ໃນວັນທີ 29 ພະຈິກ 2016, ທີ່ ສະຖານທູດກູບາ, ນະຄອນຫຼວງວຽງຈັນ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນນະບໍລິຫານງານສູນກາງພັກ ປປ ລາວ,​ ປະທານປະເທດ ແຫ່ງ ສປປ ລາວ ໄດ້ລົງນາມໄຫວ້ອາໄລ ເຖິງດວງວິນຍານ ສະຫາຍ ຟີເດນ ກາສໂຕຼ ຣຸດສ໌, ອາດີດເລຂາທິການໜຶ່ງ ຄະນະບໍລິຫານງານພັກຄອມມູນິດກູບາ, ປະທານສະພາແຫ່ງລັດ ແລະ ສະພາລັດຖະມົນຕີ ແຫ່ງ ສ.ກູບາ ທີ່ໄດ້ເຖິງແກ່ມໍລະນະກຳ ໃນວັນທີ 25 ພະຈິກ 2016 ເຊິ່ງມີເນື້ອໃນດັ່ງນີ້:

ໃນນາມພັກປະຊາຊົນ ປະຕິວັດລາວ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະພາແຫ່ງຊາດ, ປະຊາຊົນລາວ ບັນດາເຜົ່າ, ຂ້າພະເຈົ້າ ຂໍສະແດງຄວາມເສົ້າໂສກເສຍດາຍ ແລະ ເສົ້າສະຫຼົດໃຈຢ່າງສຸດຊຶ້ງມາຍັງພັກກອມມູນິດກູບາ, ລັດຖະບານ ແລະ ປະຊາຊົນ ກູບາອ້າຍນ້ອງ ຕໍ່ການເຖິງແກ່ມໍລະນະກຳຂອງ ສະຫາຍ ຟີເດນ ກາສໂຕຼ ຣຸດສ໌, ອາດີດເລຂາທິການໜຶ່ງ ຄະນະບໍລິຫານງານພັກຄອມມູນິດກູບາ, ປະທານສະພາແຫ່ງລັດ ແລະ ສະພາລັດຖະມົນຕີ ແຫ່ງ ສ.ກູບາ ທີ່ໄດ້ເຖິງແກ່ມໍລະນະກຳ ໃນວັນທີ 25 ພະຈິກ 2016.

ການລ່ວງລັບໄປຂອງ ສະຫາຍ ຟີເດນ ກາສໂຕຼ ຣຸດສ໌ ເປັນການສູນເສຍຜູ້ນຳການປະຕິວັດທີ່ຍິ່ງໃຫຍ່ຂອງພັກ, ລັດຖະບານ ແລະ ປະຊາຊົນກູບາອ້າຍນ້ອງ, ທັງເປັນການສູນເສຍນັກຕໍ່ສູ້, ຜູ້ນຳການປະຕິວັດທີ່ຍິ່ງໃຫຍ່, ກ້າແກ່ນ ໃນການຕໍ່ສູ້ຕ້ານຈັກກະພັດຜູ້ຮຸກຮານເພື່ອເອກະລາດແຫ່ງຊາດ, ສູນເສຍຜູ້ນໍາທີ່ໂດດເດັ່ນ, ຜູ້ເຊິ່ງຕະຫລອດຊີວິດໄດ້ອຸທິດຕົນເພື່ອອຸດົມການສັງຄົມນິຍົມ, ເປັນຜູ້ກໍ່ຕັ້ງລັດສັງຄົມນິຍົມທໍາອິດຢູ່ພາກພື້ນອາເມລິກາລາຕິນ, ເປັນຜູ້ນໍາເອົາອິດສະຫລະພາບມາສູ່ປະຊາຊົນກູບາອ້າຍນ້ອງ, ຜົນງານ ແລະ ຊື່ສຽງຂອງສະຫາຍ ເປັນທີ່ຮັບຮູ້ຢ່າງກວ້າງຂວາງ ໃນຖານະເປັນໜຶ່ງໃນບັນດາຜູ້ນໍາທີ່ໂດດເດັ່ນຂອງໂລກ.

ການຈາກໄປຂອງສະຫາຍ ເປັນການສູນເສຍເພື່ອນມິດຜູ້ຍິ່ງໃຫຍ່ ຮ່ວມອຸດົມການຂອງພັກ, ລັດຖະບານ ແລະ ປະຊາຊົນລາວ ຜູ້ເຊິ່ງໄດ້ປະກອບສ່ວນຢ່າງສໍາຄັນເຂົ້າໃນການເພີ່ມພູນຄູນສ້າງສາຍພົວພັນທີ່ມີມູນເຊື້ອລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ.

    ພວກຂ້າພະເຈົ້າເຊື້ອໝັ້ນຢ່າງແນວແນ່ວ່າ, ພັກ-ລັດຖະບານ ແລະ ປະຊາຊົນກູບາອ້າຍນ້ອງຈະສາມາດຜ່ານຜ່າຄວາມທຸກໂສກນີ້ໄປໄດ້ ແລະຈະເຫັນຄວາມທຸກໂສກນີ້ມາເປັນກໍາລັງແຮງເພື່ອສືບຕໍ່ສ້າງສາປະເທດສັງຄົມນິຍົມກູບາ ໃຫ້ນັບມື້ນັບເຂັ້ມແຂງຕາມຄວາມມຸ້ງມາດປາດຖະໜາຂອງ ສະຫາຍ ຟີແດນ ກາສໂຕຣ ຣຸດສ໌.