່ມີມາແຕ່ດົນນານ ແລະ ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສປປ ລາວ ແລະ ຣາຊະອານາຈັກ ກຳປູເຈຍ.

ນະຄອນຫຼວງວຽງຈັນ, ວັນທີ 21 ມີນາ 2024

ກົມການຂ່າວ, ກະຊວງການຕ່າງປະເທດ.

ພະແນກໂຄສະນາ ແລະ ປະຊາສຳພັນ.

----------------------------------------

ຊີວະປະຫວັດຫຍໍ້

ສົມເດັດ ມະຫາ ບໍວໍ ທິບໍດີ ຮຸນ ມາແນດ

ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ

ສົມເດັດ ມະຫາ ບໍວໍ ທິບໍດີ ຮຸນ ມາແນດ ເກີດໃນວັນທີ 20 ຕຸລາ 1977, ຢູ່ເມືອງ Memot, ແຂວງ Kampong Cham (ເກີດໃນສະໄໝການປົກຄອງຂອງຂະເໝນແດງ), ສົມເດັດ ເປັນຜູ້ນຳທະຫານທີ່ມີບົດບາດສູງ ເຊິ່ງໄດ້ດໍາລົງຕໍາແໜ່ງສໍາຄັນໃນກອງທັບ ຣາຊະອານາຈັກ ກຳປູເຈຍ (RCAF), ໂດຍສະເພາະແມ່ນ​ໄດ້​ດຳລົງ​ຕຳ​ແໜ່​ງ​ເປັນ​ຮອງ​ຜູ້​ບັນຊາ​ການກອງທັບຣາຊະອານາຈັກ ກຳປູເຈຍ​ RCAF ​ແລະ ຜູ້​ບັນຊາ​ການ​ກອງທັບບົກ ແຫ່ງ ​ຣາ​ຊະ​ອານາຈັກ​ກຳປູ​ເຈຍ (RCA), ​ລວມທັງຫົວໜ້າ​ກອງບັນຊາການ​ກຳລັງ​ພິ​ເສດ​ຕ້ານ​ການ​ກໍ່​ການ​ຮ້າຍ​ແຫ່ງ​ຊາດ.

ດ້ານການສຶກສາຂອງສົມເດັດ ໄດ້ເລີ່ມຕົ້ນທີ່ນະຄອນຫຼວງພະນົມເປັນ, ເຊິ່ງໄດ້ສໍາເລັດການສຶກສາສາມັນໃນປີ 1993. ໃນປີ 1995, ສົມເດັດ ໄດ້ເຂົ້າເປັນທະຫານຂອງ RCAF ແລະ ຕໍ່ມາໄດ້ເຂົ້າຮຽນຢູ່ໂຮງຮຽນການທະຫານທີ່ມີຊື່ສຽງຂອງສະຫະລັດ ທີ່ West Point ໃນປີດຽວກັນ, ເຊິ່ງເປັນຄົນກໍາປູເຈຍຄົນທໍາອິດທີ່ຮຽນຈົບຈາກ West Point ໃນປີ 1999 ໃນລະດັບປະລິນຍາຕີ ດ້ານເສດຖະສາດ. ຫຼັງຈາກນັ້ນ, ໄດ້ຮັບປະລິນຍາໂທ ດ້ານເສດຖະສາດ ຈາກ ມະຫາວິທະຍາໄລ ນິວຢອກ ແລະ ປະລິນຍາເອກ ດ້ານເສດຖະສາດ ຈາກ ມະຫາວິທະຍາໄລ Bristol.

ຕະຫຼອດໄລຍະເວລາການເປັນທະຫານ, ສົມເດັດ ໄດ້ມີຜົນງານອັນພົ້ນເດັ່ນ ເຊັ່ນ: ໄດ້ຮັບການແຕ່ງຕັ້ງເປັນຜູ້ບັນຊາການຂອງກອງກຳລັງພິເສດຕ້ານການກໍ່ການຮ້າຍຂອງກຳປູເຈຍໃນປີ 2008, ເຊິ່ງໄດ້ມີບົດບາດສຳຄັນໃນການເພີ່ມຂີດຄວາມສາມາດຕ້ານການກໍ່ການຮ້າຍຂອງກຳປູເຈຍ. ຫຼັງຈາກນັ້ນ, ໄດ້ຮັບການເລື່ອນຊັ້ນເປັນ ພົນໂທ ໃນປີ 2013 ແລະ ໄດ້ຮັບຕໍາແໜ່ງຮອງຜູ້ບັນຊາການກອງທັບ ຣາຊະອານາຈັກ ກຳປູເຈຍ RCAF ໃນປີ 2018. ໃນເດືອນມີນາ 2023, ໄດ້ຮັບຕໍາແໜ່ງພົນເອກ (4 ດາວ) ເຊິ່ງເປັນການຮັບຮູ້ເຖິງການປະກອບສ່ວນອັນສຳຄັນ ໃນການນໍາພາ​ເພີ່ມ​ທະວີ​ຄວາມ​ສາມາດ​ຂອງ​ກອງທັບ ​ແລະ ​ເພີ່ມ​ທະວີ​ການ​ພົວພັນ​ຕ່າງປະ​ເທດ​ດ້ານ​ປ້ອງ​ກັນ​ປະ​ເທດ.

​ນອກ​ຈາກ​ການ​ປະຕິບັດ​ໜ້າ​ທີ່​ດ້ານ​ການ​ທະຫານ​, ສົມ​ເດັດ​ ​ໄດ້​ເຄື່ອນ​ໄຫວ​ວຽກ​ງານ​ສັງຄົມ, ​ໂດຍ​ສະ​ເພາະ​ແມ່ນ​ໄດ້​ດຳລົງ​ຕຳ​ແໜ່​ງ​ເປັນ​ຫົວໜ້າ​ຄະນະ​ກຳມະການ​ທຶນການສຶກສາ ສົມເດັດ ເຕໂຈ ຮຸນ ​ແຊນ ​ແລະ ສະມາຄົມ​ທຶນການ​ສຶກສາ​ຂອງ ສົມເດັດ ເຕໂຈ. ບັນດາອົງການດັ່ງກ່າວ ໄດ້ໃຫ້ໂອກາດດ້ານທຶນການສຶກສາແກ່ຊາວໜຸ່ມກຳປູເຈຍ ຈໍານວນຫຼາຍ ແລະ ເຮັດໃຫ້ພວກເຂົາສາມາດຮຽນຕໍ່ການສຶກສາຊັ້ນສູງພາຍໃນປະເທດ. ນອກຈາກນັ້ນ, ສົມເດັດ ຍັງໄດ້ເປັນປະທານສະມາຄົມແພດອາສາສະໝັກຊາວໜຸ່ມຂອງ ສົມເດັດ ເຕໂຈ (TYDA), ເຊິ່ງໄດ້ລະດົມຄູ, ອາຈານ, ນັກສຶກສາ ແລະ ອາສາສະໝັກ ດ້ານການແພດ ເພື່ອສະໜອງການບໍລິການປິ່ນປົວສຸຂະພາບ ໂດຍບໍ່ເສຍຄ່າໃຊ້ຈ່າຍໃຫ້ແກ່ປະຊາຊົນກຳປູເຈຍໃນເຂດຊົນນະບົດ.

ຢູ່​ພາຍ​ໃນ​ພັກ​ປະຊາຊົນ​ກຳປູ​ເຈຍ (CPP) - ພັກກໍາອໍານາດ, ສົມ​ເດັດ ​ໄດ້ເປັນ ກຳມະການກົມການເມືອງ ສູນກາງພັກປະຊາຊົນກຳປູເຈຍ ​ແລະ ຊີ້ນຳ​​ຄະນະ​ຊາວ​ໜຸ່ມ​ສູນ​ກາງ. ສົມເດັດ ​ໄດ້​ຖືກ​ເລືອກ​ຕັ້ງ​ຢ່າງເປັນ​ປະຊາທິປະ​ໄຕ ໂດຍ​ໃຫ້​ເປັນ​ຜູ້​ສະ​ເໜີ​ຊື່​ຢ່າງ​ເປັນ​ທາງ​ການ​ໃຫ້​ດຳລົງ​ຕຳ​ແໜ່​ງ​ເປັນ ​ນາຍົກລັດຖະມົນຕີ ​ໃນ​ອະນາຄົດ. ທ່າມກາງໄຊຊະ ນະ​ໃນ​ການ​ເລືອກ​ຕັ້ງ​ໃນ​ເດືອນ​ກໍລະກົດ 2023, ພະ​ມະຫາ​ກະສັດ ​ໄດ້​ແຕ່ງຕັ້ງ ​ສົມ​ເດັດ ​ທິບໍ​ດີ ຮຸນ ມາແນດ ເປັນ​ນາຍົກລັດຖະມົນຕີ ແຫ່ງ ​ຣາຊະ​ອານາຈັກ​ກຳປູ​ເຈຍ.

ຕະຫຼອດໄລຍະການແຜ່ລະບາດຂອງພະຍາດໂຄວິດ-19, ສົມເດັດ ໄດ້ສະແດງໃຫ້ເຫັນການນໍາພາອັນປີຊາສາມາດໂດຍໄດ້ຊີ້ນຳກອງທັບບບົກ RCA ຢ່າງມີປະສິດທິຜົນ ໃນການສະໜັບສະໜູນຄວາມພະຍາຍາມຂອງລັດຖະບານກຳປູເຈຍ ເພື່ອຕ້ານການແຜ່ລະບາດຂອງພະຍາດດັ່ງກ່າວ ເຊັ່ນ: ​ຕິດຕາມ​ກວດກາ​​ຂະ​ບວນການ​ສັກວັກແຊ໊ງປ້ອງ​ກັນ​ພະຍາດ; ສ້າງ ຕັ້ງສູນກັກກັນ ແລະ ປິ່ນປົວ; ​ອຳນວຍ​ຄວາມ​ສະດວກ​ໃນ​ການ​ຂົນ​ສົ່ງ​ຄົນ​ງານ​ກຳປູ​ເຈຍ​ທີ່​ເຂົ້າມາ​ຢູ່​ຊາຍ​ແດນ; ແລະ ຄຸ້ມຄອງໂຮງໝໍ​ Luong Me; ເຊິ່ງສະແດງໃຫ້ເຫັນເຖິງ​ຄຳ​ໝັ້ນ​ສັນຍາ​​ໃນ​ການ​ປົກ​ປັກຮັກສາ​ສຸຂະພາບ ​ແລະ ຄວາມ​ຜາ​ສຸກ​ຂອງ​ປະຊາຊົນ​ກຳປູ​ເຈຍ.

ສົມເດັດ ເປັນຜູ້ນຳທີ່ເປັນແບບຢ່າງ, ສະຫຼຽວສະຫຼາດ, ມີສະຕິປັນຍາອັນໂດດເດັ່ນ ແລະ ອຸທິດຕົນຢ່າງບໍ່ຢຸດຢັ້ງຕໍ່ປະເທດ ແລະ ປະຊາຊົນ. ຄໍາໝັ້ນສັນຍາອັນເດັດດ່ຽວຂອງ ສົມເດັດ ຕໍ່ຄວາມສາມັກຄີ, ສະຖຽນລະພາບ, ແລະ ຄວາມກ້າວໜ້າຂອງຊາດ; ຄຽງຄູ່ກັບຄວາມຕັ້ງໃຈອັນສູງສົ່ງຂອງສົມເດັດ ໄດ້ສະແດງເຖິງຄຸນລັກສະນະອັນໃຫຍ່ຫຼວງຂອງຜູ້ນຳທີ່ໜ້າເຊື່ອຖື, ແຮງບັນດານໃຈ ແລະ ຄວາມເຫັນອົກເຫັນໃຈ. ການ​ເລືອກ​ຕັ້ງ​ແບບ​ປະຊາທິປະ​ໄຕ​ຂອງ​ທ່ານ​ໂດຍ​ພັກ​ໃນ​ຖານະ​ເປັນ​ຜູ້​ສະໝັກ​ຮັບ​ເລືອກ​ຕັ້ງ​ຂອງ​ເຂົາ​ເຈົ້າ​ເປັນ ​ນາຍົກລັດຖະມົນຕີ ​ເປັນ​ການ​ພິສູດ​ໃຫ້​ເຫັນ​ເຖິງ​ຄວາມ​ສາມາດ​ຂອງ​ສົມເດັດ.  

ສົມເດັດ ໄດ້ແຕ່ງງານກັບ ທ່ານ ດຣ ນ. Pich Chanmony ແລະ ມີລູກນຳກັນ 3 ຄົນ ຄື: Vorleak, Lyna ແລະ Rithyseth. ໃນ​ໄລຍະດຳລົງຕຳ​ແໜ່ງ​ເປັນ ​ນາ​ຍົກ​ລັດ​ຖະ​ມົນ​ຕີ, ປະ​ເທດ​ຊາດ​ຄາດ​ວ່າ​ຈະ​ສືບ​ຕໍ່ໄດ້ຮັບການອຸ​ທິດ​ຕົນ ແລະ ການ​ນຳ​ພາ​-​ຊຸກ​ຍູ້ ໃຫ້ມີ​ຄວາມ​ຈະ​ເລີນ​ຮຸ່ງ​ເຮືອງ ແລະ ຄວາມ​ຜາ​ສຸກ​ຂອງ​ກຳ​ປູ​ເຈຍ.