ໃນວັນທີ 26 ກໍລະກົດ 2016, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ເປັນປະທານກອງປະຊຸມເວທີພາກພື້ນອາຊຽນ ຄັ້ງທີ 23 ໂດຍການເຂົ້າຮ່ວມຂອງບັນດາລັດຖະ ມົນຕີຕ່າງປະເທດ ແລະ ຜູ້ແທນຈາກຜູ້ເຂົ້າຮ່ວມເວທີພາກພື້ນອາຊຽນ 27 ປະເທດ ແລະ ເລຂາທິການໃຫຍ່ອາຊຽນ ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ.

ກອງປະຊຸມຄັ້ງນີ້ ບັນດາຜູ້ເຂົ້າຮ່ວມໄດ້ແລກປ່ຽນຄວາມຄິດເຫັນ ຢ່າງກົງໄປກົງມາ ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ໂດຍສະເພາະ ບັນຫາ ແລະ ສະພາບການຕ່າງໆ ທີ່ເກີດຂື້ນຢູ່ ພາກພື້ນອາຊີ-ປາຊີຟິກ ກໍຄືໃນໂລກ ເຊັ່ນ: ໄພພິບັດທໍາມະຊາດ,​ ການປ່ຽນແປງຂອງດິນຟ້າອາກາດ, ການກໍ່ການຮ້າຍ, ອາຊະຍາກໍາຂ້າມຊາດ, ບັນຫາໂລກລະບາດ, ການຍ້າຍຖິ່ນຖານແບບຜິດປົກກະຕິ, ການຄ້າມະນຸດ ແລະ ສະພາບການຕ່າງໆ ໃນພາກ ພື້ນຕ່າງໆຂອງໂລກ ຊຶ່ງລວມມີ ສະພາບຢູ່ຕາເວັນອອກກາງ, ອາຟຣິກກາ, ແຫລມເກົາຫລີ ແລະ ທະເລຈີນໃຕ້. ພ້ອມນັ້ນ, ກອງປະຊຸມ ຍັງໄດ້ປຶກສາຫາລື ກ່ຽວກັບ ທິດທາງການຮ່ວມມືໃນຕໍ່ໜ້າໃນຂອບເວທີພາກພື້ນອາຊຽນ ຊຶ່ງກອງປະຊຸມໄດ້ ເຫັນດີສືບຕໍ່ຍຶດຫມັ້ນໃນຫລັກການ ການປຶກສາຫາລື ແລະ ເອົາການຕົກລົງເປັນເອກະສັນ, ແລະ ດໍາເນີນໄປໃນຈັງຫວະທີ່ ທຸກຝ່າຍມີຄວາມສະບາຍໃຈ.

ກອງປະຊຸມ ໄດ້ທົບທວນຄືນ ການຈັດຕັ້ງປະຕິບັດບັນດາກິດຈະກໍາ ສໍາລັບກາງສະໄໝ 2015-2016 ແລະ ຮັບຮອງເອົາກິດຈະກໍາ ທີ່ຈະຈັດຕັ້ງປະຕິບັດໃນກາງສະໄໝ 2016-2017. ພ້ອມດຽວກັນນີ້, ກອງປະຊຸມກໍໄດ້ຮັບຮອງ ເອົາຖະແຫຼງການ 3 ສະບັບ ຄື: 1). ຖະແຫຼງການເວທີພາກພື້ນອາຊຽນ ວ່າດ້ວຍການຮັດແໜ້ນການຮ່ວມມື ເພື່ອຄຸ້ມຄອງການເຄື່ອນໄຫວຂ້າມຊາຍແດນຂອງກຸ່ມອາຊະຍາກອນ; 2). ຖະແຫຼງການເວທີພາກພື້ນອາຊຽນວ່າດ້ວຍການຮັດແໜ້ນການຮ່ວມມື ລະຫວ່າງ ບັນດາອົງກອນທີ່ຮັບຜິດຊອບການບັງຄັບໃຊ້ກົດໝາຍທາງທະເລ; ແລະ 3). ຖະແຫຼງການລັດຖະມົນຕີ ເວທີພາກພື້ນອາຊຽນ ກ່ຽວກັບການກໍ່ການຮ້າຍ.

ໃນຕອນທ້າຍ, ປະທານກອງປະຊຸມ ຍັງໄດ້ນໍາສະເໜີເອກະສານວິໄສທັດຄວາມຫມັ້ນຄົງເວທີພາກພື້ນອາຊຽນ ປະຈໍາປີ 2016 ຊຶ່ງເປັນເອກະສານທີ່ຈັດພິມທຸກປີ ໂດຍແນໃສ່ສ້າງຄວາມໄວ້ເນື້ອເຊື່ອໃຈ ແລະ ຄວາມເຂົ້າໃຈລະຫວ່າງ ປະເທດຜູ້ເຂົ້າຮ່ວມເວທີພາກພື້ນອາຊຽນ ແລະ ເພື່ອສົ່ງເສີມ ແລະ ຊຸກຍູ້ຂະບວນການເວທີພາກພື້ນອາຊຽນ ກ້າວສູ່ການທູດປ້ອງກັນເຫດ.