ໃນ​ວັນ​ທີ 31 ສິງຫາ 2016, ​ທີ່ ສູນ​ກາ​ນຮ່ວມ​ມື​ສາກົນ ​ແລະ ​ຝຶກ​ອົບຮົມ (ICTC) ໄດ້​ມີ​ພິທີ​ວາງ​ສີ​ລາ​ລືກ ໂຄງການ​ກໍ່ສ້າງ​ຫ້ອງການ​ສະຖາ​ບັນ​ການ​ຕ່າງປະ​ເທດ ​​ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ ​ທ່ານ ສະ​ເຫຼີ​ມ​ໄຊ ກົມມະ​ສິດ, ລັດຖະມົນຕີ​ກະຊວງ​ການ​ຕ່າງປະ​ເທດ, ມີ​ທ່ານ ນາງ ຄຳ​ເພົາ ​ເອີນ​ທະ​ວັນ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ມີ​ຫົວໜ້າ​ຫ້ອງການ, ຫົວໜ້າ​ສະ​ຖາ​ບັນ​ການ​ຕ່າງປະ​ເທດ, ບັນດາ​ຫົວໜ້າ​ກົມ​ຈາ​ກະຊວງ​ການ​ຕ່າງປະ​ເທດ, ກະຊວງ​ການ​ເງິນ, ກະຊວງ​ໂຍທາ​ທິການ ​ແລະ ຂົນ​ສົ່ງ ​ແລະ ກະຊວງ​ແຜນການ ​ແລະ ການ​ລົງທຶນ, ຫົວໜ້າ​ບໍ​ລິ​ສັດ ຈິດ​ຈະ​ເລີ​ນ ກໍ່ສ້າງ ພ້ອມ​ດ້ວຍພະນັກງານ​ວິຊາ​ການ​ຈາກ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

          ​ໃນ​​ໂອກາດ​ດັ່ງກ່າວ, ທ່ານ ບຸນ​ເຫຼືອ ພັນ​ດາ​ນຸວົງ, ຫົວໜ້າ​ຫ້ອງການ​ກະຊວງ​ການ​ຕ່າງປະ​ເທດ ​ໄດ້​​ໃຫ້​ຮູ້​ເຖິງປະຫວັດ​ຄວາມ​ເປັນ​ມາ​ຂອງ​ສະ​ຖາ​ບັນ​ການ​ຕ່າງປະ​ເທດຄື: ສະ​ຖາ​ບັນ​ການ​ຕ່າງປະ​ເທດ​ໄດ້​ກໍ່​ຮ່າງ​ສ້າງ​ຕົວ​ຂຶ້ນ​ໃນ​ທ້າຍ​ປີ 1986 ມີ​ຊື່ວ່າ​ໂຮງຮຽນ​ການ​ພົວພັນ​ຕ່າງປະ​ເທດ, ມາ​ຮອດ​ປີ 1989-1992 ກະຊວງ​ການ​ຕ່າງປະ​ເທດ​ໄດ້​ຮັບ​ທຶນ​ຊ່ວຍ​ເຫຼືອ​ລ້າ​ຈາກ​ອົງການ​ສະຫະ​ປະຊາ​ຊາດ​ເພື່ອ​ການ​ພັດທະນາ ​ເພື່ອ​ບຳລຸງ​ພາສາ​ອັງກິດ ​ໃຫ້​ແກ່​ພະນັກງານ​ກະຊວງ​ການ​ຕ່າງປະ​ເທດ, ພະນັກງານ​ມາ​ຈາກ​ກະຊວງຕ່າງໆ ​ແລະ ບັນດາຂະ​ແໜງ​ການ​ທີ່​ເຮັດ​ວຽກ​ພົວພັນ​ກັບ​ຕ່າງປະ​ເທດ. ຍ້ອນ​ເຫັນ​ໄດ້​ຄວາມ​ສຳຄັນ​ ​ແລະ ຈຳ​ເປັນ​ຂອງ​ການ​ຝຶກ​ອົບຮົມ ​ໂດຍ​ສະ​ເພາະ​ພາສາ​ອັງກິດ​ເພື່ອ​ສ້າງ​ຂີດ​ຄວາມ​ສາມາດ​ໃຫ້​ແກ່​ບຸກຄະລາ​ກອນ​ທີ່​ເຮັດ​ວຽກ​ງານ​ການ​ຕ່າງປະ​ເທດ ​ແລະ ພ້ອມ​ນັ້ນກໍ່​ເປັນ​ການ​ກະກຽມ​ເຂົ້າ​ເປັນ​ສະມາຊິກ​ອາ​ຊຽນ​ໃນ​ປີ 1997, ສະ​ຖາ​ບັນ​ການ​ຕ່າງປະ​ເທດ​ຈຶ່ງ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ຢ່າງ​ເປັນທາງ​ການ​ໃນ​ປີ 1993. ທ່ານ​ຍັງ​ໃຫ້​ຮູ້​ເຖິງ​ຂໍ້​ມູນ​ກ່ຽວ​ກັບ​ໂຄງການກໍ່ສ້າງ​ອາຄານ​ຫ້ອງການ​ສະ​ຖາ​ບັນ​ການ​ຕ່າງປະ​ເທດ​ຫຼັງ​ໃໝ່ ​ຄື ອາຄານ​ຫ້ອງການ​ສະ​ຖາ​ບັນ​ຫຼັງ​ໃໝ່​ນີ້ ມີ​ມູນ​ຄ່າ​ການ​ກໍ່ສ້າງ​ທັງ​ໝົດ 23,334,092,196 ກີບ, ​ເຊິ່ງ​ແມ່ນ​ບໍລິ​ສັດ ຈິດ​ຈະ​ເລີ​ນ ກໍ່ສ້າງ ຈຳກັດ​ຜູ້​ດຽວ ​ເປັນ​ຜູ້​ຮັບ​​ເໝົາ​, ​ເປັນ​ອາຄານ 3 ຊັ້ນ, ຝາ​ກໍ່​ດ້ວຍ​ດິນ​ຈີ່, ​ໂຄງ​ປະຕູ ​ແລະ ປ່ອງຢ້ຽມ​ເປັນ​ໂຄງ​ອາ​ລູມີ​ນຽມ, ມີ​ແກ້ວ​ເປັນ​ຕົວ​ປະກອບ, ​ໂຄງ​ຫຼັງຄາ​ເຫຼັກ ​ແລະ ມຸງ​ດ້ວຍ​ແຜ່ນ​ອາ​ລູ​ຊິງ​ ກັນ​ຄວາມ​ຮ້ອນ. ພາຍ​ໃນ​ອາຄານ ມີ​ຫ້ອງ​ເຮັດ​ວຽກ​ຢູ່ 8 ຫ້ອງ. ​ໃນ​ນັ້ນ, ມີຫ້ອງ​ຝຶກ​ອົບຮົມ 8 ຫ້ອງ, ຫ້ອງ​ປະຊຸມ 2 ຫ້ອງ, ຫ້ອງ​ຄອມ​ພິວ​ເຕີ 1 ຫ້ອງ, ຫ້ອງ​ຮັບ​ແຂກ, ສາງ​ເກັບ​ມ້ຽນ​ເຄື່ອງ ​ແລະ ຫ້ອງ​ຟັງ​ສຽງ, ​ເປັນ​ອາຄານ​ທັນ​ສະ​ໄໝ ມີ​ລະບົບ​ໄຟຟ້າ, ນ້ຳ​ປະປາ, ປ້ອງ​ກັນ​ອັກ​ຄິ​ໄພ, ລະບົບ ​ເຄ​ເບີ້​ນ TV ​ແລະ Network, ຄາດໝາຍ​ສ້າງ​ໃຫ້​ສຳ​ເລັດພາຍ​ໃນ 24 ​ເດືອນ. ນອກຈາກ​ອາຄານ​ຫຼັງ​ນີ້​ແລ້ວ, ​ແຜນການ​ໃນ​ຕໍ່ໜ້າ​ກໍ່​ຄືໂຄງການ​ປຸກ​ສ້າງ​ອາຄານ​ຫໍ​ພັກ, ອາຄານ​ຫ້ອງ​ອາຫານ, ອາຄານ​ຫ້ອງ​ນ້ຳ, ສະຖານ​ທີ່​ຈອດ​ລົດ ​ແລະ ​ເດີ່ນ​ກິລາ ​ເຊິ່ງມີ​ມູນ​ຄ່າ 36,577,362 ກີບ ​ເຂົ້າໃນ​ແຜນການ​ລົງທຶນ​ຂອງ​ລັດ​ປີ 2017 ​ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ສະ​ຖາ​ບັນ​ການ​ຕ່າງປະ​ເທດ​ໄດ້​ດຳ​ເນີນ​ວຽກ​ງານ​ຕາມ​ພາລະ​ບົດບາດ​ຂອງ​ຕົນ​ຢ່າງ​ມີ​ປະສິດທິພາບ.

          ​ພາຍຫລັງ​ການ​ສຳ​ເລັດ​ໃນ​ການ​ກໍ່ສ້າງ​ອາຄານ​ຫຼັງ​ໃໝ່​ຂອງ​ສະ​ຖາ​ບັນ​ການ​ຕ່າງປະ​ເທດ​ແລ້​ວ ຈະ​ສາມາດ​ຮັບ​ໃຊ້​ເຂົ້າ​​ໃນ​ການ​ປະຕິບັດ​ໜ້າ​ທີ່​ວຽກ​ງານ​ຂອງ​ບັນດາ​ພະນັກ​ງານ, ຄູ​ອາຈານ, ນັກຮຽນ​ນັກ​ສຶກສາ,​ນັກ​ສຳ​ມະ​ນາກ​ອນ ທີ່​ເຮັດ​ວຽກ​ປະຈຳ​ໃນ​ສະ​ຖາ​ບັນ ສາມາດ​ຮອງ​ຮັບ​ຈຳນວນ​ພົນ​ໄດ້​ຫຼາຍ​ຫວ່າ 100 ຄົນ.