ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ຈະໄດ້ນໍາພາຄະນະຜູ້ແທນເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຄັ້ງທີ 23, ໃນລະຫວ່າງວັນທີ 05-06 ມິຖຸນາ 2017, ທີ່ ໂຕກຽວ, ປະເທດຍີ່ປຸ່ນ.
ກອງປະຊຸມສາກົນ ກ່ຽວກັບ ອະນາຄົດຂອງອາຊີ ແມ່ນໄດ້ຈັດຂຶ້ນທຸກໆປີ ນັບແຕ່ປີ 1995 ເປັນຕົ້ນມາ ໂດຍສໍານັກຂ່າວໜັງສືພິມນິກເກຂອງຍີ່ປຸ່ນ, ເຊິ່ງໄດ້ເຊື້ອເຊີນບັນດາຜູ້ນໍາ, ຜູ້ບໍລິຫານຂັ້ນສູງຂອງພາກລັດ ແລະ ພາກເອກະຊົນ ລວມທັງອາດີດການນໍາ, ຜູ້ຊົງຄຸນນະວຸດທິ, ປະທານອົງການ ແລະ ສະຖາບັນພາກພື້ນ ແລະ ສາກົນ ໃນທົ່ວພາກພື້ນອາຊີເຂົ້າຮ່ວມ.
ກອງປະຊຸມຄັ້ງນີ້ ແມ່ນຈະດໍາເນີນໄປພາຍໃຕ້ຫົວຂໍ້: “ໄລຍະຂ້າມຜ່ານຂອງຍຸກໂລກາພິວັດ-ອາຊີຈະກ້າວເດີນໄປຂ້າງໜ້າແນວໃດ (Globalism at crossroads - Asia next move), ເພື່ອໃຫ້ບັນດາຜູ້ນໍາໄດ້ແລກປ່ຽນທັດສະນະ ກ່ຽວກັບ ທິດທາງໃນຕໍ່ໜ້າຂອງຂະບວນການຮ່ວມມື ແລະ ເຊື່ອມໂຍງເສດຖະກິດພາກພື້ນ ແລະ ສາກົນ ໃນທ່າມກາງທີ່ເກີດມີຂະບວນການຕ້ານກັບໂລກາພິວັດ ແລະ ກໍາລັງຈະຫັນໄປສູ່ລັດທິຊາດນິຍົມລວມທັງນະໂຍບາຍ ແລະ ມາດຕະການພາຍໃນປະເທດຕົນ ເພື່ອຮັບມືກັບສະພາບການດັ່ງກ່າວໃນປະຈຸບັນ ແລະ ອະນາຄົດ.
ໃນໂອກາດເຄື່ອນໄຫວ ຢູ່ ປະເທດຍີ່ປຸ່ນ ຄັ້ງນີ້, ພະນະທ່ານ ນາຍົກລັດຖະມົນຕີ ຍັງຈະໄດ້ພົບປະສອງຝ່າຍກັບ ພະນະທ່ານ ຊິນໂຊະ ອາເບະ, ນາຍົກລັດຖະມົນຕີ ຍີ່ປຸ່ນ ແລະ ຢ້ຽມຢາມເຂດການຜະລິດ ແລະ ສະຖານທີ່ວັດທະນະທໍາຈໍານວນໜຶ່ງ ຢູ່ ແຂວງ ໄຊຕາມະ ລວມທັງພົບປະກັບຄົນລາວ ແລະ ພີ່ນ້ອງເຊື້ອຊາດລາວຈໍານວນໜຶ່ງທີ່ອາໄສ ຢູ່ ປະເທດຍີ່ປຸ່ນ ແລະ ຮັບການເຂົ້າຢ້ຽມຂໍ່ານັບຈາກ ອົງການ ແລະ ບໍລິສັດຍີ່ປຸ່ນ ຈໍານວນໜຶ່ງ.