ໃນໂອກາດທີ່ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມສຸດຍອດ ເອຊີດີ ຄັ້ງທີ 2, ຊຶ່ງຈັດຂື້ນທີ່ ບາງກອກ, ປະເທດໄທ, ໃນລະຫວ່າງວັນທີ 9-10 ຕຸລາ 2016 ນີ້, ຊຶ່ງມີຜູ້ນຳ ແລະ ຄະນະຜູ້ແທນຈາກ 34 ປະເທດ ເຂົ້າຮ່ວມພາຍໃຕ້ການເປັນປະທານຂອງ ທ່ານ ນາຍົກລັດຖະມົນຕີ ແຫ່ງ ຣາຊະອານາຈັກໄທ.

ກອງປະຊຸມສຸດຍອດຄັ້ງນີ້ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນ ກ່ຽວກັບ ທິດທາງການເສີມຂະຫຍາຍການຮ່ວມມືດ້ານເສດຖະກິດ ລະຫວ່າງປະເທດສະມາຊິກ ແລະ ໄດ້ຮັບຮອງເອົາ 3 ເອກະສານ ຄື: 1) ວິ​ໄສ​ທັດ​ເອຊີ​ດີ ເພື່ອ​ການ​ຮ່ວມ​ມື​ອາຊີ 2030; 2) ຖະ​ແຫລ​ງການ​ບາງກອກ;​ ແລະ 3) ຖະ​ແຫຼ​ງການ ເອ​ຊີ​ດີ ວ່າດ້ວຍ​ການ​ເຕີບໂຕໂດຍຜ່ານ​ການ​ຮ່ວມ​ມື​ໃນ​ການ​ເຊື່ອມ​ຈອດ. ບັນດາເອກະສານດັ່ງກ່າວ ຈະວາງພື້ນຖານ​ອັນ​ຫນັກ​ແຫນ້ນ​ເພື່ອເຮັດ​ໃຫ້ອາຊີ​ ກາຍ​ເປັນ​ທະວີບ​ແຫ່ງ ສັນຕິພາບ, ມີຄວາມກ້າວໜ້າ, ຄວາມ​ສະຫງົບ​ສຸກ, ມີ​ສະຖຽນ​ລະ​ພາບ​ ​ແລະ ຄວາມ​ຈະ​ເລີ​ນຮຸ່ງເຮືອງວັດທະນາ ແລະ ເພື່ອບັນລຸເປົ້າໝາຍການພັດທະນາແບບຍືນຍົງ.

ໃນໂອກາດນີ້ ພະນະທ່ານ ທອງລຸນ ສີສຸລິດ ໄດ້ກ່າວຄຳເຫັນຕໍ່ກອງປະຊຸມ ຊຶ່ງໄດ້ເນັ້ນໜັກບາງປະເດັນທີ່ສຳຄັນວ່າ ເອຊີດີ ເປັນອົງການຫນຶ່ງດຽວຂອງທະວີບອາຊີ ທີ່ເປັນເວທີປຶກສາຫາລືການຮ່ວມມືດ້ານເສດຖະກິດ ແນໃສ່ນໍາຜົນປະໂຫຍດໃນດ້ານຕ່າງໆມາສູ່ປະເທດສະມາຊິກ ແລະ ສະຫນັບສະຫນູນຢ່າງສຸດຂີດຕໍ່ການຮ່ວມມືໃນຂອບເອຊີດີ, ໂດຍສະເພາະການຮ່ວມມືໃນ 6 ຂົງເຂດວຽກງານທີ່ໄດ້ກໍານົດໄວ້ໃນວິໄສທັດເອຊີດີ 2030 ກໍຄືຖະແຫຼງການບາງກອກ.

ທ່ານນາຍົກລັດຖະມົນຕີ ໄດ້ກ່າວຕໍ່ໄປວ່າ: ປັດຈຸບັນ ລັດຖະບານ ສປປ ລາວ ກໍາລັງດໍາເນີນການຈັດຕັ້ງປະຕິບັດຍຸດທະສາດການພັດທະນາແບບຍືນຍົງຕາມທິດສີຂຽວ ໂດຍອີງໃສ່ທ່າແຮງດ້ານການພັດທະນາຂອງຕົນ, ໃນນີ້ ການພັດທະນາພະລັງງານໄຟຟ້າ ແມ່ນໜຶ່ງໃນທ່າແຮງບົ່ມຊ້ອນທີ່ຈະເປັນບ່ອນອີງອັນສໍາຄັນ ໃຫ້ແກ່ການຂະຫຍາຍຕົວດ້ານເສດຖະກິດ. ທ່ານກ່າວຕື່ມວ່າ: ການເຊື່ອມຈອດ ກໍແມ່ນອີກຂົງເຂດໜຶ່ງທີ່ລັດຖະບານລາວໃຫ້ຄວາມສໍາຄັນ ແລະ ໃຫ້ການສົ່ງເສີມດ້ວຍການສຸມໃສ່ການພັດທະນາໂຄງລ່າງພື້ນຖານເປັນຕົ້ນ ລະບົບຄົມມະນາຄົມ-ຂົນສົ່ງ, ທັງນີ້ກໍເນື່ອງຈາກວ່າ ສປປ ລາວ ແມ່ນປະເທດທີ່ບໍ່ມີຊາຍແດນຕິດກັບທະເລ, ສະນັ້ນ, ການເຊື່ອມຈອດ ຈະມີບົດບາດສໍາຄັນຕໍ່ການພັດທະນາເສດຖະກິດ-ສັງຄົມ ຢູ່ ສປປ ລາວ. ດ້ວຍເຫດນີ້, ລັດຖະບານລາວ ຈຶ່ງມີນະໂຍບາຍຫັນປະເທດທີ່ບໍ່ມີຊາຍແດນຕິດທະເລ ໃຫ້ກາຍເປັນປະເທດເຊື່ອມຈອດ ເຊິ່ງຈະສ້າງເງື່ອນໄຂສະດວກບໍ່ພຽງແຕ່ໃຫ້ແກ່ ສປປ ລາວ ແຕ່ຍັງຈະເປັນຂົວຕໍ່ລະຫວ່າງປະເທດໄກ້ຄຽງກໍຄືໃນອະນຸພາກພື້ນນີ້.

ນອກຈາກນີ້, ສປປ ລາວ ຍັງໄດ້ເອົາໃຈໃສ່ໃນການສົ່ງເສີມອຸດສາຫະກໍາທ່ອງທ່ຽວທີ່ເປັນໜຶ່ງໃນ 6 ຂົງເຂດການຮ່ວມມືໃນຂອບເອຊີດີ, ເປັນຕົ້ນແມ່ນການທ່ອງທ່ຽວວັດທະນະທໍາ ແລະ ການທ່ອງທ່ຽວທໍາມະຊາດ ເຊິ່ງຈະນໍາຜົນປະໂຫຍດດ້ານເສດຖະກິດ ກໍຄືເປີດໂອກາດໃຫ້ມີການແລກປ່ຽນວັດທະນະທໍາທີ່ຫຼາກຫຼາຍຂອງພາກພື້ນອາຊີ. ທ່ານໄດ້ສະເຫນີຕໍ່ກອງປະຊຸມວ່າ ເອຊີດີ ຄວນມີກົນໄກຕິດຕາມການຈັດຕັ້ງປະຕິບັດບັນດາວຽກງານ ການຮ່ວມມືຕ່າງໆ ແລະ ເຫັນດີໃຫ້ມີການສ້າງຕັ້ງກອງເລຂາຖາວອນ ເພື່ອເປັນເສນາທິການໃນການ​ຕິດຕາມ, ສະຫຼຸບ​ ແລະ ຕີລາຄາ​ການ​ຮ່ວມ​ມື ​ເອຊີ​ດີ ໃນແຕ່ລະໄລຍະ. ທ່ານສະເໜີໃຫ້ມີການສືບ​ຕໍ່​ຊຸກຍູ້​ການ​ມີ​ສ່ວນ​ຮ່ວມ​ຂອງ​ພາກ​ທຸລະ​ກິດ ​ເຂົ້າ​ໃນ​ຂະ​ບວນລວມຂອງການ​ຮ່ວມ​ມືໃນ​ຂະ​ແຫນງ​ການ​ຕ່າງໆ​ ໃນ​ຂອບ​ເອຊີ​ດີ​ ແນ​ໃສ່ນຳ​ໃຊ້ທ່າ​ແຮງ​ບົ່ມ​ຊ້ອນອັນ​ຫລວງຫລາຍຂອງພາກ​ເອກະ​ຊົນເພື່ອ​ສົ່ງ​ເສີ​ມ​ການ​ຄ້າ, ການ​ລົງ​ທຶນ ແລະ ການ​ທ່ອງ​ທ່ຽວ ລະ​ຫວ່າງ​ປະ​ເທດ​ສະ​ມາ​ຊິກ​ເອ​ຊີ​ດີ. ສຸດທ້າຍ ພະນະທ່ານ ທອງລຸນ ສີສຸລິດ ຍັງໄດ້ສະເຫນີໃຫ້ຖືເອົາຂອບການຮ່ວມມື ເອຊີດີ ເປັນບ່ອນອີງໃນການເສີມຂະຫຍາຍການຮ່ວມມືໃນລະດັບສອງຝ່າຍ, ເພາະເຫັນວ່າ ຜົນສໍາເລັດຂອງການພົວພັນ 2 ຝ່າຍ ກໍຈະເປັນການປະກອບສ່ວນໃຫ້ແກ່ການຮ່ວມມືໃນຂອບ ເອຊີດີ ໂດຍລວມ.

ກອງປະຊຸມເອຊີດີສຸດຍອດ ຄັ້ງທີ 2 ໄດ້ສຳເລັດລົງດ້ວຍຜົນສຳເລັດສະຫງ່າງາມ ຊຶ່ງວາງພື້ນຖານອັນຫນັກແຫນ້ນໃຫ້ແກ່ການຮ່ວມມືທາງດ້ານເສດຖະກິດ ລະຫວ່າງປະເທດສະມາຊິກ ໃນອະນາຄົດ ແລະ ຈາກນີ້ໄປ ສະຫະລັດ ອາຫລັບ ເອມີແລດສ ຈະເປັນປະເທດປະທານ ເອຊີດີ ຕໍ່ຈາກ ຣາຊະອານາຈັກໄທ.