ໃນວັນທີ 14 ຕຸລາ 2016 ທີ່ຫ້ອງວ່າການປະທານປະເທດ, ທ່ານ ບຸນຍັງ ວໍລະຈິດ, ປະທານ ປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ມີກາແອນ ຊັງ, ເລຂາທິການໃຫ່ຍຂອງອົງການຝຣັງໂກໂຟນີສາກົນ (OIF), ໃນໂອກາດທີ່ທ່ານເດີນທາງມາຢ້ຽມຢາມ ສປປ ລາວ ຢ່າງເປັນທາງການ.

     ໃນໂອກາດດັ່ງກ່າວ, ທ່ານ ປະທານປະເທດ ໄດ້ຕີລາຄາສູງຕໍ່ການມາຢ້ຽມຢາມທາງການຂອງ ທ່ານ ເລຂາທິການ ໃຫ່ຍ OIF ແລະ ການຊ່ວຍເຫຼືອຂອງອົງການ OIF ຕະຫຼອດໄລຍະທີ່ຜ່ານມາ, ພ້ອມທັງໄດ້ສະເໜີສືບຕໍ່ໃຫ້ຄວາມສຳຄັນ ໃນການຊ່ວຍເຫຼືອ ແລະ ການສົ່ງເສີມການພົວພັນຮ່ວມມືກັບ ສປປ ລາວ ຕື່ມອີກ. ນອກຈາກນີ້, ທ່ານ ປະທານປະເທດ ກໍ່ໄດ້ຖືໂອກາດແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດ-ສັງຄົມຂອງ ສປປ ລາວ ຊຶ່ງໄດ້ມີຜົນສຳເລັດເປັນ ກ້າວໆມາ.

   ສ່ວນ ທ່ານ ເລຂາທິການໃຫ່ຍ OIF ໄດ້ຕີລາຄາສູງຕໍ່ການຕ້ອນຮັບອັນອົບອຸ່ນຂອງລັດຖະບານ ແຫ່ງ ສປປ ລາວ ກໍ່ຄື ປະຊາຊົນລາວ ແລະ ໄດ້ສະແດງຄວາມຊົມເຊີຍຕໍ່ຜົນງານຂອງ ສປປ ລາວ ໃນການພັດທະນາເສດຖະກິດ-ສັງຄົມ, ພ້ອມທັງໄດ້ຢືນຢັນທີ່ຈະເສີມຂະຫຍາຍການພົວພັນຮ່ວມມື ກໍ່ຄືການສະໜັບສະໜູນ ແລະ ການຊ່ວຍເຫຼືອໃຫ້ແກ່ ສປປ ລາວ.