ໂດຽຕອບ​ສະໜອງ​ການ​ເຊີນ​ຂອງ ພະນະ​ທ່ານ ສີຈິ້ນຜິ​ງ, ປະທານ​ປະ​ເທດ ​ແຫ່ງສາທາລະນະ​ລັດປະຊາຊົນ​ຈີນ, ທີ່ເປັນ​ເຈົ້າພາບ​ການ​ຈັດ​ກອງ​ປະຊຸມ​ກຸ່ມ​ຈີ 20 ຄັ້ງທີ 11ຊຶ່ງຈະຈັດຂຶ້ນ​ ໃນ​ວັນ​ທີ 2-6 ກັນຍາ 2016, ທີ່ຫາງ​ໂຈ, ສ.ປຈີນ. ພະນະທ່ານ ບຸນ​ຍັງ ວໍລະ​ຈິດ, ​ປະ​ທານ​ປະ​ເທດ ​ແຫ່ງ ສາທາລະນະ​ລັດ ປະຊາ​ທິປະ​ໄຕ ປະຊາຊົນ​ລາວ, ປະທານ​ໝູນ​ວຽນ​ອາ​ຊຽນປີ 2016, ພ້ອມ​ດ້ວຍ​ພັນ​ລະ​ຍາ ​ແລະ ຄະນະ ໄດ້​ອອກ​ເດີນທາງເຂົ້າຮ່ວມ​ກອງ​ປະຊຸມດັ່ງກ່າວ, ອອກຕ້ອນຮັບທີສະໜາມບິນສາກົນ ເມືອງຫາງໂຈ, ສາທາລະນະລັດ ປະຊາຊົນຈີນ ໂດຍມີ ທ່ານ ຫວາງ ຈຽງໝານ, ຮອງປະທານສະພາທີ່ປຶກສາການເມືອງ ແຂວງເຈີຈຽງ ສປ ຈີນ, ທ່ານ ນາງວັນດີ ບຸດທະສະວົງ, ເອກອັກຄະລັດຖະທູດລາວ ປະຈຳ ສປ ຈີນ.

ຈາກນັ້ນ,ໃນຕອນແລງຂອງວັນດຽວກັນ, ພະນະທ່ານ ບຸນຍັງ ວໍລະຈິດ,​ ປະ​ທານ​ປະ​ເທດ ​ແຫ່ງ ສປປ ລາວ ພ້ອມດ້ວຍຄະນະ ໄດ້ພົບ​ປະ​ສອງຝ່າຍ ກັບ ຄະນະຜູ້​ແທນ ສປ ຈີນ, ນຳ​ໂດຽ ພະນະທ່ານ ສີ ຈິ້ນຜິ​ງ, ປະທານປະເທດ ແຫ່ງ ສາທາລະນະລັດ ປະຊາຊົນຈີນ ພ້ອມດ້ວຍຄະນະ ​ເພື່ອ​ປຶກສາ​ຫາລື​​ໃນ​ການ​ຊຸກຍູ້​ສົ່ງ​ເສີມ​ການ​ພົວພັນ ​ແລະ ຮ່ວມ​ມື​ຍຸດ​ທະ​ສາດ​ຮອບດ້ານ ລະຫວ່າງ ​ສອງ​ປະ​ເທດ ​ແລະ ບັນຫາ​ອື່ນໆ ທີ່​ສອງ​ຝ່າຍ​ມີ​ຄວາມ​ສົນ​ໃຈ​ຮ່ວມ​ກັນ, ໃນການພົບປະຄັ້ງນີ້ ພະນະທ່ານ ບຸນຍັງ ວໍລະຈິດ ໄດ້ສະແດງຄວາມຂອບໃຈ ຕໍ່່ສະຫາຍຈີນ ທີ່ໄດ້ເຊື້ອເຊີນມາເຂົ້າຮ່ວມກອງປະຊຸມສຸດຍອດ G20 ຄັ້ງທີ 11 ໃນນາມປະທານໝູນວຽນອາຊຽນ ແລະ ໄດ້ມີໂອກາດພົບປະກັບ ສະຫາຍ ສີ ຈິ້ນຜິ​ງ ເພື່ອນມິດສະຫາຍທີ່ໄວ້ເນື້ອເຊື່ອໃຈຂອງ ພັກ, ລັດ ແລະ ປະຊາຊົນລາວ ອີກຄັ້ງໜື່ງ.  ພ້ອມດຽວກັນນີ້ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ອໍານວຍຄວາມສະດວກໃຫ້ແກ່ ຄະນະຝ່າຍລາວ ຢ່າງອົບອຸນ, ສະໜິດສະໜົມ ແລະ ສົມກຽດ.

ຕາງໜ້າໃຫ້ພັກ-ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຢ່າງຍິ່ງມາຍັງ ພັກ-ລັດຖະບານ ສປ ຈີນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າ ແລະ ທັນການໃຫ້ແກ່ ສປປ ລາວ ໃນການເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດອາຊຽນ ສໍາເລັດຜົນຢ່າງຈົບງາມ ແລະ ຫວັງວ່າ ສະຫາຍຈີນ ຈະສືບຕໍ່ໃຫ້ການຊ່ວຍເຫຼືອຝ່າຍລາວ ເພື່ອເຮັດໃຫ້ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດທີກ່ຽວຂ້ອງອື່ນໆ ສໍາເລັດຜົນຢ່າງຈົບງາມ.

ພະນະທ່ານ ບຸນຍັງ ວໍລະຈິດ ໄດ້ສະແດງຄວາມຊົມເຊີຍທີີ່ເຫັນວ່າ ສອງປະເທດ ໄດ້ມີການແລກປ່ຽນການຢ້ຽມຢາມນຳກັນໃນທຸກລະດັບ ແລະ ມີການເສີມຂະຫຍາຍການພົວພັນຮ່ວມມືຍຸດທະສາດຮອບດ້ານໃຫ້ນັບມື້ນັບຈະເລີນເຕີບໂຕຍິ່ງຂຶ້ນ ແລະ ໃນປີນີ້ທັງ 2 ປະເທດ ໄດ້ຈັດຕັ້ງການສະເຫຼີມສະຫຼອງວັນສໍາຄັນແຫ່ງການສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 55 ປີ ຢ່າງຟົດຟື້ນ ແລະ ມີຄວາມໝາຍ, ຊຶ່ງຜ່ານມາສອງຝ່າຍ ໄດ້ຮ່ວມກັນຈັດຕັ້ງກິດຈະກຳຕ່າງໆຂຶ້ນທັງຢູ່ ສປປ ລາວ ແລະ ສປ ຈີນ ແລະ ຈະສືບຕໍ່ຮ່ວມກັນຈັດຂຶ້ນຕະຫຼອດປີນີ້ ຢ່າງເປັນຂະບວນຟົດຟື້ນຕາມແຜນການທີ່ໄດ້ຕົກລົງເປັນເອກະພາບກັນ. ໃນນີ້, ອັນເດັ່ນກວ່າໝູ່ແມ່ນໂຄງການກໍ່ສ້າງທາງລົດໄຟ ລາວ-ຈີນ ແລະ ການສໍາເລັດການສົ່ງດາວທຽມ ແລະ ໂຄງການອື່ນໆ.

ສປປ ລາວ ສະແດງຄວາມຍິນດີທີ່ຈະໄດ້ຕ້ອນຮັບ ສະຫາຍ ລີ ເຄີສຽງ, ນາຍົກລັດຖະມົນຕີ ແຫ່ງ ສປ ຈີນ ທີ່ຈະເດີນທາງໄປຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດທີ່ກ່ຽວຂ້ອງແຕ່ ວັນທີ 6-9 ກັນຍາ 2016 ທີ່ຈະມາເຖິງໃນເວລາອັນໄວນີ້. ໃນການຢ້ຽມຢາມ ສປປ ລາວ ຂອງສະຫາຍ ລີ ເຄີສຽງ, ນາຍົກລັດຖະມົນຕີ ແຫ່ງ ສປ ຈີນ ນັ້ນ, ຫວັງວ່າ ສອງຝ່າຍ ຈະໄດ້ຮ່ວມກັນປຶກສາຫາລື ແລະ ລົງເລິກລາຍລະອຽດໃນການຈັດຕັ້ງປະຕິບັດບັນດາຂໍ້ຕົກລົງທີ່ທັງສອງຝ່າຍ ໄດ້ບັນລຸຄວາມເປັນເອກະພາບກັນ ໃນເດຶອນ ພຶດສະພາ 2016 ທີ່ຜ່ານມາ ໃຫ້ປະກົດຜົນເປັນຈິງ ເພື່ອປະກອບຊຸກຍູ້ສົ່ງເສີມການພົວພັນຮ່ວມມືຂອງສອງປະເທດໃຫ້ນັບມື້ເຂົ້າສູ່ລ່ວງເລິກ. ສປປ ລາວ ຈະສືບຕໍ່ປຶກສາຫາລືກັບ ສປຈີນ ກ່ຽວກັບ ບັນຫາພາກພື້ນ ແລະ ສາກົນ.

ພ້ອມນັ້ນ ທ່ານຍັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການກະກຽມເປັນເຈົ້າພາບຈັດກອງປະຊຸມສຸດຍອດ G20 ຄັ້ງທີ 11 ພາຍໃຕ້ຫົວຂໍ້ “ ກ້າວໄປເຖິງເສດຖະກິດໂລກແຫ່ງນະວັດຕະກຳ ດ້ວຍບັນຍາກາດຟົດຟື້ນ, ມີການເຊື່ອມຈອດ ແລະ ການມີສ່ວນຮ່ວມ ” ໃນຄັ້ງນີ້ ໄດ້ຢ່າງດີເລີດ, ຊຶ່ງໂອກາດດັ່ງກ່າວ ບັນດາຜູ້ນຳກຸ່ມ G20 ກໍ່ຈະໄດ້ຮັບຮອງເອົາຫຼາຍໆເອກະສານທີ່ສຳຄັນ ລວມທັງແຜນປະຕິບັດງານວ່າດ້ວຍວາລະ 2030 ກ່ຽວກັບ ການພັດທະນາທີ່ຍືນຍົງ ແລະ ແຜນງານການພັດທະນາການຫັນເປັນອຸດສາຫະກຳຢູ່ ອາຟຣິກາ ແລະ ປະເທດດ້ອຍພັດທະນາ ຊຶ່ງຈະເປັນການວາງພື້ນຖານອັນໜັກແໜ້ນໃຫ້ແກ່ການຮ່ວມມື ເພືື່ອຊຸກຍູ້ການຈະເລີນເຕີບໂຕທາງດ້ານເສດຖະກິດຂອງກຸ່ມ G20 ກໍ່ຄືຂອງໂລກໃຫ້ມີຄວາມໝັ້ນທ່ຽງ, ໃນນີ້, ລວມທັງການເຕີບໂຕເສດຖະກິດຂອງອາຊຽນ.