ວັນທີ 29 ສິງຫາ 2016 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຖະແຫລງຂ່າວ ຜ່ານສື່ມວນຊົນ ໂດຍຮຽກຮ້ອງ ແລະ ເຊີນຊວນພໍ່ແມ່ພີ່ນ້ອງ ປະຊາຊົນລາວ ບັນດາເຜົ່າ ໃນທົ່ວປະເທດ ໂດຍສະເພາະ ຊາວນະຄອນຫລວງວຽງຈັນ ຈົ່ງພ້ອມກັນ ເປັນເຈົ້າພາບທີ່ດີ ໃນການຈັດກອງປະຊຸມ ສຸດຍອດອາຊຽນ ຄັ້ງທີ 28, 29 ແລະ ກອງປະຊຸມ ປິ່ນອ້ອມທີ່ກ່ຽວຂ້ອງ ເພື່ອຕ້ອນຮັບແຂກ ດ້ວຍອັດທະຍາໄສ, ໄມຕີຈິດ ຕາມປະເພນີ ທີ່ເປັນມູນເຊື້ອ ອັນດີງາມຂອງຊາດ ແລະ ປະຊາຊົນລາວ.

   ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບກຽດເປັນເຈົ້າພາບ ແລະ ເປັນປະທານ ກອງປະຊຸມ ສຸດຍອດອາຊຽນ ຄັ້ງທີ 28, 29 ແລະກອງປະຊຸມປິ່ນອ້ອມ ທີ່ກ່ຽວຂ້ອງ ເຊິ່ງຈະໄຂຂຶ້ນ ທີ່ນະຄອນຫລວງວຽງຈັນ, ແຕ່ວັນທີ 6-8 ກັນຍາ 2016 ທີ່ຈະເຖິງນີ້ ເຊິ່ງຈະມີບັນດາ ປະມຸກລັດ ແລະຫົວໜ້າ ລັດຖະບານ ຈາກບັນດາປະເທດ ສະມາຊິກອາຊຽນ ແລະ ຄູ່ເຈລະຈາຍຸດທະສາດ ຈະເດີນທາງເຂົ້າມາຮ່ວມ ແລະ ຢ້ຽມຢາມ ເປັນທາງການຕື່ມ.

   ກ່ອນໜ້ານີ້, ທ່ານ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ຊີ້ໃຫ້ເຫັນວ່າ: ກອງປະຊຸມ ສຸດຍອດອາຊຽນ ຄັ້ງທີ 28 ຈະປຶກສາຫາລື ກ່ຽວກັບການຮັດແໜ້ນ ປະຊາຄົມອາຊຽນ ກໍຄື ການຜັນຂະຫຍາຍວິໄສທັດອາຊຽນ 2025 ແລະ ທິດທາງໃນຕໍ່ໜ້າ. ກອງປະຊຸມ ສຸດຍອດອາຊຽນ ຄັ້ງທີ 29 ຈະປຶກສາຫາລື ກ່ຽວກັບການຮ່ວມມື ອາຊຽນກັບພາຍນອກ ແລະ ແລກປ່ຽນຄວາມຄິດຄວາມເຫັນ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມເປັນຫ່ວງ ແລະ ສົນໃຈຮ່ວມກັນ. ສ່ວນບັນດາ ກອງປະຊຸມ ສຸດຍອດອາຊຽນ ກັບຄູ່ເຈລະຈາ ຈະໄດ້ທົບທວນ ການຮ່ວມມື ໃນໄລຍະຜ່ານມາ ແລະ ປຶກສາຫາລືທິດທາງ ການຮ່ວມມື ໃນຕໍ່ໜ້າ ແລະ ແລກປ່ຽນຄວາມຄິດເຫັນ ກ່ຽວກັບ ບັນຫາພາກພື້ນ ແລະ ສາກົນ.