ສະຫາຍ ພົນ​ໂທ ຈັນ​ສະຫມອນ ຈັນຍາ​ລາດ, ກໍາ​ມະການ​ກົມ​ການ​ເມືອງສູນ​ກາງ​ພັກ, ລັດຖະມົນຕີ​ກະຊວງ​ປ້ອງ​ກັນ​ປະ​ເທດ

ສະຫາຍ ສະ​ເຫລີ​ມ​ໄຊ ກົມມະ​ສິດ, ກໍາ​ມະການ​ສູນ​ກາງ​ພັກ, ​ເລຂາ​ຄະນະ​ພັກ, ລັດຖະມົນຕີ​ກະຊວງ​ການ​ຕ່າງປະ​ເທດ 

ກອງປະຊຸມດຳເນີນຊີວິດການເມືອງປັບປຸງປົວແປງພັກ ຂອງອົງຄະນະພັກກະຊວງ​ການ​ຕ່າງປະ​ເທດ ປະ​ຈໍາ ປີ 2017, ​ໄດ້​ໄຂ​ຂື້ນ​ໃນ​ວັນທີ 09 ມີ​ຖຸນາ 2017, ທີ່​ ກະຊວງ​ການ​ຕ່າງປະ​ເທດ, ພາຍໃຕ້​ການ​ເປັນ​ປະທານ​ຂອງ​ ສະຫາຍ ສະ​ເຫລີ​ມ​ໄຊ ກົມມະ​ສິດ, ກໍາ​ມະການ​ສູນ​ກາງ​ພັກ, ເລຂາ​ຄະນະ​ພັກ, ລັດຖະມົນຕີ​ກະຊວງ​ການ​ຕ່າງປະ​ເທດ; ​ໂດຍໃຫ້​ກຽດ​ເຂົ້າ​ຮ່ວມ ​ແລະ ​ໃຫ້​ທິດ​ຊີ້​ນໍາ​ຕໍ່​ກອງ​ປະຊຸມ​ຂອງ​ ສະຫາຍ ພົນ​ໂທ ຈັນ​ສະຫມອນ ຈັນຍາ​ລາດ, ກໍາ​ມະການ​ກົມ​ການ​ເມືອງສູນ​ກາງ​ພັກ, ລັດຖະມົນຕີ​ກະຊວງ​ປ້ອງ​ກັນ​ປະ​ເທດ; ມີບັນດາ​ສະຫາຍພາຍໃນຄະນະ​ພັກ, ຄະນະນຳ, ເລຂາ, ຮອງເລຂາໜ່ວຍພັກ, ຫົວໜ້າກົມ, ຮອງຫົວໜ້າກົມ, ບັນດາ​ທ່ານ​ເອກ​ອັກຄະ​ລັດຖະທູດ, ກົງສຸນໃຫ່ຍ ​ແລະ ແຂກຖືກເຊີນ ເຂົ້າຮ່ວມ.

ໃນໂອກາດເປີດກອງປະຊຸມ ສະຫາຍ ສະ​ເຫລີ​ມ​ໄຊ ກົມມະ​ສິດ ໄດ້​ເນັ້ນວ່າ: ການ​ເປີດ​ກອງປະຊຸມດຳເນີນຊີວິດການເມືອງຄັ້ງນີ້ ແມ່ນມີຄວາມໝາຍຄວາມສຳຄັນ ແລະ ມີຄວາມຈໍາເປັນຮຽກຮ້ອງອັນຮີບດ່ວນ ເພື່ອປັບປຸງປົວແປງພາຍໃນພັກ ຂອງອົງຄະນະພັກກະຊວງ​ການ​ຕ່າງປະ​ເທດ ຕາມຄຳສັ່ງຂອງກົມການເມືອງສູນກາງພັກ ເລກທີ 01/ກມສພ, ລົງວັນທີ 01 ກຸມພາ 2017, ແນໃສ່ສ້າງພັກ ໃຫ້ມີຄວາມປອດໃສ, ໜັກແໜ້ນ, ເຂັ້ມແຂງ, ມີການຫັນປ່ຽນຢ່າງຕັ້ງໜ້າ ແລະ ທັນກັບສະພາບການ ເພື່ອສືບຕໍ່ນຳພາ ພາລະກິດປົກປັກຮັກສາ ແລະ ພັດທະນາປະເທດຊາດ ຕາມທິດທີ່​ໄດ້​ກໍານົດ​ໃນມະຕິກອງປະຊຸມໃຫຍ່ ຄັ້ງທີ X ຂອງພັກ ​ແລະ ມະຕິ​ຂອງ​ກອງ​ປະຊຸມ​​ໃຫຍ່ ຄັ້ງ​ທີ III ຂອງ​ອົງຄະ​ນະ​ພັກ​ກະຊວງ​ການ​ຕ່າງປະ​ເທດ. ພ້ອມ​ນັ້ນ, ສະຫາຍ​ເລຂາ ຍັງ​ໄດ້​ຮຽກຮ້ອງ​ໃຫ້ບັນດາສະຫາຍສະມາຊິກພັກ, ພະນັກງານ​ຫລັກ​ແຫ​ລ່ງທຸກສະຫາຍ ຈົ່ງພ້ອມກັນເຊີດຊູ ແລະ ຍົກສູງຄວາມຮັບຜິດຊອບຂອງຕົນ ດຳເນີນການສຳຫຼວດກວດກາ ດ້ວຍຄວາມກ້າຫານ, ເດັດດ່ຽວ, ຈິງໃຈ ແລະ ຊ່ວຍ​ເຫລືອ​​ເຊິ່ງກັນ ແລະ ກັນ ເພື່ອຍົກ​ສູງ​ຄວາມ​ຮັບຜິດຊອບ​ຫນ້າ​ທີ່​ການ​ເມືອງ​ຂະ​ແໜງການ​ຕ່າງປະ​ເທດ ​ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກ້າວສູ່ຈຸດໝາຍຂອງພັກປະຊາຊົນປະຕິວັດລາວ ກຳນົດໄວ້.

ໃນກອງປະຊຸມ ໄດ້ພ້ອມ​ກັນຄົ້ນຄວ້າ, ເຊື່ອມຊຶມ 03 ເອກະສານສຳຄັນຄື: ມະຕິ​ ວ່າ​ດ້ວຍ​ການ​ແກ້​ໄຂ​ພະຍາດ​ອາດຍາ​ສິດ, ສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫລວງ; ເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ​ແລະ ບົດ​ສະຫລຸບ​ຕີ​ລາຄາ​ຮອບດ້ານ​ຈັດ​ຕັ້ງ​ຜັນ​ຂະຫຍາຍ​ ມະຕິ​ກອງ​ປະຊຸມ​​ໃຫຍ່ ​ຄັ້ງທີ X ຂອງ​ພັກ ແລະ ມະຕິ​ກອງ​ປະຊຸມ​​ໃຫຍ່​ ຄັ້ງ​ທີ III ຂອງ​ອົງຄະ​ນະ​ພັກ​ກະຊວງ​ການ​ຕ່າງປະ​ເທດ.

ໃນໂອກາດດັ່ງ​ກ່າວນີ້, ສະຫາຍ ພົ​ນໂທ ​ຈັນ​ສະ​ໝອນ ຈັນຍາ​ລາດ​ ໄດ້​ມີ​ຄໍາ​ເຫັນ​ຊີ້​ນໍາ​ຕໍ່ກອງປະຊຸມ ​ໂດຍ​​ຍົກ​ໃຫ້​ເຫັນມູນເຊື້ອ, ການເຕີບໃຫຍ່ຂະຫຍາຍຕົວ ແລະ ຜົນສຳເລັດອັນພົ້ນເດັ່ນ ພາຍໃຕ້ການຊີ້ນຳໆພາຂອງພັກໃນແຕ່ລະໄລຍະ ຊຶ່ງໄດ້ກາຍເປັນພື້ນຖານອັນໜັກແໜ້ນ ໃຫ້ແກ່ການພັດທະນາເສດຖະກິດ-ສັງຄົມ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ, ເຮັດໃຫ້ປະເທດເຮົາສືບຕໍ່ມີຄວາມໜັກແໜ້ນທາງດ້ານການເມືອງ ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ ​ແລະ ຫມັ້ນ​ທ່ຽງ, ຊີວິດການເປັນຢູ່ຂອງປະຊາຊົນລາວບັນດາເຜົ່ານັບມື້ດີຂຶ້ນ, ລວມທັງການເຊື່ອມໂຍງກັບພາກພື້ນ ແລະ ສາກົນນັບມື້ຄ່ອງຕົວເປັນຢ່າງດີ, ຍົກສູງບົດບາດ​ຂອງ ສປປ ລາວ ​ໄດ້​ພົ້ນ​ເດັ່ນໃນເວທີສາກົນ.

ພ້ອມ​ນັ້ນ, ສະຫາຍ ພົ​ນໂທ ​ຈັນ​ສະ​ໝອນ ຈັນຍາ​ລາດ ຍັງໄດ້ຍົກໃຫ້ເຫັນຄວາມໝາຍຄວາມສຳຄັນຂອງບັ້ນດຳເນີນຊີວິດການເມືອງນີ້ຕໍ່ກອງປະຊຸມຄັ້ງນີ້ ເພື່ອ​ປັບປຸງປົວແປງພາຍໃນພັກທາງດ້ານຄຸນທາດການເມືອງ, ຄຸນສົມບັດ​ສິນ​ທໍາ​ປະຕິວັດ, ຄວາມຮັບຜິດຊອບດ້ານການເມືອງ, ການ ຈັດຕັ້ງ, ແບບແຜນການນຳພາ, ວິທີເຮັດວຽກ, ​ແບບ​ແຜນການ​ດໍາລົງ​ຊີວິດ, ຜົນ​ຮ້າຍ ​ແລະ ຄວາມ​ອັນ​ຕະລາຍ​ຂອງ​ພະຍາດ​ອາດຍາ​ສິດ ​ແລະ ການ​ສໍ້​ລາດ​ບັງ​ຫລວງ. ແນໃສ່ຍົກສູງບົດບາດເປັນແກນນຳໃນລະບົບການເມືອງ ຢູ່ ກະຊວງການ​ຕ່າງປະ​ເທດ, ສົ່ງ​ເສີມດ້ານຕັ້ງໜ້າ, ເດັັດຂາດ ແກ້ໄຂດ້ານອ່ອນ ແລະ ຂໍ້ຄົງຄ້າງ ຂອງແຕ່ລະສະຫາຍໃນຄະນະພັກ, ພະນັກງານຫລັກແຫລ່ງ ​ແລະ ​ສະມາຊິກ​ພັກ​ທຸກ​ສະຫາຍ ​ເພື່ອ​ຮັບປະກັນ​ເຮັດ​ໃຫ້ການ​ນໍາພາ​ຂອງ​ພັກ ມີ​ຄວາມ​ເຂັ້ມ​ແຂງ, ມີ​ຄວາມ​ສັກສິດ ຕາມ​ມະຕິ​​ຂອງ​ກອງ​ປະຊຸມ​ພັກ​ໄດ້​ກໍານົດ​ໄວ້​ວ່າ “ພັກ​ນໍາພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າ” ​ໃນ​ລະບອບ​ປະຊາທິປະ​ໄຕປະຊາຊົນ​ອັນ​ແທ້​ຈິງ.

ກອງປະຊຸມດໍາເນີນຊີວິດການເມືອງປັບປຸງປົວແປງພັກ ຂອງອົງຄະນະພັກກະຊວງການຕ່າງປະເທດ ຈະໄດ້ດຳເນີນໄປ ນັບແຕ່ວັນທີ 09-21 ມີຖຸນາ 2017 ນີ້ ໂດຍແບ່ງອອກເປັນ 2 ຊຸດ.